1 Sam. 12 - Bhaibheri Rakachena muChindau

Mazwi oKugumisira aSamueri

¹ Samueri wakati kuvaIsuraeri veshe, “Ndakapurutana izwi renyu nezveshe zvemwakaronza kwendiri, ndikamuemesera mambo padera penyu.

² Ringirai ndimambo unomutungamirira zvino; neni ndaa musharuka nokuchena, asi vakororo vangu vanemwi. Ndakamutungamirira kubvira muudoko hwangu metsa nanyamashi.

³ Ndiri pano; itai chapupu ndini pamberi paMambo Mwari, nepamberi pewakadzodzwa wake. Ikabi yaani yendakatora? Nokuti imbongoro yaani yendakatora? Nokuti ndiani wendakachengedzera? Ndianizve wendakatambudza? Nokuti kunyara yaani yendakaashira chitengero kubata madziso angu ndicho? Chironzenyi, neni ndinozomupetudzira.”

⁴ Vakati, “Auzi kutichengedzera, nokuti kutitambudza, nokuti kutora chitengero kubva kunyara yomunhu.”

⁵ Naye wakati kwevari, “Mambo Mwari unoita chapupu ndimwi, nowakadzodzwa wake uri chapupu nyamashi kuti amuzi kuona chiro munyara mwangu.” Navo vakapingura, “Ndiye uri chapupu.”

⁶ Samueri wakati kuvanhu, “Mambo Mwari ndiye chapupu, uwo wakaemesa Mosi naAroni, naye wakabudisa madzibaba enyu kubva kunyika yeEgipite.

⁷ Ndizvo zvino emai, kuti titongane pamberi paMambo Mwari ngezviito zveshe zvakarurama zvaMambo Mwari, zvaakaita kwomuri nokumadzibaba enyu.

⁸ Naapo Jakobe paakapinda muEgipite, namadzibaba enyu vakachema kunaMambo Mwari, naMambo Mwari wakatuma Mosi naAroni, avo vakabudisa madzibaba enyu kubva Egipite, akavaita kuti vagare mundau iyi.

⁹ Asi vakariyarwa Mambo Mwari, Mwari wavo, naye wakavatengesa kunyara dzaSisera, nduna yehondo yaHazori, nomunyara dzevaFiristia, nomunyara dzamambo waMoabhi, vakarwa navo.

¹⁰ Zvino vakachema kunaMambo Mwari, vakati, ‘Takashaisha, ngokuti takasiya Mambo Mwari, takashandira vanaBhaari naAshitharothi; asi zvino tisunhure kubva munyara dzemagaa edu, nesu tinozomushandira.’

¹¹ NaMambo Mwari wakatuma Jerubhaari, Bharaki, Jefetha naSamueri, akamusunhura kubva kunyara dzemagaa enyu kundau dzeshe, nemwi mwakagarisika.

¹² Asi apo pemwakaona kuti Nahashi mambo wavaAmoni wakauya koomurwisa, mwakati kwendiri, ‘Haiwa, asi mambo unozotonga padera pedu;’ kunyazwi Mambo Mwari, Mwari wenyu waiya mambo wenyu.

¹³ Ringirai, uyu ndiye mambo wemwakatsanangura, uwo wamwakakumbira! Ringirai Mambo Mwari wakaemesa mambo padera penyu.

¹⁴ Kudai mwechizotya Mambo Mwari nokumushandira, nokupurutana izwi rake, musikamukiri mipango yaMambo Mwari, kudai imwimwi namambo unotonga padera penyu mukagwinya kuteera Mambo Mwari, Mwari wenyu, zvinozonaka.

¹⁵ Asi kudai musikazopurutani izwi raMambo Mwari, mwechirwisana nemipango yaMambo Mwari, nyara yaMambo Mwari inozomurwisa, kudai ngezveyakaita kumadzibaba enyu.

¹⁶ Ndizvo zvino emai, muone ichi chiro chikuru, chaanozoita Mambo Mwari pamberi pemadziso enyu.

¹⁷ Amukuwo wokukukura koroni here nyamashi? Ndinozodaidza kunaMambo Mwari, naye unozotuma mheni nemvura, kuti muzie nokuona kuti kushaisha kwenyu kwakakura kwemwakaita mukuona kwaMambo Mwari ngokudzikumbirira mambo.”

¹⁸ Ndizvo Samueri wakadaidza kunaMambo Mwari, naMambo Mwari wakatuma mheni nemvura ngeiro zuva; navanhu veshe vakatya Mambo Mwari naSamueri kakurutu.

¹⁹ Vanhu veshe vakati kunaSamueri, “Kumbirira varanda vako kunaMambo Mwari, Mwari wako, kuti tisafa; ngokuti takatutsira kushaisha uku kuzvishaishi zvedu zveshe, ngokudzikumbirira mambo pachedu.”

²⁰ NaSamueri wakati kunevanhu, “Musatya; mwakaita kushaisha kweshe uku, asi musapauka kubva mukuteera Mambo Mwari, asi shandirai Mambo Mwari ngomwoyo yenyu yeshe.

²¹ Musapauka kurutii kutsvaka zviro zvisina shwiro, zvisikadetseri nokuti kusunhura; ngokuti azvina shwiro.

²² Ngokuti Mambo Mwari aazosiyi vanhu vake ngendaa yezina rake guru; ngokuti zvakadakadza Mambo Mwari kuti amuite vanhu vake.

²³ Ndizvo neniwo, Mwari asazotenda kuti ndishaishe kunaMambo Mwari ngokurekera kumukumbirira; neni ndinozomudzidzisa njira yakanaka neyakarurama.

²⁴ Ityai Mambo Mwari, mwechimushandira mukugondeka ngomwoyo wenyu weshe; ngokuti pinimidzai kukura kwezviro zvaakamuitira.

²⁵ Asi kuti mwechizoangira kushaisha, munozopedzwa, mweshe imwimwi namambo wenyu.”