1 Sam. 20 - Bhaibheri Rakachena muChindau

Jonathani Unodetsera Dhavhidha

¹ Dhavhidha wakatiza kubva Naiothi muRama. Wakauya pamberi paJonathani, akati, “Ndakaitenyi? Kushaisha kwangu ngokwenyi? Nechishaishi changu ngechenyi kunababa ako, vanotsvaka kundiuraya?”

² Jonathani wakati kwaari, “Haiwa! Iwewe auzofi. Ringira, baba angu aazoiti chiro kunyazwi chikuru nokuti chidoko, asikazochironzi kwendiri; zvino baba angu vangazofisha ichi chiro kwendiri ngenyi? Achizi kudaro.”

³ Asi Dhavhidha wakapikawo, akati, “Ngegwinyiso baba ako vanozia kuti ndakaona nyasha pamberi pako; navo vanoti, ‘Jonathani asazozia ichi, nokuti ungazotambudzika.’ Asi ngegwinyiso, kudai ngezvaanopona Mambo Mwari, newe wechipona pachako, iripo nhambwe imwe pakati pangu norufu.”

⁴ Zvino Jonathani wakati kunaDhavhidha, “Kunyazwi chiinyi chinodikanwa ngomweya wako, ndinozochiita.”

⁵ Dhavhidha wakati kunaJonathani, “Ringira, mangwani mwedzi mutsva wotawa, neni andisisiri kuzokorera kugara namambo pakudya; asi nditendere ndiende, kuti ndiende ndihware mushango metsa zuva rechitatu madeekoni.

⁶ Kudai baba ako vanditama, unozoti, ‘Dhavhidha wakapota kwendiri kuti atenderwe kurumba kuenda Bhetherehema, dhorobha rake; ngokuti uripo mudiro wegore ngegore wemhuri yake yeshe.’

⁷ Kudai vechizoronza kuti, ‘Zvakanaka!’ Muranda wako unozoa nokunyarara; asi kuti akatseneka, zvino ziai ngegwinyiso kuti kushata kwakarongwa ndivo.

⁸ Ndizvo unozoita zvakanaka kumuranda wako; ngokuti wakaunza muranda wako kuchitenderano chakachena pamberi paMambo Mwari newe. Asi kudai kuripo kushata kwendiri, ndiuraye iwewe pachako; ngenyi wechizondiunza kunababa ako?”

⁹ NaJonathani wakati, “Haiwa! Ngokuti kudai ndechizia kuti kushata kwakarongwa ndibaba angu kwouri, ndisaizokuronzera here?”

¹⁰ Zvino Dhavhidha wakati kunaJonathani, “Ndiani unozondironzera, kudai baba ako vechizopingura ngoushungu?”

¹¹ Jonathani wakati kunaDhavhidha, “Uya, ngatiende kumunda.” Navo vairi vakaenda kumunda.

¹² NaJonathani wakati kunaDhavhidha, “NdiMambo Mwari, Mwari waIsuraeri, ngaaite uchapupu! Naapo ndechizoereketa nababa angu ngouwo mukuwo mangwani, nokuti zuva rechitatu, kudai vanemwoyo wakanaka kunaDhavhidha, andizotumiri izwi kwouri, kukuronzera here?

¹³ Asi kudai baba angu vechida kukuremadza, Mambo Mwari ngaaite kudaro nokwakapinda kuwanda kunaJonathani, kuti ndisina kukuronzera nokukutizisa kuti uende mukunyarara. Mambo Mwari ngaanewe, kudai ngezvaaiya nababa angu.

¹⁴ Kudai ndichandopona, ndiitire nyasha dzakagondeka dzaMambo Mwari; asi kuti ndikafa,

¹⁵ usazodusa kugondeka kwenyasha dzako kubva kumhatso yangu mhera nariini; haiwa, kunyazwi kudai Mambo Mwari aizodusa magaa eshe aDhavhidha kubva padera penyika.”

¹⁶ Ndizvo Jonathani wakaita chitenderano nemhatso yaDhavhidha echiti, “Mambo Mwari unozochibvunza kunyara dzamagaa aDhavhidha.”

¹⁷ Jonathani wakaita kuti Dhavhidha apike ngorudo rwake kwaari, ngokuti waimuda kudai ngokuda kwaakaita mweya wake wemene.

¹⁸ Jonathani wakati kunaDhavhidha, “Mangwani mwedzi mutsva unotawa; newe unozotamika ngokuti chigaro chako chinonga chisina munhu.

¹⁹ Naapo iwewe wagara mazuva matatu, unozodzaka kubani kuuya kundau yewakambodzifisha ngendaa yakaitika pakutanga, newe unozogarapo pasinde pebuwe Ezeri.

²⁰ Neni ndinozoposhera misee mitatu parutii rwaro, kudai ngounofura pachiro chakaiswapo.

