1 Sam. 21 - Bhaibheri Rakachena muChindau

Dhavhidha Unotiza Kubva kunaSauri

¹ Dhavhidha wakauya Nobhi, kunaAhimerekhi mupristi. Ahimerekhi wakauya kooshongana naDhavhidha echihuta, akati kwaari, “Uri wega ngenyi, usina munhu?”

² Dhavhidha wakati kunaAhimerekhi mupristi, “Mambo wakandironzera mushando naye wakati kwendiri, ‘Kusazoapo naumwe unozozia chiro ngomushando uwo wendinokutuma, neicho chendinokupangira.’ Ndakapangana nemajaha kushongana nawo kundau imweni.

³ Ndizvo zvino unenyi munyara yako? Ndipe zvingwa zvishanu kunyazwi chiinyi chaunacho pano.”

⁴ Mupristi wakapingura Dhavhidha, akati, “Andina chingwa chimweni munyara yangu, kwega chingwa chakacheneswa; kwega kuti kudai majaha matsva akadzingwarira kubva kuvakadzi.”

⁵ Dhavhidha wakapingura mupristi, akati kwaari, “Ngechokwadi vakadzi atizi kuvaona kwemazuva eshe; apo ndakabuda, nemiiri yemajaha yakacheneswa, kunyazwi apo techihamba muhambowo zvawo; kunozopinda kuchena kwakaitawani miiri yavo nyamashi.”

⁶ Ndizvo mupristi wakamupa zvingwa zvakacheneswa; ngokuti paiya pasina chingwapo kwega chingwa chokuapo kwaMambo Mwari, izvo zvinoduswa kubva pamberi paMambo Mwari, kuisapo zvingwa zvinopisha ngezuva rezvinoduswa.

⁷ Zvino munhu umweni wevaranda vaSauri waiya aripo ngezuva iro, wakabatwa pamberi paMambo Mwari, nezina rake raizwi Dhoegi muEdhomu, mukuru wevaushi vaSauri.

⁸ Dhavhidha wakati kunaAhimerekhi, “Apana mukhondo nokuti shoti pano newe here? Andizi kuunza shoti yangu nokuti zvokurwa ndizvo, ngokuti mushando wamambo waida kuti ndikasire.”

⁹ Mupristi wakati, “Shoti yaGoriathi muFiristia, uwo wewakauraya muBani raEra, iri pano yakaputirwa mujira sure kweefodhi; kuti wechida kuitora, itore, ngokuti apana imweni pano ngokubanze kweiyo.” Dhavhidha wakati, “Apana naimwe yakadaro; ndipe.”

¹⁰ Dhavhidha wakamiruka, akatiza ngezuva iro ngokutya Sauri; wakaenda kunaAkhishi mambo weGathi.

¹¹ Varanda vaAkhishi vakati kwaari, “Uyu andiyepi Dhavhidha mambo wenyika here? Avazi kuemba ndiye umwe kunoumweni mukuzvina here vechiti, ‘Sauri wakauraya makumi emazana, naDhavhidha gumi remakumi emazana?’ ”

¹² Dhavhidha wakangwarira aya mazwi mumwoyo mwake, naye wakatya Akhishi mambo weGathi kakurutu.

¹³ Ndizvo wakashandura zviito zvake pamberi pavo, akadziitisa kudai ngounopenga pamberi pavo. Akataratara pazvivhayo zvepamisiwo, nemasiriri ake akadzaka pamurebvu wake.

¹⁴ Akhishi wakati kuvaranda vake, “Ringirai, munoona munhu uyu unopenga; mwamuunzirenyi kwendiri?

¹⁵ Ndinotama vanhu vanopenga here, zvomwaunza uyu munhu kuita mupengo pamberi pangu? Munhu uyu unozopotera mumhatso mwangu here?”