1 Sam. 17 - Bhaibheri Rakachena muChindau

Goriathi Unoambira VaIsuraeri

¹ Zvino vaFiristia vakaunganidza hondo dzavo kurwa; vakaungana paSokho raJudha, vakaaka matende pakati peSokho naAzeka, muEfesidhamimu.

² NaSauri navanhu vakaungana, vakaemesa matende avo mubani raEra, vakanasirira kurwa navaFiristia.

³ VaFiristia vakaema pamutunhu parutii rumwe, nevaIsuraeri vakaema pamutunhu parutii rumweni, pane bani pakati pavo.

⁴ Naapo ngwazi yevaFiristia yakabuda kubva mukamba, zina rayo raizwi Goriathi weGathi, kureba kwayo kwaida kuita mamitha matatu.

⁵ Nayo yaiya nechiqoko chethusi musoro rayo, nayo yakapfeka bhachi regangautare; nokurema kwebhachi kwaida kuita makhirogramu makumi mashanu nemanomwe ethusi.

⁶ Nayo yaiya nezvihlangu zvethusi mumirenje yayo, nekachihlangu kethusi pakati pemakhadza ayo.

⁷ Chibato chomukhondo wayo chaiya chakadai ngomuti womuruki, nomuromo womukhondo wayo wairema makhirogramu manomwe outare; nomutwari wayo wechihlangu wakaenda pamberi payo.

⁸ Nayo yakaema yechidaidzira kuhondo dzaIsuraeri, yechiti kwevari, “Mwauya ngenyi koorwa? Ndiri muFiristia neimwimwi amuri varanda kunaSauri here? Dzitsanangurirenyi munhu wenyu kuti adzake kwendiri.

⁹ Kuti echikona kurwa neni nokundiuraya, zvino tinozoita varanda venyu; asi kuti ndikamunyisa nokumuuraya, zvino imwimwi munozoita varanda vedu nokutishandira.”

¹⁰ NomuFiristia wakati, “Ndinoshoora hondo dzaIsuraeri nyamashi! Ndipei munhu kuti tirwe.”

¹¹ Naapo Sauri nevaIsuraeri veshe vazwa mazwi awo omuFiristia, vakapera simba nokutya kukurutu.

Dhavhidha Ari muKamba yaSauri

¹² Zvino Dhavhidha waiya mukororo womuEfrathi weBhetherehema raJudha, zina rake raizwi Jesi, uwo waiya nevakororo vasere. Jesi waiya aamusharuka ngamazuva aSauri.

¹³ Vakororo vakuru vaJesi vatatu vakateera Sauri kuhondo; mazina evakororo vatatu vakaenda kuhondo vaiya Eriabhi dangwe, nowechipiri sure kwake Abhinadhabhi, nowechitatu Shama.

¹⁴ Dhavhidha waiya mudoko wavo veshe; vatatu vakuru vakateera Sauri.

¹⁵ Asi Dhavhidha wakaenda nokupetuka kubva kunaSauri koousha makwai ababa ake muBhetherehema.

¹⁶ Mazuva makumi marongomuna muFiristia wakakwedzera kutora ndau yake mangwanani nemadeekoni.

¹⁷ Jesi wakati kunaDhavhidha mukororo wake, “Torera vakoma vako efa rekoroni yakakangwa, nezvingwa izvi gumi, nokurumba nazvo kukamba kunevakoma vako.

¹⁸ Zve, twara idzi chizi gumi kunenduna yegumi remazana. Uringire kugara kwavakoma vako kuti kwadini, wechitora mhete yavo.”

¹⁹ Zvino Sauri navo, navanhu veshe vaIsuraeri vaiya muBani raEra, vechirwa nevaFiristia.

²⁰ Dhavhidha wakafumira kumuka mangwanani maishi, wakasiya makwai nomuushi, wakatora zviro, akaenda, kudai ngezvaaiya apanga Jesi. Wakaguma pakamba, apo hondo yaiya yechienda koorwa, vechidaidzirwa hondo.

²¹ VaIsuraeri nevaFiristia vaikwedzerana koorwa hondo nehondo.

²² NaDhavhidha wakasiya mutwaro wake munyara yomungwariri wemitwaro, wakarumba kupinda muhondo, wakauya, akachingamidza vakoma vake.

