1 Sam. 14 - Bhaibheri Rakachena muChindau

Kushinga kwaJonathani

¹ Ngezuva rimweni Jonathani mukororo waSauri wakati kunejaha raitwara chihlangu chake, “Uya, ngatiende kukamba yechikwata chevaFiristia, iyo iri kurutii rumweni.” Asi aazi kuronzera baba ake.

² Sauri waigara kumagumo eGibhea pashi pomuti womuphomegraniti waiya muMigroni; nevanhu vehondo vaiya naye vaida kukwana mazana matanhatu (600).

³ NaAhija mukororo waAhithubhi, mukoma waIkhabhodhi, mukororo waFinehasi, mukororo waEri, mupristi waMambo Mwari muShiro wakapfeka efodhi. Zvino vanhu avazi kuzia kuti Jonathani waiya aenda.

⁴ Pakati pemikana apo paakatsvaka Jonathani kuenda ndipo kuchikwata chevaFiristia, paiya nebuwe kurutii rumwe, nebuwe rakapinza kurutii rumweni; nezina rerimwe rawo raizwi Bhozezi, nezina rerimweni raizwi Sene.

⁵ Muromo werimweni waiya wakaema dera pasinde peMikhimashi, nebuwe rimweni ngokubani raiya rakaema pasinde peGebha.

⁶ Jonathani wakati kunejaha raitwara chihlangu chake, “Uya, ngatiende kuchikwata chaava vasikazi kuchekwa; pamweni Mambo Mwari ungatishandira; ngokuti akuna chiro chingarambidza kunaMambo Mwari kuponesa ngavazhinji nokuti ngavashomani.”

⁷ Mutwari wechihlangu chake wakati kwaari, “Ita zveshe zviri mumwoyo mwako. Inini ndinewe, kudai ngomweya wako.”

⁸ Zvino Jonathani wakati, “Zvino, tinozoambuka kuneavo vanhu, tinozodzionisa kwavari.

⁹ Kuti avo vanhu vati kwetiri, ‘Garirai metsa tiuye kwomuri,’ ndizvo tinozoema takanyarara mundau yedu, atizoendi kwevari.

¹⁰ Asi kuti vati, ‘Uyai kwetiri,’ ndizvo tinozoenda; ngokuti Mambo Mwari wavapira munyara dzedu. Icho chinozoita chioniso kwetiri.”

¹¹ Ndizvo veshe vairi vakadzionisa pachavo kuchikwata chevaFiristia; nevaFiristia vakati, “Ringirai, vaHebheru vabuda mumirindi umwo mwavaiya vakadzifisha.”

¹² Vanhu vechikwata vakapingura Jonathani nomutwari wechihlangu chake, vakati, “Uyai kwetiri, nesu tinozokupangidzira chiro.” Jonathani wakati kumutwari wechihlangu chake, “Nditeere, ngokuti Mambo Mwari wavapira munyara dzavaIsuraeri.”

¹³ Zvino Jonathani wakakwira ngokutamanda ngemaoko netsoka, nomutwari wechihlangu chake echiteera sure kwake. VaFiristia vakawa pamberi paJonathani; nomutwari wechihlangu chake wakavauraya ngesure kwake.

¹⁴ Noukwo kuuraya kwokutanga kwaakaita Jonathani nomutwari wechihlangu chake, vakauraya vanhu makumi mairi, mukati mwendau yaiya inenharauko yeekha.

¹⁵ Kwaiyapo kuhuta mukamba murubaya, napakati pevanhu veshe; chikwata cheshe nevachakati vakahutawo, nenyika yakazungunyika; ndizvo kwaiya kuri kuzungunyika kukurutu.

Kunyiswa kweVaFiristia

¹⁶ Varindi vaSauri muGibhea raBhenjamini vakaringira, vakaona mbungano yechingarangaka, vechienda apo naapo.

¹⁷ Zvino Sauri wakati kuvanhu vaiya naye, “Erengai zvino, muone kuti ndiani waenda kubva kwetiri.” Naapo vaerenga, vakaona Jonathani nomutwari wechihlangu chake vaiya vasipo.

