1 Sam. 16 - Bhaibheri Rakachena muChindau

Dhavhidha Unodzodzwa Kuita Mambo

¹ Mambo Mwari wakati kunaSamueri, “Unozochema Sauri mukuwo wakadini? Ndakamuramba kuti asachaita mambo padera paIsuraeri. Dzadza runyanga rwako ngemafuta, uende; ndinozokutuma kunaJesi, muBhetherehema, ngokuti ndakadzionera mambo pakati pevakororo vake.”

² Samueri wakati, “Ndingaita maenderenyi? Kudai Sauri echizwa unozondiuraya.” NaMambo Mwari wakati, “Tora tsiru, uende naro wechiti, ‘Ndauya koopira mudiro kunaMambo Mwari.’

³ Wechidaidza Jesi kumudiro uyu, neni ndinozokupangidzira icho chounozoita; newe unozondidzodzera uwo wendinozokuronzera.”

⁴ Samueri wakaita zvaakapangwa ndiMambo Mwari, wakauya kuBhetherehema. Vakuru vedhorobha vakauya kooshongana naye vechihuta, vakati, “Unouya mukunyarara here?”

⁵ Naye wakati, “Mukunyarara; ndauya koopira mudiro kunaMambo Mwari; dzichenesei pachenyu, muuye neni kumudiro.” Naye wakachenesa Jesi nevakororo vake, wakavadaidza kumudiro.

⁶ Naapo vauya, wakaringira Eriabhi, akati, “Ngegwinyiso wakadzodzwa waMambo Mwari ndiye uri pamberi paMambo Mwari.”

⁷ Asi Mambo Mwari wakati kunaSamueri, “Usaringira hope yake, nokuti kureba kwomutumba wake, ngokuti ndakamuramba; ngokuti Mambo Mwari aaringiri kudai ngokuringira kwomunhu; munhu unoringira chiemo chokubanze, asi Mambo Mwari unoringira mumwoyo.”

⁸ Zvino Jesi wakadaidza Abhinadhabhi, wakaita kuti apinde pamberi paSamueri. Naye wakati, “Mambo Mwari aazi kutsanangura uyu.”

⁹ Zvino Jesi wakaita kuti Shama apindewo ndipo. Naye wakati, “Mambo Mwari aazi kutsanangurazve uyu.”

¹⁰ Jesi wakaita kuti vakororo vake vanomwe vapinde pamberi paSamueri. NaSamueri wakati kunaJesi, “Mambo Mwari aazi kutsanangura naumwe weava.”

¹¹ NaSamueri wakati kuna Jesi, “Vana vako vari pano veshe here?” Naye wakati, “Uripo mudoko wacho yaamho, asi unousha makwai.” NaSamueri wakati kunaJesi, “Tuma munhu, umutore; ngokuti atizogari pashi metsa auye pano.”

¹² Wakatuma munhu, akamuunza mukati. Zvino waiya mutsvuku, anemadziso akanaka, naye akanaka kuringirika. Mambo Mwari wakati, “Miruka, umudzodze; ngokuti ndiye uyu.”

¹³ Zvino Samueri wakatora runyanga rwemafuta, akamudzodza pamberi pevakoma vake; noMweya waMambo Mwari wakauya padera paDhavhidha kubvira ngeiro zuva kuenda mberi. Zvino Samueri wakamiruka, akaenda Rama.

¹⁴ Zvino Mweya waMambo Mwari wakabva kunaSauri, nomweya wakashata wakabva kunaMambo Mwari wakamutambudza.

¹⁵ Nevaranda vaSauri vakati kwaari, “Ringira zvino, mweya wakashata unobva kunaMwari unokutambudza.

¹⁶ Mambo wedu ngaapange varanda vake vari pamberi pako, kutsvaka munhu, uwo uri ngwazi yokuridza minanzi; naapo mweya wakashata unobva kunaMwari wauya padera pako, iye unozoridza ngenyara yake, newe unozoita nane.”

¹⁷ Ndizvo Sauri wakati kuvaranda vake, “Nditsvakirei zvino munhu ngwazi ungaridza zvakanaka, mumuunze kwendiri.”

¹⁸ Umwe wevaranda vadoko wakapingura, akati, “Ringira, ndaona mukororo waJesi muBhetherehema, ngwazi yokuridza, munhu unesimba nokushinga, munhu wehondo, wakangwara mukuereketa, nomunhu unoringirika, naMambo Mwari unaye.”

¹⁹ Ndizvo Sauri wakatuma nhumwa kunaJesi, akati, “Nditumire Dhavhidha mukororo wako, uwo unousha makwai.”

²⁰ Jesi wakatora mbongoro inomutwaro wezvingwa, nembudu yevhini, nechimbudzana, akazvitumira naDhavhidha mukororo wake kunaSauri.

²¹ Dhavhidha wakauya kunaSauri, akaema pamberi pake. Sauri wakamuda kakurutu, wakamuita mutwari wechihlangu chake.

²² Sauri wakatuma izwi kunaJesi echiti, “Tendera Dhavhidha kuema pamberi pangu, ndapota, ngokuti unodikanwa kwendiri.”

²³ Naapo mweya wakashata unobva kunaMwari waiya padera paSauri, Dhavhidha wakatora munanzi, akaridza ngenyara yake, naSauri wakadetserwa, naye waizoita nane, nomweya wakashata waibva mwaari.