1 Sam. 11 - Bhaibheri Rakachena muChindau

Sauri Unonyisa VaAmoni

¹ Ngesure kwemwedzi Nahashi muAmoni wakakwira, wakaaka kamba pasinde peJabheshigireadhi; nevanhu veshe vaJabheshi vakati kunaNahashi, “Ita chitenderano nesu, nesu tinozokushandira.”

² Asi Nahashi muAmoni wakapingura, “Ngenjira iyi ndinozoita chitenderano nemwi, kuti nditochore madziso enyu eshe okumudyo, nokuzviita chitsverudzo padera pevaIsuraeri veshe.”

³ Vakuru veJabheshi vakati kwaari, “Tipei mazuva manomwe, kuti titume vanhu kunyika yeshe yaIsuraeri. Zvino, kuti kusina munhu wokutiponesa, tinozodzipira kwouri.”

⁴ Naapo vanhu vakatumwa vakaguma kuGibhea, kanyi kwaSauri, vakaronzera vanhu mashoko mukuzwa kwavo, nevanhu veshe vakamirudza mazwi avo, vakachema.

⁵ Zvino Sauri waibva kumunda echitinha kabi; naSauri wakati, “Indaa yenyi yaita kuti vanhu vacheme?” Ndizvo vakamuronzera mashoko avanhu veJabheshi.

⁶ Nomweya waMwari wakauya padera paSauri ngesimba apo paakazwa mashoko awo, naye wakashatirwa kakurutu.

⁷ Wakauraya kabi mbiri, akadzitematema kuita zvigurwa, nokuzvitumira kunyika yeshe yaIsuraeri ngenyara dzevanhu vakatumwa vechiti, “Kunyazwi ndiani usikauyi kooteera Sauri naSamueri, izvi zvinozoitwa kukabi dzake!” Nokutyisa kwaMambo Mwari kwakauya kunevanhu, navo vakauya ngomwoyo umwe.

⁸ Naapo avaerenga muBhezeki avo vaibva Isuraeri vaiya mazana matatu emakumi emazana (300,000) nevamuna vaJudha vaiya makumi matatu emakumi emazana (30,000).

⁹ Navo vakati kunenhumwa avo vakauya, “Munozoronza izvi kuvagari veJabheshigireadhi, ‘Mangwani apo zuva roopisha, munozoona kudetserwa.’ ” Nenhumwa dzakahwirira dzikazvironzera vagari veJabheshi, navo vakadakara.

¹⁰ Ndizvo vagari veJabheshi vakati, “Mangwani tinozodzipira kwomuri, nemwi munozoita kwetiri zveshe zvomunoda.”

¹¹ Ngezuva rechimangwani Sauri wakaisa vanhu muzvikwata zvitatu; navo vakauya pakati pekamba mumambakwedza; vakauraya vaAmoni metsa zuva rapisha; navo vakasara vakaparadzwa zvokuti apana nevairi vavo vakasara pamwepo.

¹² Vanhu vakati kunaSamueri, “Ndiani avo vakati, ‘Sauri unozotitonga here?’ Vaunze vanhuwo kwetiri kuti tivauraye.”

¹³ Asi Sauri wakati, “Apana unozourawa nyamashi; ngokuti nyamashi Mambo Mwari waunza ruponeso muIsuraeri.”

¹⁴ Samueri wakati kunevanhu, “Uyai, ngatiende Girigari, kuti timusire umambo.”

¹⁵ Ndizvo vanhu veshe vakaenda Girigari. Naapo vakaemesa Sauri kuita mambo pamberi paMambo Mwari muGirigari, naapozve vakapira midiro yokunyarara pamberi paMambo Mwari; naapo Sauri nevanhu veshe vaIsuraeri vakadakara kakurutu.