1 Pet. 4 - Bhaibheri Rakachena muChindau

Ndaramo Itsva

¹ Ndizvo ngokuti Kristu wakatambudzika munyama, imwimwiwo pfekai mupinimidzo wakatodzana, ngokuti munhu wakatambudzika munyama wakarekera kushaisha,

² kuti mupone ndaramo yenyu yeshe, haiwa munyama kuita kuemura kwevanhu, asi ngokuda kwaMwari.

³ Ngokuti mwakapedza mukuwo wakakwana mukuita izvo zvaidiwa kuitwa ngevemadzinza, kuhamba mukushata, kuemura, kudhakwa ngevhini, kutamba zvakashata, madhiri okumwa nokudira miedzaniso kunonyangadza.

⁴ Vanoshamiswa ngokuti amuchahambidzani navo mukuita zvakanyanya kushata, ndizvo vanomutuka.

⁵ Asi vanozodzipingurira kwaari uwo unoema akanasirira kutonga vanopona nevakafa.

⁶ Ngokuti iyi ndiyo ndaa yakaita kuti vhangeri richumairwe kunevakafa navo, kuti vatongwe munyama kudai ngokutongwa kwomunhu weshe, kuti vararame mumweya kudai ndiMwari.

Vangwariri Vakanaka veZvipo zvaMwari

⁷ Asi magumo ezviro zveshe aapasinde; ndizvo itai vakangwara, murinde mukukumbira.

⁸ Kupinda zveshe dananai ngorudo rukuru pakati penyu, ngokuti rudo runofukidzira zvishaishi zvakawanda.

⁹ Mwechikoverana umwe noumweni musikagunun'uni.

¹⁰ Kudai ngevangwariri vakanaka venyasha dzaMwari dzakapetwa, koanisiranai umwe kunoumweni kunyazwi ngechiri chipo chaakaashira umwe ngaumwe wenyu.

¹¹ Kunyazwi ndiani unoereketa ngaaerekete mazwi emene aMwari; kudai aripo unoshandira ngaashandire kudai ngesimba raanopuwa ndiMwari, kuti Mwari airikidzwe ngezviro zveshe kubudikidza ndiye Jesu Kristu. Aye unouthende nokutonga mhera nariini nariini. Ameni.

Kutambudzika kwoMuKristu

¹² Vanodikanwa, musashamiswa ngokuedzwa kwakakura kuri pakati penyu, kunoita kudai ngechiro chinoshamisa chaiitika kwomuri.

¹³ Asi dakarai, kudai ngezvomunoashira chikoaniswa chokutambudzwa kwaKristu, kuti imwimwi mudakare nokudaidzira ngokudakara kukurutu apo uthende hwake pounooniswa.

¹⁴ Kudai mwechitsverudzwa ngendaa yezina raKristu, mwakafumiswa, ngokuti mweya wouthende uwo uri Mweya waMwari unogara padera penyu.

¹⁵ Asi kusazoapo naumwe pakati penyu unotambudzika ngendaa yokuita muurayi, mbavha, muiti wezvakashata nousikarekeri zvevamweni.

¹⁶ Asi kuti munhu echitambudzika ngokuita muKristu, asatsveruka, asi ngaakudze Mwari ngokuti unezina iri.

¹⁷ Ngokuti nguva yaguma yokuti kutongwa kutange kumhatso yaMwari; kudai kwechitanga kwetiri, kunozoita kwakadini kugumisira kwevasikapurutani vhangeri raMwari?

¹⁸ Zve, “Kudai zvechikonzera vakarurama kuti vaponeswe, chiinyi chinozoitika kunevasikadiri Mwari nevashaishi?”

¹⁹ Ndizvo avo vanotambudzika kudai ngokuda kwaMwari ngavapire mweya yavo mukuita zvakanaka kuMusiki unogondeka.