¹⁸ Sauri wakati kuna Ahija, “Unza pano bhokisi rechitenderano chaMwari.” Ngokuti ngenguva iyo bhokisi rechitendero chaMwari raiya nevana vaIsuraeri.

¹⁹ Naapo Sauri achaereketa kumupristi, bope raiya pakati pehondo yevaFiristia rakaangira kukura. NaSauri wakati kumupristi, “Pfinyisa muoko wako.”

²⁰ Zvino Sauri nevanhu veshe vaiya naye vakaungana, vakaenda koorwa; vakaona vaFiristia vechirwisana ngeshoti pachavo, kwaiyapo kukangaidzwa kukurutu.

²¹ Zvino vaHebheru vaigara nevaFiristia karetu, avo vakaenda navo mukamba kubva kunyika yaitendenedza, navowo vakapetuka, vakabatana nevaIsuraeri avo vaiya naSauri naJonathani.

²² Ndizvo vanhu veshe vaIsuraeri vaiya vakadzifisha munyika yemitunhu yaEfuremu, vakazwa kuti vaFiristia vatiza, navowo vakavarumbirira nokuvarwisa.

²³ Ndizvo Mambo Mwari wakaponesa vaIsuraeri ngeiro zuva. Kurwisana kwakapinda kuenda mberi kweBhethiavheni.

Zvakaitika Kurwisana Kwapera

²⁴ Vanhu vaIsuraeri vakatambudzika ngeiro zuva ngokuti Sauri waiya apikira vanhu mhiko echiti, “Ngaatukwe munhu uwo unodya kudya kusati kwaita madeekoni, metsa ndaona kuunzidzirwa padera pemagaa angu.” Ndizvo akuna munhu wehondo naumwe wakaraira chokudya.

²⁵ Varwi vehondo veshe venyikayo vakaguma kugwasha; vakaona uchi pamavhu.

²⁶ Naapo vanhu vachapinda mugwasha, vakaona uchi hwaidonha pashi; asi apana munhu wakahudya, ngokuti vanhu vakatya mhiko.

²⁷ Asi Jonathani aazi kuzwa apo baba ake paakapanga vanhu vehondo ngemhiko; ndizvo wakatambanudza ndonga yaiya munyara yake, akainyika mumisoro youchi, naye wakadya; namadziso ake akabeurwa.

²⁸ Ndizvo umwe wevanhu vehondo wakapingura, akati, “Baba ako vakapangisisa vanhu ngemhiko vechiti, ‘Ngaatukwe munhu uwo unodya kudya nyamashi.’ Ndizvo vanhu vehondo vakademera.”

²⁹ Zvino Jonathani wakati, “Baba angu vakatambudza nyika; wonai, ndapota, kubeurwa kwaakaita madziso angu, ngokuti ndakaraira zvishomani uhu uchi.

³⁰ Akungapindi kunaka here kudai vanhu vehondo vadya nyamashi zveizvo zvakachakatwa zvavaona kubva kumagaa avo? Ngokuti zvino kwaizoapo kuurawa kwakapinda kukura pakati pevaFiristia.”

³¹ Vapedza kunyisa vaFiristia ngeiro zuva kubva Mikhimashi kuguma Aijaroni, vanhu vehondo vakademera kakurutu.

³² Ndizvo vanhu vakabvuka zvakachakatwa, vakatora makwai, n'ombe, nemakonyana, vakazviuraira pashi; vanhu vakadya zvinengazi.

³³ Ndizvo vakaronzera Sauri vechiti, “Ringira, vanhu vanoshaisha kunaMambo Mwari, ngokudya zvinengazi.” Naye wakati, “Mwapauka; mburumbudzai buwe guru pamberi pangu nyamashi.”

³⁴ Sauri wakati, “Dziparadzirei pachenyu pakati pevanhu vehondo, mwechiti kwevari, ‘Ndiunzirenyi munhu weshe kabi yake, nomunhu weshe gwai rake, mwechizviuraya, mwechidya; musikashaishi kunaMambo Mwari ngokudya zvinengazi.’ ” Ndizvo vanhu vehondo veshe vakaunza munhu weshe kabi yake ngouhwo usiku, vakazviurayapo.

