1 Sam. 18 - Bhaibheri Rakachena muChindau

¹ Naapo Dhavhidha achapedza kuereketa kunaSauri, mwoyo waJonathani wakabatana nomwoyo waDhavhidha, naJonathani wakamuda kudai ngomweya wake wemene.

² Sauri wakamutora ngeiro zuva, aazi kumutendera kuti aende kanyi kumhatso yababa ake.

³ Zvino Jonathani wakaita chitenderano naDhavhidha, ngokuti Jonathani wakamuda kudai ngomweya wake wemene.

⁴ Jonathani wakakhumura chokufuka chaiya pamuiri wake, akachipa kunaDhavhidha, zvokufuka zvake, shoti yake, nouta hwake, nebhande rake.

⁵ Dhavhidha wakabuda, akaenda, akabudirira kweshe kwaaitumwa ndiSauri; kubudikidza ndizvo Sauri wakamuemesa padera pevanhu vehondo, naye waiashirika mukuona kwevanhu veshe, nomukuona kwavaranda vaSauri.

Sauri Unoitira Ndurumwa Dhavhidha

⁶ Naapo vechiuya kanyi, apo Dhavhidha akapetuka kubva koouraya vaFiristia, vakadzi vakabuda kubva mumadhorobha eshe aIsuraeri, vechiemba nokuzvina kooshongana namambo Sauri, nembira, nemakandira nenduyo dzokudakara, nezvokuridza zvokuemba.

⁷ Nevakadzi vakaemba vechipingurana umwe noumweni apo vaipembera, vakati, “Sauri wakauraya makumi emazana, Dhavhidha wakauraya gumi remakumi emazana.”

⁸ Sauri wakatseneka kakurutu, neichi chakaereketwa chakamunyangadza. Naye wakati, “Vaerengera Dhavhidha gumi remakumi emazana, asi kwendiri vaerenga makumi emazana; chiinyi chaanodazve chinopinda izvi, asi hwega umambo?”

⁹ NaSauri wakateya Dhavhidha kubvira ngeiro zuva.

¹⁰ Ngezuva rechimangwani, mweya wakashata wakabva kunaMwari wakauya padera paSauri, naye wakahahamuka ari mukati mwemhatso yake, naapo Dhavhidha echiridza munanzi ngenyara yake kudai ngezvaairidza zuva ngezuva. Sauri waiya nomukhondo wake munyara yake;

¹¹ naSauri wakaposhera mukhondo, ngokuti wakati, “Ndinozobaira Dhavhidha parukumbati.” Asi Dhavhidha wakanzvenga kairi mukuona kwake.

¹² Sauri wakatya Dhavhidha, ngokuti Mambo Mwari waiya naDhavhidha, asi waiya abuda kubva kunaSauri.

¹³ Ndizvo Sauri wakamubvisa kubva pamberi pake, akamuita nduna padera pegumi remazana; naye waibuda nokupotera pamberi pevanhu vehondo.

¹⁴ Dhavhidha waibudirira muzviro zveshe zvaaishanda, ngokuti Mambo Mwari waiya naye.

¹⁵ Naapo Sauri aona kuti wakabudirira kakurutu, wakamutya kakurutu.

¹⁶ Asi veshe vaIsuraeri navaJudha vakamuda Dhavhidha, ngokuti wakabuda nokupotera pamberi nokutungamira pamberi pavo.

Dhavhidha Unoroora Mwanasikana waSauri

¹⁷ Zvino Sauri wakati kunaDhavhidha, “Ringira, dangwe rangu romusikana, Merabhi, ndinozomupa kwouri kuita mukadzi wako; kwega ita wakagwinya wangu, urwe hondo yaMambo Mwari.” Ngokuti Sauri wakati, “Nyara yangu isazomiruka padera pake kurwisana naye, asi nyara dzavaFiristia ngadzimiruke padera pake.”

¹⁸ Dhavhidha wakati kunaSauri, “Ndiri anani inini? Nokupona kwangu kuri chiinyi, nemhuri yababa angu muIsuraeri, kuti inini ndiite mukwambo kunamambo?”

¹⁹ Asi ngomukuwo apo Merabhi mwanasikana waSauri paaisisira kupuwa kunaDhavhidha, wakapuwa kunaAdhirieri, muMehorathi, kuita mukadzi wake.

²⁰ Zvino Mikhari mwanasikana waSauri wakada Dhavhidha. Navo vakaronzera Sauri, nechiro chakamudakadza.

²¹ Sauri wakati, “Ndinozomupa kwaari, kuti aite murau kwaari, nokuti nyara dzavaFiristia dzimiruke padera pake.” Ndizvo Sauri wakati kunaDhavhidha kwechipiri, “Nyamashi unozoita mukwambo wangu.”

²² Sauri wakapanga varanda vake echiti, “Ereketai naDhavhidha ngokufishika mwechiti, ‘Ringirai, mambo unodakara ndiwe, nevaranda vake veshe vanokuda; ndizvo zvino ita mukwambo wamambo.’ ”

²³ Ndizvo varanda vaSauri vakaereketa awo mazwi munzee dzaDhavhidha. NaDhavhidha wakati, “Chinooneka kwomuri chiri chiro chakareruka here kuita mukwambo wamambo, mwechiona kuti ndiri murombo usikaziikanwi hake?”

²⁴ Varanda vaSauri vakamuronzera vechiti, “Izvi ndizvo zvinoronza Dhavhidha.”

²⁵ Zvino Sauri wakati, “Munozoronza izvi kunaDhavhidha, ‘Mambo aadi kutheyerwa chuma, asi unoda zana remakanda emafumho evaFiristia, kuunzidzira magaa amambo.’ ” Zvino Sauri wakapinimidza kuita kuti Dhavhidha aurawe ngavaFiristia.

²⁶ Naapo varanda vake vakaronzera Dhavhidha mazwi aya, zvakadakadza Dhavhidha kuita mukwambo wamambo. Naapo mazuva asati apera,

²⁷ Dhavhidha wakamiruka, akaenda, iye nevanhu vake, vakauraya mazana mairi evaFiristia. NaDhavhidha wakaunza makanda emafumho evaFiristia, navo vakaaunza aerengwa aperera kunamambo, kuti iye aite mukwambo wamambo. Sauri wakamupa mwanasikana wake Mikhari kuita mukadzi wake.

²⁸ Asi apo Sauri wakaona nokuzia kuti Mambo Mwari waiya naDhavhidha, nokuti Mikhari mwanasikana wake wakamuda,

²⁹ Sauri wakapinda kutya Dhavhidha kakurutu. Ndizvo Sauri wakaangirira kuita gaa raDhavhidha.

³⁰ Zvino nduna dzevaFiristia dzakabuda koorwa; nenguva dzeshe dzevaibuda, Dhavhidha wakabudirira kupinda varanda veshe vaSauri; ndizvo zina rake rakaremeredzwa kakurutu.