1 Sam. 15 - Bhaibheri Rakachena muChindau

Sauri Unorwa Hondo neVaAmareki

¹ Samueri wakati kunaSauri, “Mambo Mwari wakandituma kuti ndikudzodze kuita mambo padera pevanhu vake, vaIsuraeri; ndizvo zvino purutana mazwi aMambo Mwari.

² Unoronza izvi Mambo Mwari wehondo, ‘Ndinozoorora vaAmareki ngendaa yezvevakaita kurambira vaIsuraeri njira, apo pevakabuda kubva Egipite.

³ Enda zvino urwise Amareki, nokuparadza yaamho zveshe zvevanazvo; usakungurira naumwe, asi uraya veshe, vamuna nevakadzi, vana, chiya nevachabva kubarwa, n'ombe nemakwai, makamera nezvimbongora.’ ”

⁴ Ndizvo Sauri wakaunganidza vanhu pamwepo, wakavaerenga muTheraimu, mazana mairi emakumi emazana, (200,000) evarwi vehondo vanohamba ngetsoka, negumi remakumi emazana (10,000) evanhu vaJudha.

⁵ Sauri wakauya kudhorobha raAmareki, akavahwarira mubani.

⁶ NaSauri wakati kuvaKheni, “Endai, ibvai! Budai kubva pakati pevaAmareki, kuti ndisazomuuraya pamwepo navo; ngokuti mwakaitira nyasha vana vaIsuraeri veshe apo pevakabuda kubva muEgipite.” Ndizvo vaKheni vakabuda kubva pakati pevaAmareki.

⁷ Sauri wakanyisa vaAmareki, kubvira Havhira metsa kuguma Shuri riri kumabvazuva eEgipite.

⁸ Wakatora Agagi mambo wevaAmareki echizwa asi wakauraya vanhu veshe ngeshoti.

⁹ Sauri nevanhu vehondo vakaponesa Agagi, makwai akanaka, n'ombe dzakanaka nedzakakora, nevana vemakwai, neizvo zveshe zvaiya zvakanaka, vasikazi kuuraya zveshe; asi izvo zvaiya zvakaonda nokushooreka, zveshe vakazviparadza yaamho.

Sauri Unorambwa Kuita Mambo

¹⁰ Izwi raMambo Mwari rakauya kunaSamueri rechiti,

¹¹ “Ndinosvipa mwoyo kuti ndakaemesa Sauri kuita mambo; ngokuti wakapauka kubva mukunditeera, naye aazi kuteera mipango yangu.” Samueri wakashatirwa, naye wakachema kunaMambo Mwari usiku hweshe.

¹² Samueri wakamuka mangwanani kooshongana naSauri. Samueri wakaronzerwa kuti, “Sauri waenda kuKharmeri, iyo kwaakadziitira chithombi, wakapauka, akapinda kudzaka Girigari.”

¹³ Naapo Samueri wakauya kunaSauri, Sauri wakati kwaari, “Mambo Mwari ngaakufumise; ndakaita mipango yaMambo Mwari.”

¹⁴ Asi Samueri wakati, “Zvino uku kurira kwemakwai kunoronzenyi munzee dzangu? Nokurirazve kwen'ombe kwendinozwa?”

¹⁵ Sauri wakati, “Vakabva nadzo kuvaAmareki; ngokuti vanhu vakangwarira dzakapinda kunaka dzemakwai, nedzen'ombe, kuita mudiro kunaMambo Mwari, Mwari wako; asi dzakasara takauraya dzeshe.”

¹⁶ Zvino Samueri wakati kunaSauri, “Nyarara, neni ndinozokuronzera icho charonza Mambo Mwari kwendiri usiku huno.” Naye wakati kwaari, “Ereketa hako.”

¹⁷ Samueri wakati, “Kunyazwi iwewe uchakatsonga mukuona kwako, auzi kuemeswa kuita mukuru wemadzinza aIsuraeri here? Mambo Mwari wakakudzodza kuita mambo padera paIsuraeri.

