1 Pet. 5 - Bhaibheri Rakachena muChindau

Kuusha Muhlambi WaMwari

¹ Ndizvo ndinopota vakuru vari pakati penyu, kudaiwo ndini ndiri mukuru pamwepo nemwi, nechapupu chemadambudziko aKristu, nounoashirawo uthende hunozooniswa.

² Ushai muhlambi waMwari waakaisa pashi penyu, haiwa ngokuangiridzwa, asi ngokuda, kudai ngokuda kwaMwari; haiwa kuti muuyirwe ngemare inetsvina, asi ngokudisisa,

³ musikaiti kudai ngevatongi padera pezvakakoanisirwa kwomuri, asi mwechiita zvionero kumuhlambi.

⁴ Naapo Muushi mukuru paanozooniwa, munozoashira dzungudza routhende risikazoperi.

⁵ Ngokudaro imwimwi vadoko pfairai vakuru. Eya, imwimwi mweshe dzisimidzei ngokupfaa mukushandirana umwe noumweni, ngokuti “Mwari unorwisana nevanodzikudza, asi unopa nyasha kunevakapfaa.”

⁶ Ndizvo dzipfaisei pashi penyara yaMwari inesimba, kuti amutunhumadze ngomukuwo unosisira.

⁷ Kandirai kweshe kuneseka kwenyu padera pake, ngokuti unonyera ndimwi.

⁸ Svinurai, murinde. Gaa renyu dhiabhorosi rinohamba-hamba kudai ngemhondoro inorira, rechitsvaka avo veringadya.

⁹ Murwe naye mwakagwinya mukugonda kwenyu, mwechizia kuti madambudziko akatodzana anogumira hama dzenyu munyika dzeshe.

¹⁰ Zvino Mwari wenyasha dzeshe, uwo wakamudaidza kuuthende hwake husikaperi huri munaKristu Jesu, mwambotambudzika mukuwo mudoko, iye emene unozomupererisa, unozomuemesa, unozomugwinyisa nokumutseya.

¹¹ Kwaari ngakugare kunesimba mhera nariini nariini. Ameni.

Kuvhaisa kwoKupedzisira

¹² Ndakanyora kwomuri ngokufupisa kubudikidza ndiSirivhanusi, hama yedu inogondeka kudai ngezvendinopinimidza, ndechimugwinyisa nokupupura kuti idzi ndidzo nyasha dzaMwari dzegwinyiso. Emai mwakagwinya mwedziri.

¹³ Chiara chiri muBhabhuroni, chakatsanangurwa pamwepo nemwi, chinomutambisa; ngokudaro Marako mukororo wangu.

¹⁴ Chingamidzanai ngomuromo umwe noumweni ngorudo. Kunyarara ngakugare kwomuri mweshe muri munaKristu.