1 Sam. 10 - Bhaibheri Rakachena muChindau

¹ Ndizvo Samueri wakatora runyanga rwemafuta, akadurura padera pesoro rake, akamuchingamidza ngomuromo, akati, “Mambo Mwari aazi kukudzodza here kuita mambo padera penhaka yake?

² Naapo wabva kwendiri nyamashi, unozoshongana nevanhu vairi pasinde peiba raRacheri, munyika yaBhenjamini paZeriza; vanozoti kwouri, ‘Mbongoro dzowakaenda kootsvaka dzaoneka; zvino, baba ako avachapinimidzi ngembongoro dzavo, asi votambudzika, vechiti, Ndinozoitenyi ngendaa yomukororo wangu?’

³ Zvino unozoangira kuenda mberi kubva apo, metsa waguma pamuokhi weThabhori; naapo unozoshongana nevanhu vatatu vechikwira kuenda Bhetheri kunaMwari, umwe akatwara zvimbudzana zvitatu, umweni akatwara zvingwa zvitatu, noumweni akatwara nyede yevhini.

⁴ Navo vanozokuchingamidza, nokukupa zvingwa zviiri, izvo zvounozoashira kubva kunyara dzavo.

⁵ Ngesure kweizvo unozoguma kumutunhu waMwari, apo pane chiunga chevaFiristia; naapo wechiguma kudhorobha, unozoshongana nechiunga chevaprofeti vechidzaka kubva kundau yakakwirira, vanembira, gandira, munanzi, nechimatende, vechiridza pamberi pavo; navo vanozoprofeta.

⁶ Zvino mweya waMambo Mwari unozouya padera pako, newe unozoprofeta navo, unozotsandudzwa kuita munhu umweni.

⁷ Zvino apo zvioniso izvi zvaitika kwouri, ita kunyazwi chinosisira kuitwa, ngokuti Mwari unewe.

⁸ Newe unozodzaka Girigari kunditangira; zvino ndinozouya kwouri, koopira midiro yokunyarara. Unozogarira mazuva manomwe, metsa ndauya kwouri, nokukupangidza icho chounozoita.”

⁹ Naapo afuratira kubva kunaSamueri, Mwari wakamupa mwoyo umweni; nezvioniso zveshe zvakaitika ngeiro zuva.

¹⁰ Naapo vaguma paGibhea, chiunga chevaprofeti chakashongana naye; noMweya waMwari wakauya padera pake, naye wakaprofeta pakati pavo.

¹¹ Naapo veshe vaimuzia karetu vaona kuprofeta kwake pakati pevaprofeti, vanhu vakati umwe kunoumweni, “Chiinyi ichi chauya kumukororo waKishi? Sauri uri umwe wevaprofeti here?”

¹² Mwamuna wepandaupo wakapingura, akati, “Baba avo ndiani?” Ndizvo chakaita chisana kuti, “Sauri uri umwe wevaprofeti here?”

¹³ Naapo apedza kuprofeta, wakaenda kundau yakakwirira.

¹⁴ Sekuru aSauri akati kwaari nokumurumbwana wake, “Mwakaenda kuri?” Naye wakati, “Kootsvaka mbongoro; naapo taona kuti adzioneki nokuti pari, takaenda kunaSamueri.”

¹⁵ Sekuru aSauri akati, “Ndapota, ndironzere icho chaakaereketa Samueri kwouri.”

¹⁶ Sauri wakati kunasekuru wake, “Wakatironzera pamhene kuti mbongoro dzakaoneka.” Asi ngendaa youmambo hwaakaereketa ndihwo Samueri, aazi kumuronzera.

Sauri Unoashirwa kuti ndiye Mambo

¹⁷ Samueri wakadaidza vanhu kuungana kunaMambo Mwari paMizipha.

¹⁸ Wakati kunevana vaIsuraeri, “Mambo Mwari, Mwari waIsuraeri, unoronza izvi, ‘Ndakabudisa Isuraeri kubva Egipite nokumusunhura kubva munyara dzevaEgipite, nokubva kunyara youmambo hweshe hwaimusunga.’

¹⁹ Asi imwimwi nyamashi mwaramba Mwari wenyu, uwo wakamuponesa kubva mukutamikirwa nokutambudzika kwenyu kweshe; nemwi mwakati kwaari, ‘Haiwa! Tiemesere mambo padera pedu.’ Ndizvo zvino dziunzenyi pachenyu pamberi paMambo Mwari ngamadzinza enyu nemhatso dzenyu.”

²⁰ Zvino Samueri wakaita kuti madzinza aIsuraeri eshe akwedzere pasinde, dzinza raBhenjamini rakatorwa ngemabhigidha.

²¹ Wakaunza dzinza raBhenjamini pasinde mhuri ngemhuri, nemhuri yaMatri yakatsanangurwa ngemabhigidha. Pakugumisira wakaunza mhuri yaMatri pasinde munhu ngomunhu naSauri mukororo waKishi wakatsanangurwa ngemabhigidha. Asi vakamutsvaka, aazi kuoneka.

²² Ndizvo vakabvunzazve kunaMambo Mwari vechiti, “Munhu uyu wauya pano here?” NaMambo Mwari wakapingura, “Ringira, unodzifisha munhunduru.”

²³ Zvino vakarumba, vakamutora kubvamwo. Naapo aema pakati pevanhu, waiya akareba kupinda munhu weshe kubvira pamafudzi ake.

²⁴ Samueri wakati kunevanhu veshe, “Munomuona here uwo wakatsanangurwa ndiMambo Mwari? Apanazve wakadai ndiye pakati pavanhu veshe.” Nevanhu veshe vakadaidzira vechiti, “Mambo pona mhera nariini.”

²⁵ Samueri wakaronzera vanhu tsika nemishando youmambo; wakazvinyora mubhuku nokuriisa pamberi paMambo Mwari. Zvino Samueri wakaendesa vanhu veshe kumhatso dzavo.

²⁶ Sauri wakaendawo kanyi kwake muGibhea; chakaenda naye chiunga chevanhu chaiya nomwoyo yaakagwama Mwari.

²⁷ Asi vanhu vakashata vakati, “Munhu uyu unozotiponesa ngokudini?” Navo vakamushoora, vakarekera kumuunzira zvipo. Asi iye wakanyarara.