1 Sam. 19 - Bhaibheri Rakachena muChindau

Dhavhidha Unotambudzwa ndiSauri

¹ Sauri wakaereketa kunaJonathani mukororo wake, nokuvaranda vake veshe, kuti vauraye Dhavhidha. Asi Jonathani mukororo waSauri waidakara kakurutu ndiDhavhidha.

² Jonathani wakaronzera Dhavhidha echiti, “Sauri, baba angu, vanotsvaka kukuuraya; ndizvo zvino, ndapota, dzingwarire mangwani mangwanani; gara mundau yakafishika, wechidzifisha.

³ Ndinozobuda ndechiema pasinde pababa angu mumunda mwouri, neni ndinozoereketa nababa angu ndiwe; neicho chendinozoona, ndinozokuronzera.”

⁴ Jonathani wakaereketa zvakanaka kunababa ake Sauri ndiDhavhidha, akati kwaari, “Mambo asashaishira muranda wake Dhavhidha; ngokuti iye aazi kukushaishira, nemishando yake yakanaka kwouri;

⁵ ngokuti iye wakaisa kupona kwake mungozi, apo paakauraya muFiristia, naMambo Mwari wakaita kunyisa kukurutu ndiye kwevaIsuraeri veshe. Wakazviona ukadakara; ngenyi zvino unozoshaishira ngazi isina ndaa, ngokuuraya Dhavhidha pasina ndaa?”

⁶ Sauri wakapurutana izwi raJonathani; Sauri wakapika, “Kudai ngezvaanopona Mambo Mwari, aazourawi.”

⁷ Ndizvo Jonathani wakadaidza Dhavhidha, wakamuronzera zveshe izvo zviro. Zvino Jonathani wakaunza Dhavhidha kunaSauri, naye waiya pamberi pake kudai ngemikuwo imweni.

⁸ Kwakaapozve hondo, naDhavhidha wakabuda koorwa navaFiristia. Naye wakavauraya ngokuuraya kukurutu; navo vakamutiza kubva pamberi pake.

⁹ Zvino mweya wakashata wakabva kunaMambo Mwari wakadzaka padera paSauri, apo akagara mumhatso yake nomukhondo munyara yake, apo Dhavhidha airidza chimadangari ngenyara dzake.

¹⁰ Sauri wakatsvaka kubayira Dhavhidha parukumbati ngomukhondo; asi iye wakanzvenga Sauri, naye wakabaya rukumbati ngomukhondo. Dhavhidha wakatiza, akapona ngouhwo usiku.

¹¹ Sauri wakatuma nhumwa kumhatso yaDhavhidha koomurinda, echironga kumuuraya mangwani mangwanani. Mikhari mukadzi waDhavhidha wakamuronzera echiti, “Kudai usikangwariri kupona kwako usiku huno, mangwani unozourawa.”

¹² Ndizvo Mikhari wakadzasa Dhavhidha ngepafasitera; naye wakaenda, akatiza, akapona.

¹³ Mikhari wakatora muedzaniso, akauisa mumubhedhi, akaisa chokutsamira chemamviri embudzi dera kwomubhedhi wake, akaufukidza ngejira.

¹⁴ Naapo Sauri paakatuma nhumwa kutora Dhavhidha, Mikhari wakati, “Unorwara.”

¹⁵ Zvino Sauri wakatumazve nhumwa koona Dhavhidha echiti, “Muunzei kwendiri mumubhedhi kuti ndimuuraye.”

¹⁶ Naapo nhumwa dzapotera, penya, waiyapo muedzaniso mumubhedhi, nechokutsamira chemamviri embudzi dera kwomubhedhi wake.

¹⁷ Sauri wakati kunaMikhari, “Wandichengedzera ngenyi kudai, wechitendera gaa rangu kuti riende?” Mikhari wakapingura Sauri echiti, “Iye wakati kwendiri, ‘Ndirekere ndiende, ndingakuurairenyi?’ ”

¹⁸ Zvino Dhavhidha wakatiza, akapokonyoka; wakauya kunaSamueri kuRama, wakamuronzera zveshe zvakaitwa ndiSauri kwaari. Iye naSamueri vakaenda koogara muNaiothi.

¹⁹ Sauri wakaronzerwa kuti, “Dhavhidha uri Naiothi muRama.”

²⁰ Zvino Sauri wakatuma nhumwa kootora Dhavhidha. Naapo vakaona chiunga chevaprofeti vechiprofeta, naSamueri akaema kuita mukuru padera pavo, Mweya waMwari wakauya padera penhumwa dzaSauri, nadzo dzakaprofetawo.

²¹ Naapo paakaronzerwa Sauri, wakatuma nhumwa dzimweni, nadzo dzakaprofetawo. Sauri wakatumazve nhumwa kwechitatu, nadzo dzakaprofetawo.

²² Zvino iye pachake wakaendawo kuRama. Wakaguma kuchinyuka chikuru chiri muSeku; wakabvunza, akati, “Samueri naDhavhidha vari pari?” Noumweni wakati, “Ringira, vari Naiothi muRama.”

²³ Wakaendayo Naiothi muRama; Mweya waMwari wakauya padera pakewo. Achaenda wakabatwa ndiMweya, akaprofeta metsa akaguma Naiothi muRama.

²⁴ Wakakhumurawo machira ake, akaprofeta pamberi paSamueri. Wakaata pashi ari mutitinini zuva reshe nousiku hweshe uhwo. Ndizvo vakati, “Sauri uri pakati pevaprofetiwo here?”