¹⁸ Mambo Mwari wakakutuma, akati, ‘Enda, uparadze vashaishi vaAmareki, nokurwisana navo metsa vapedzwa.’

¹⁹ Ngenyi zvino usikazi kupurutana izwi raMambo Mwari? Ngenyi wakabvuka zvakachakatwa, ukaita zvakashata mukuona kwaMambo Mwari?”

²⁰ Sauri wakati kunaSamueri, “Eya, ndakapurutana izwi raMambo Mwari, ndikaenda ngenjira yaakandituma Mambo Mwari, ndikaunza Agagi mambo wavaAmareki nokuparadza kakurutu vaAmareki.

²¹ Asi vanhu vakatora zvakachakatwa, makwai, nen'ombe, zvakapindisisa kunaka zveizvo zvakaemeserwa kuparadzwa kakurutu, kuita mudiro kunaMambo Mwari, Mwari wako muGirigari.”

²² NaSamueri wakati, “Mambo Mwari unokudakara kumidiro yokupisha, nemidiro kupinda kupurutana izwi raMambo Mwari here? Ngegwinyiso kupurutana kwakapinda kunaka kunemidiro, nokupurutana, kunemafuta emagondohwe.

²³ Ngokuti kumukira kwakadai ngechishaishi chouroyi, nokusikazwa kwakadai ngokushaisha kwokudira miedzaniso. Ngokuti iwewe wakaramba izwi raMambo Mwari, iye wakakurambawo kuti usachaita mambo.”

²⁴ Sauri wakati kunaSamueri, “Ndakashaisha, ngokuti ndakapaukisa mipango yaMambo Mwari nemazwi ako; ngokuti ndakatya vanhu, ndikapurutana mazwi avo.

²⁵ Ndizvo zvino, ndapota, rekerera kushaisha kwangu, wechipetukazve neni, kuti ndidire Mambo Mwari.”

²⁶ Samueri wakati kunaSauri, “Andizopetuki newe, ngokuti iwewe wakaramba izwi raMambo Mwari, naMambo Mwari wakakuramba kuti usachaita mambo padera paIsuraeri.”

²⁷ Naapo Samueri atenderuka kuenda, Sauri wakabata mupendero wenguwe yake, nayo yakabauka.

²⁸ NaSamueri wakati kwaari, “Mambo Mwari wagura umambo hwaIsuraeri nyamashi kubva kwouri, wahupa kumuakirwana wako, uwo wakapinda kunaka kuneiwewe.

²⁹ Uyezve Uthende hwaIsuraeri auzonyepi nokuti kutenderuka; ngokuti aari munhupi kuti atenderuke.”

³⁰ Zvino Sauri wakati, “Ndashaisha; asi ndiremeredze zvino pamberi pevakuru vevanhu vangu, napamberi pevaIsuraeri, wechipetukazve neni kuti ndidire Mambo Mwari, Mwari wako.”

³¹ Ndizvo Samueri wakapetuka kuenda naSauri; naSauri wakadira Mambo Mwari.

³² Zvino Samueri wakati, “Unza kwendiri Agagi mambo wevaAmareki.” NaAgagi wakauya kwaari ngokudakara. Agagi wakati, “Ngegwinyiso kurwadziwa kwokufa kwapera.”

³³ Asi Samueri wakati, “Kudai ngeshoti yako yakaita kuti vakadzi vasaita vana, ndizvo mai ako avazoiti nemwana pakati pevakadzi.” NaSamueri wakagura Agagi kuita zvigurwa pamberi paMambo Mwari muGirigari.

³⁴ Zvino Samueri wakaenda Rama; naSauri wakakwira kumhatso yake kuGibhea raSauri.

³⁵ Samueri aazi kuchazoonazve Sauri metsa pazuva rokufa kwake, asi Samueri wakachema Sauri. Mambo Mwari wakadzishoora kuti waiya akaemesa Sauri kuita mambo padera paIsuraeri.