³⁵ NaSauri wakaaka arita kunaMambo Mwari, raiya arita rokutanga raakaaka kunaMambo Mwari.

³⁶ NaSauri wakati, “Ngatiteere vaFiristia muusiku, tivachakate metsa mangwani mangwanani; tisasiya munhu naumwe wavo.” Vakati, “Ita izvo zvinokunakira.” Asi mupristi wakati, “Ngatikwedzere pasinde naMwari pano.”

³⁷ Ndizvo Sauri wakakumbira kupanga kwaMwari. “Ndingateera vaFiristia here? Unozovapira munyara dzevaIsuraeri here?” Asi aazi kumupingura ngeiro zuva.

³⁸ Sauri wakati, “Kwedzerai pano, imwimwi vakuru vevanhu; ngatitsvake tione kuti kwabva pari kushaisha uku nyamashi.

³⁹ Ngokuti kudai ngezvaanopona Mambo Mwari, uwo unoponesa Isuraeri, kunyazwi kuri munaJonathani mukororo wangu, ngegwinyiso unozofa.” Asi paiya pasina munhu naumwe pakati pevanhu veshe wakamupingura.

⁴⁰ Ndizvo wakati kunevaIsuraeri veshe, “Emai kurutii rumwe, inini naJonathani mukororo wangu tinozoema kurutii rumweni.” Vanhu vakati kunaSauri, “Ita icho chinokunakira.”

⁴¹ Ndizvo Sauri wakati kunaMambo Mwari, Mwari waIsuraeri, “Pangidzira ngemabhigidha anegwinyiso.” Ndizvo mabhigidha akabata Sauri naJonathani, asi vanhu vakapembedzwa.

⁴² Zvino Sauri wakati, “Itai mabhigidha pakati pangu naJonathani mukororo wangu.” NaJonathani wakabatwa.

⁴³ Ndizvo Sauri wakati kunaJonathani, “Ndironzere icho chowaita.” NaJonathani wakamuronzera, akati, “Ndakaraira zviuchi zvishomani kumagumo kwendonga yaiya munyara yangu. Inini ndiri pano ngandife.”

⁴⁴ Sauri wakapingura, akati, “Mwari ngaaite kudaro nokwakapindisisa kwendiri; ngokuti ngegwinyiso unozofa, Jonathani.”

⁴⁵ Zvino vanhu vakati kunaSauri, “Jonathani unozofa here, uwo wakaita ruponeso urwu rukuru muIsuraeri? Haiwa! Mwari asazotenda! Kudai ngezvaanopona Mambo Mwari, akuna nebvudzi narimwe resoro rake rinozowa pashi; ngokuti washanda naMwari nyamashi.” Ndizvo vanhu vakaponesa Jonathani naye aazi kufa.

⁴⁶ Ndizvo Sauri wakarekera kuteera vaFiristia; navaFiristia vakaenda kundau yavo.

Kutonga kwaSauri neMhuri yake

⁴⁷ Sauri atora umambo hwaIsuraeri, wakarwa nemagaa ake kundau dzeshe, vaMoabhi, vaAmoni, vaEdhomu, nemadzimambo eZobha, navaFiristia; kundau dzeshe dzaakaenda, wakavanyisa.

⁴⁸ Wakaunganidza hondo, wakauraya vaAmareki, wakasunhura Isuraeri kubva kunyara dzavo vakavachakata.

⁴⁹ Zvino vakororo vaSauri vaiya Jonathani, Ishivhi, naMarikhishua; nemazina evanasikana vake vairi vaizwi, wokutanga Merabhi, neromudoko Mikhari.

⁵⁰ Zina romukadzi waSauri raizwi Ahinoamu, mukunda waAhimaazi. Zina renduna yehondo yake raizwi Abhina, mukororo waNeri, sekuru aSauri.

⁵¹ Kishi waiya baba aSauri; naNeri, baba aAbhina, waiya mukororo waAbhieri.

⁵² Kwaiyapo kurwa kwakakura nevaFiristia mazuva eshe aSauri. Naapo Sauri paakaona ngwazi nokuti munhu wakashinga, waimutora kugara naye muhondo yake.