²³ Naapo echiereketa navo, kwakauya ngwazi yomuFiristia weGathi kubva kuhondo dzevaFiristia, zina rake ndiGoriathi, naye wakaereketa mazwi amwewo aaimboereketa; naDhavhidha wakamuzwa.

²⁴ Naapo vanhu vaIsuraeri veshe pevakaona munhu uwo, vakamutiza, vakatya kakurutu.

²⁵ Vamuna vaIsuraeri vakati, “Mwaona here uyu munhu wauya? Ngegwinyiso wauya kooshoora hondo yaIsuraeri. Mambo unozomupfumisa kakurutu kunyazwi ndiani unomuuraya, naye unozomupa mwanasikana wake, nokusunhurika kwemhatso yababa ake muIsuraeri.”

²⁶ Dhavhidha wakaereketa kuvanhu vaiya vakaema pasinde pake echiti, “Chiinyi chinozoitwa kunomunhu unouraya muFiristia uyu, nokudusa kushoorwa kwaIsuraeri? Ngokuti ndiani uyu muFiristia usikazi kuchekwa, kuti ashoore hondo yaMwari unopona?”

²⁷ Vanhu vakamupingura ngenjira imweyo, “Ndizvo kunozoitwa kudaro kunomunhu unomuuraya.”

²⁸ Eriabhi mukoma wake mukuru wakazwa kuereketa kwake nevanhu; noushungu hwaEriabhi hwakabaka kunaDhavhidha. Wakati, “Wakadzakirenyi uno? Wakasiya nani makwai ako mashomani mushango? Ndinozia kudzikudza kwako nokushata kwomwoyo wako, ngokuti wadzaka uno kuona hondo.”

²⁹ Dhavhidha wakati, “Ndaitenyi zvino? Kwaiya kubvunza kwega.”

³⁰ Wakamufuratira akaringira kunoumweni, wakaereketa mazwi amwewo; nevanhu vakamupingura kudai ngokutanga.

³¹ Naapo mazwi akaereketwa ndiDhavhidha azwika, vakaaronzazve pamberi paSauri; naye wakamudaidza.

³² Dhavhidha wakati kunaSauri, “Kusazoapo naumwe mwoyo womunhu unopera simba ndiye; muranda wako unozoenda koorwa nomuFiristia uyu.”

³³ Sauri wakati kunaDhavhidha, “Iwewe aune simba rokuenda koorwa nouyu muFiristia; ngokuti uri mudoko, naye munhu wehondo kubvira muutsva hwake.”

³⁴ Asi Dhavhidha wakati kunaSauri, “Muranda wako waiausha makwai ababa ake; kunyazwi kwakaguma mhondoro nebheya koobata hwai kubva mumutanga,

³⁵ ndakaiteera, ndikaichaya ndikabvuka gwai kubva pamuromo wayo; kudai yaindirwisa, ndaibata ngomuhlathi, ndaichaya, ndaiuraya.

³⁶ Muranda wako wakauraya zveshe, mhondoro nebheya; uyu muFiristia usikazi kuchekwa unozodai ngechimwe chazvo, ngokuti washoora hondo dzaMwari unopona.”

³⁷ Dhavhidha wakatizve, “Mambo Mwari uwo wakandinunura kubva munyara dzemhondoro nokunyara dzebheya, unozondinunurazve kubva kunyara youyu muFiristia.” Ndizvo Sauri wakati kunaDhavhidha, “Enda, Mambo Mwari ngaanewe.”

³⁸ NaSauri wakapfekedza Dhavhidha ngezvokurwa zvake, wakaisa chiqoko chethusi pasoro pake; wakamupfekedzazve bhachi regangautare.

³⁹ NaDhavhidha wakapakatira shoti yaSauri padera pezvokurwa zvake, wakaedza kuhamba, akakorera, ngokuti waiya asati azvirovedzera. Zvino Dhavhidha wakati kunaSauri, “Andikoni kuhamba neizvi, ngokuti andizi kuzvirovedzera.” Ndizvo Dhavhidha wakazvikhumura.

⁴⁰ Zvino wakatora ndonga yake munyara mwake, wakadzitsanangurira mapuwe mashanu akaserera kubva mumufuya, wakaaisa mumukwama womuushi waaiya nawo, waiya wakadai ngomuteya; nechimvii chake chaiya munyara yake; naye wakakwedzera kunomuFiristia.

