1 Sam. 2 - Bhaibheri Rakachena muChindau

Mukumbiro waHana

¹ Hana wakakumbira echiti, “Mwoyo wangu unodakara munaMambo Mwari, simba rangu rinokudzwa munaMwari wangu. Muromo wangu unozokuriswa padera pemagaa angu, ngokuti ndinodakara ngokunyisa kwako.

² Akuna naumwe wakachena kudai ndiMambo Mwari, ngokuti akunazve umweni ngokubanze kwako; akuna buwe naimwe yakadai ndiMwari wedu.

³ Usaereketazve ngokudzikudza; usatendera kuti kudada kubude kubva pamuromo wako, ngokuti Mambo Mwari ndiMwari wokuzia, ndiye unopima zviito.

⁴ Uta hwengwazi hwagurwa, asi vasina simba vatsimiswa ngesimba.

⁵ Avo vaiya vakagutiswa vanoshandira kudya; asi avo vaiya nenzara vanokora ngezvakachakatwa. Ngomwa yakabereka vanomwe; asi uwo unevana vazhinji wagumirwa.

⁶ Mambo Mwari unouraya, nokuponesazve; unodzasa muiba, nokumusazve.

⁷ Mambo Mwari unoita varombo nemakurudza; unodzasa pashi, nokumirudzazve.

⁸ Unomirudza varombo kubva mubukuta, echimirudza mupemhi kubva mumurwi mwedota, nokuita kuti vagare pakati pevazvare, vagare nhaka yedendemaro routhende. Ngokuti sika dzenyika ngedzaMambo Mwari, naye wakaemesa nyika padera padzo.

⁹ Unozongwarira tsoka dzevakagondeka vake, asi vakashata vanozoparadzwa muchidima; ngokuti akuna munhu unozonyisa ngesimba.

¹⁰ Magaa aMambo Mwari anozoparadzwa; Uripadera pezveshe unozotinhira kubva mudenga. Mambo Mwari unozotonga magumo enyika; naye unozopa simba kunamambo wake, nokukudza simba rowakadzodzwa wake.”

¹¹ Zvino Erikana wakaenda Rama kumhatso yake, asi mwana wakasara echishandira Mambo Mwari pamberi paEri mupristi.

Vakororo vaEri

¹² Zvino vakororo vaEri vaiya vakororo vakashata; avazi kuzia Mambo Mwari,

¹³ nokuti mishando yevapristi kuvanhu. Naapo munhu aipira mudiro, muranda womupristi waiuya neforoko inemiromo mitatu munyara yake, apo nyama yaiya ichabikwa.

¹⁴ Naye waizobaya ndiyo munhamba, nokuti mugapu, nokuti mubiya, nokuti muhari; yeshe nyama yaizobaiwa ngeforoko yaitorwa ngomupristi. Izvi ndizvo zvevaita muShiro kuvaIsuraeri vakauyamwo.

¹⁵ Zve, vasati vapisha mafuta muranda womupristi waizouya echiti kunomunhu waipira mudiro, “Unza nyama yokukochera yomupristi, ngokuti aazoashiri nyama yakabikwa kubva kwouri, asi kwega mbishi.”

¹⁶ Kudai munhu aizoti kwaari, “Ngavapishe mafuta kutanga, vapedza wechitora younoda,” iye waimupingura echiti, “Haiwa, asi ndipe zvinopano; kuti warekera, ndinozoitora ngehasha.”

¹⁷ Ndizvo kushaisha kweava vamuna vatsva kwakakura yaamho pamberi paMambo Mwari; ngokuti vanhu vakashoora mudiro waMambo Mwari.

Samueri paShiro

¹⁸ Samueri wakashanda pamberi paMambo Mwari, achiri murumbwana akasimira efodhi rorukangaza.

¹⁹ Mai ake vaimusonera gore ngegore kabhachi, vaichiunza kwaari apo vaizouya nomwamuna wavo koopira mudiro wegore ngegore.

²⁰ Zvino Eri waizofumisa Erikana nomukadzi wake echiti, “Mambo Mwari ngaakupe vana ngomukadzi uyu ngendaa yechipo chaakapa kunaMambo Mwari.” Navo vakaenda kanyi kwavo.