²¹ Zvino ndinozotuma murumbwana ndechiti, ‘Enda, utsvake misee.’ Kuti ndechiti kunomurumbwana, ‘Ringira, misee iri kurutii rwouno, itore,’ zvino iwewe uya, ngokuti apo Mambo Mwari achapona, kuripo kunyarara kwouri, haiwa kuremadzwa.

²² Asi kudai ndechironza kujaha kuti, ‘Ringira, misee iri pamberi pako,’ zvino enda hako; ngokuti Mambo Mwari wakuendesa kuretu.

²³ Ngendaa yetaereketa ndiyo, ringira, Mambo Mwari ngaapakati pako iwewe neni mhera nariini.”

²⁴ Ndizvo Dhavhidha wakadzifisha mumunda. Naapo mwedzi mutsva watawa, mambo wakagara pashi padhiri kudya.

²⁵ Namambo wakagara pachigaro chake, kudai ngemikuwo imweni, pachigaro chake chepasinde porukumbati. Jonathani wakamiruka, apo Abhina akagara parutii paSauri, asi pandau yaDhavhidha paiya pasina munhu.

²⁶ Sauri aazi kuereketa chiro ngezuva iro; ngokuti wakapinimidza kuti, “Panechamugumira, aazi kuchena; ngegwinyiso aazi kuchena.”

²⁷ Asi ngezuva rechipiri sure kwezuva rokutawa kwomwedzi mutsva, pandau yaDhavhidha paiya pasina munhu. NaSauri wakati kunaJonathani mukororo wake, “Ngenyi mukororo waJesi asikazi kuuya kudhiri koodya zuro nokuti nyamashi?”

²⁸ Jonathani wakapingura Sauri, wakati, “Dhavhidha wakapota kwendiri kuti atenderwe kuenda Bhetherehema.

²⁹ Wakati, ‘Nditendere ndiende, ndapota, ngokuti mhuri yedu inoita mudiro mudhorobha, nomukoma wangu wakandipanga kuti ndiapo. Ndizvo zvino kudai ndadikanwa ndiwe, nditendere ndibve ndapota, ndione vakoma vangu.’ Ngendaa iyi aazi kuuya kutafura ramambo.”

³⁰ Zvino ushungu hwaSauri hwakabaka kunaJonathani. Wakati kwaari, “Iwewe mukororo womukadzi usikazwi nokumukira! Andizii here kuti iwewe wakatsanangura mukororo waJesi kuita kutsverudzwa kwako, nechitsverudzo choutitinini hwamai ako?

³¹ Ngokuti kudai achapona mukororo waJesi padera penyika, iwewe nokuti umambo hwako auzogwinyiswi. Zvino tuma vanhu vamuunze kwendiri, ngokuti ngegwinyiso unozofa.”

³² Zvino Jonathani wakapingura Sauri baba ake, akati kwaari, “Unozourawa ngenyi? Wakaitenyi?”

³³ Asi Sauri wakaposhera mukhondo kwaari, kumubaya; ndizvo Jonathani wakazia kuti ndikwo kuemesa kwababa ake kuuraya Dhavhidha.

³⁴ Jonathani wakamiruka kubva patafura ngokushatirwa kukurutu, aazi kudya chiro zuva rechipiri romwedzi, ngokuti waisvipo mwoyo ndiDhavhidha zvokuti baba ake vakamutsverudza.

³⁵ Mumangwanani Jonathani wakaenda mushango ngomukuwo waakaemeserana naDhavhidha, nomurumbwana mudoko waiya naye.

³⁶ Wakati kunomurumbwana wake, “Rumba, utsvake zvino misee yendinoposhera.” Naapo murumbwana acharumba, wakaposhera musee mberi kwake.

³⁷ Naapo murumbwana aguma pandau pakawira musee waakaposhera Jonathani, Jonathani wakadaidzira kumurumbwana, akati, “Musee ausiri mberi kwako here?”

³⁸ NaJonathani wakadaidzira kumurumbwana, akati, “Rumba, kasira, usaemapo.” Ndizvo murumbwana waJonathani wakaunganidza misee, akauya kunomukuru wake.

³⁹ Asi murumbwana aazi kuzia chiro; kwega Jonathani naDhavhidha vakazia ndaayo.

⁴⁰ Jonathani wakapa zviro zvake zvehondo kunomurumbwana, wakati kwaari, “Enda nazvo kudhorobha.”

⁴¹ Naapo murumbwana aenda, Dhavhidha wakamiruka akabuda kubva parutii rwemurwi wemapuwe, wakawa ngehope yake pamavhu. Akadzikotamisa katatu, navo vakachingamidzana ngemiromo, vakachema umwe noumweni; Dhavhidha wakapinda kuchema.

⁴² Zvino Jonathani wakati kunaDhavhidha, “Enda hako mukunyarara, ngokuti kudai ngezvetakapikirana teshe ngezina raMambo Mwari techiti, ‘Mambo Mwari ngaapo pakati pangu neiwewe, nepakati pemibarirwana yangu neyako mhera nariini.’ ” Wakamiruka, akaenda; naJonathani wakaenda mudhorobha.