Dhavhidha Unonyisa Goriathi

⁴¹ NomuFiristia wakakwedzera kunaDhavhidha, nomunhu waiya akatwara chihlangu chake wakahamba pamberi pake.

⁴² Naapo muFiristia paakaringira nokuona Dhavhidha, wakamushoora, ngokuti waiya achimudoko, mutsvuku, nehope yaiya yakanaka.

⁴³ MuFiristia wakati kunaDhavhidha, “Inini ndiri imbwa here hounouya kwendiri nendonga?” NomuFiristia wakatuka Dhavhidha ngezvimwari zvake.

⁴⁴ MuFiristia wakati kunaDhavhidha, “Uya pano, neni ndinozopa muiri wako kushiri dzomudenga nemhuka dzomushango.”

⁴⁵ Asi Dhavhidha wakati kunomuFiristia, “Iwewe unouya kwendiri uneshoti nomukhondo nechihlangu; asi inini ndinouya kwouri ngezina raMambo Mwari wehondo, Mwari wehondo dzaIsuraeri, uwo wewakashoora.

⁴⁶ Nyamashi Mambo Mwari unozokupira munyara dzangu, neni ndinozokuchaya nokugura soro rako; nyamashi ndinozopa miiri yevaFiristia vehondo vakafa kuneshiri dzomudenga, nokumhuka dzomushango; kuti nyika dzeshe dzizie kuti uripo Mwari muIsuraeri,

⁴⁷ nokuti chiunga cheshe ichi chizie kuti Mambo Mwari aaponesi ngeshoti nokuti ngomukhondo; ngokuti kurwa ngokwaMambo Mwari, naye unozokupira munyara dzedu.”

⁴⁸ Naapo muFiristia amiruka nokukwedzera pasinde kooshongana naDhavhidha, Dhavhidha wakakasira, wakarumba kunehondo kushongana nomuFiristia.

⁴⁹ Dhavhidha wakaisa nyara yake mumbudu yake, akatoremwo buwe, akariposhera, akafura muFiristia pahuma yake; buwe rakanzvaira muhuma yake, naye wakawa ngehope yake pamavhu.

⁵⁰ Ndizvo Dhavhidha wakanyisa muFiristia ngechimvii nebuwe, akafura muFiristia nokumuuraya; mwaiya musina shoti munyara yaDhavhidha.

⁵¹ Zvino Dhavhidha wakarumba, akaema padera pomuFiristia, akatora shoti yake, wakaishwamura mumakara ayo, akamuuraya; zvino wakagura soro rake ndiyo. Naapo vaFiristia vaona kuti ngwazi yavo yafa, vakatiza.

⁵² Vanhu vehondo yaIsuraeri nevaJudha vakamiruka, vakadaidzira, nokurumbirira vaFiristia metsa kuguma Gathi nokumisiwo yaEkironi. Naavo vakaremadzwa vevaFiristia vakawa munjira yaienda Shaaraimu, metsa kuguma Gathi naEkironi.

⁵³ VaIsuraeri vakapetuka kubva koorumbirira vaFiristia, vakachakata matende avo.

⁵⁴ Dhavhidha wakatora soro romuFiristia, akariunza Jerusarema; asi wakaisa zvokurwa ndizvo zvaGoriathi mutende rake.

Dhavhidha Unoendeswa kunaSauri

⁵⁵ Naapo Sauri paakaona Dhavhidha echienda koorwa nomuFiristia, wakati kunaAbhina, nduna yehondo, “Abhina, iri jaha mukororo waani?” Abhina wakati, “Kudai ngezvounopona mweya wenyu, A mambo, andimuzii.”

⁵⁶ Mambo wakati, “Bvunza kuti jaha iri mukororo waani?”

⁵⁷ Naapo Dhavhidha apetuka kubva koorwa nomuFiristia, Abhina wakamuunza pamberi paSauri nesoro romuFiristia munyara yake.

⁵⁸ Sauri wakati kwaari, “Uri mukororo waani, iwewe jaha?” NaDhavhidha wakapingura, “Ndiri mukororo womuranda wako Jesi muBhetherehema.”