²¹ NaMambo Mwari wakahambira Hana; wakabereka vakororo vatatu, navanasikana vairi. Nomurumbwana Samueri wakakura mukuona kwaMambo Mwari.

Eri neVakororo vake

²² Zvino Eri waiya aamusharuka. Wakazwa izvo zveshe zvaiitwa ngevakororo vake kuvaIsuraeri veshe, nokuatana kwevaiita navakadzi vaishanda pamusiwo wetende romushongano.

²³ Naye wakati kwevari, “Munoita zviro zvakadai izvi ngenyi? Ngokuti ndinozwa ngezviito zvenyu zvakashata kubva kuvanhu veshe ava.

²⁴ Haiwa, vakororo vangu, azvizi kunaka zvendinozwa vanhu vaMambo Mwari vechiereketa ndizvo kweshe.

²⁵ Kudai munhu umwe echishaishira umweni, Mwari ungamuemerera; asi kuti munhu echishaishira Mambo Mwari, ndiani unozomurwira?” Asi avazi kupurutana izwi rababa avo, ngokuti kwaiya kuda kwaMambo Mwari kuti vaurawe.

²⁶ Zvino murumbwana Samueri wakaangira kukura, echidiwa ndiMambo Mwari nevanhu.

Kuprofeta Kunorwisana neMhuri yaEri

²⁷ Munhu waMwari wakauya kunaEri, akati kwaari, “Ndizvo zvinoronza Mambo Mwari, ‘Ndakadzionisa yaamho pachangu kumhatso yababa ako apo vaiya hloko muEgipite mumhatso yaFaro.

²⁸ Inini ndakamutsanangura kubva kumadzinza eshe aIsuraeri kuti aite mupristi wangu, kuti akwire paarita rangu, kupisha mutombo unegwema rakanaka nokusimira efodhi pamberi pangu. Neni ndakapa kumhatso yababa ako midiro yangu yeshe yokupisha ngomuriro inobva kuvana vaIsuraeri.

²⁹ Ngenyi zvino mwechiringira ngedziso rokuboka midiro yangu yeshe neminikero yangu, izvo zvendakapanga muugaro hwangu; wechiremeredza vakororo vako kupinda inini, ngokudzikodza ngeminikero yakapinda kunaka yavanhu vangu Isuraeri?’

³⁰ Ndizvo Mambo Mwari, Mwari waIsuraeri, unoti, ‘Ndakagondisa ngegwinyiso kuti vemhatso yako nevemhatso yababa ako vanozohamba pamberi pangu mhera nariini;’ asi zvino Mambo Mwari unoti, ‘Haiwa, azvizoitiki; ngokuti avo vanondiremeredza ndinozovaremeredza, naavo vanondishoora vanozonyenyeredzwa.’

³¹ Ringira, mazuva anozouya apo ndinozogura simba rako, nesimba remhatso yababa ako, kuti asazoapo naumwe unokura kuita harahwa mumhatso yako mhera nariini.

³² Zvino mukutambudzika unozoringira ngedziso rokuboka muupfumi hweshe hwaanozopira Mwari padera paIsuraeri; akuzoapo umwe unokura kuita harahwa mumhatso yako mhera nariini.

³³ Munhu umwe ega wemhatso yako wendisikazoguri kubva kuarita rangu unozosiiwa kuti madziso ake acheme, nokutambudza mwoyo wake; navo veshe vemibarirwana yemhatso yako vanozofa ngeshoti.

³⁴ Neichi chinozoita chioniso kwouri cheicho chinozoitika kuvakororo vako vairi, Hofini naFinehasi; ngezuva rimwe vanozofa veshe.

³⁵ Neni ndinozodzimirudzira mupristi unogondeka, uwo unozoita zveshe zviri mumwoyo mwangu nomumupinimidzo wangu. Ndinozomuakira mhatso isikaperi, naye unozohamba pamberi powakadzodzwa wangu mhera nariini.

³⁶ Weshe uwo unozosara wemhatso yako unozouya nokugwadama kwaari kupuwa zvimare zvesirivha nekachingwa echiti, ‘Ndapota, ndiiseiwo mundau dzomupristi, kuti ndidyewo chigurwa chechingwa.’ ”