1 Pet. 2 - Bhaibheri Rakachena muChindau

Buwe Rinopona neDzinza Rakacheneswa

¹ Ndizvo mwechirasha kweshe kushata, kuchengedzera kweshe, kudziitisa, ndurumwa nokuereketa kweshe kwakashata,

² kudai ngevana vatsva vachaamba kuberekwa, disisai mukaka woMweya usina kuchengedzera, kuti mukure ndiwo, muponeswe,

³ ngokuti mwakaraira kuti Mambo unenyasha.

⁴ Uyai kwaari, ndiye buwe rinopona, ngegwinyiso rakarambwa ngevanhu, asi rakatsanangurwa ndiMwari rinomutengo mukuru pamberi pake.

⁵ Imwimwiwo mwakadai ngemapuwe anopona, mwakaakiwa kuita mhatso yoMweya, kuita upristi hwakachena, kupira midiro yoMweya, inoashirika kunaMwari kubudikidza ndiye Jesu Kristu.

⁶ Ngokuti zvirimwo muzvinyorwa zvinoti, “Ringirai, ndinoradzika muZioni buwe, buwe repakhona rakatsanangurwa, rino mutengo mukuru; nouwo unotenda kwaari aazotsverudzwi.”

⁷ Kwomuri zvino imwimwi munotenda, unoremeredzeka; asi kwavari vasikatendi, “Buwe rakarambwa ngevaaki ndiro rakaita soro repakhona,”

⁸ zve, “Ibuwe rinoita kuti vapumhunwe, nebuwe rinoita kuti vawe.” Vanopumhunwa ngokuti avapurutani izwi, kudai ngezvevakaemeserwa kuita.

⁹ Asi imwimwi muri dzinza rakatsanangurwa, muri voupristi hwoumambo, dzinza rakachena, vanhu vaMwari vaakadzionera, kuti muchumaire ngemishando inesimba yaakaita uwo wakamudaidza kubva muchidima, kuti mupotere mukujeka kwake kunoshamisa.

¹⁰ Imwimwi ngomukuwo wakapinda mwaiya musiri vanhu, asi zvino muri vanhu vaMwari; avo vaiya vasikazi kuashira nyasha, asi zvino mwaashira nyasha.

Hloko dzaMwari

¹¹ Vanodikanwa, ndinomupota kudai ngezvomuri zvigarandimo nevahambi kuti murekere kuita kuemura kwenyama kunorwa hondo nomweya.

¹² Mudzibate ngokuremeredzeka kunosisira pakati pevemadzinza, kuti kuneizvo zvevanomureya ndizvo, kudai ngevaiti vakashata, vangaona ngemishando yenyu yakanaka, vakudze Mwari apo paanouya kootonga.

¹³ Pfairai mipango yeshe yevanhu ngendaa yaMambo, kunyazwi ngeyamambo, uri mukuru,

¹⁴ nokuti kuvatongi, vakatumwa ndiye kuunzidzira vanoita zvakashata nokuvakudza avo vanoita zvakanaka.

¹⁵ Ngokuti ndikwo kuda kwaMwari kuti ngokuita zvakanaka munganyaradza kusikazia kwavanhu vano upenzi.

¹⁶ Kudai ngevanhu vaMwari, ponai kudai ngevanhu vakasunhurika, asi musikashandisi kusunhurika kwenyu kuita bhachi rokuita zvakashata.

¹⁷ Remeredzai munhu weshe. Idai hama dzeshe. Ityai Mwari. Remeredzai mambo.

Chionero choKutambudzika kwaKristu

¹⁸ Varanda, pfairai vakuru venyu ngokuremeredza kweshe, haiwa kwavari avo vega vakanaka nevakapfaa, asi nekwavarizve vasikazi kururama.

¹⁹ Ngokuti ichi chinoashirika, kuti munhu ashingirire madambudziko, kuti aanemwoyo wakanaka usina ndaa kunaMwari, echitambudzika pasina nendaa.

²⁰ Ngokuti mungakudzwa ngenjiranyi, mwechisengerera apo kudai mwechishaisha nokuchaiwa ngendaa yakwo? Asi apo mwechinasa, kudai mwechitambudzwa ngendaa yakwo, mwechisengerera, izvi zvinoashirika kunaMwari.

²¹ Ngokuti mwakadaidzwa kuneizvo, ngokuti Kristu wakatambudzikirawo imwimwi, akamusiira chionero kuti muteere muzvitsiko zvake.

²² Uwo usikazi kushaisha, akuna kuchengedzera kwakaoneka pamuromo wake.

²³ Naapo paakatukwa, aazi kutukawo; naapo atambudzika, aazi kutyisidzira; asi wakadzipira kwaari uwo unotonga ngokururamisa.

²⁴ Uwo wakatwara emene zvishaishi zvedu mumuiri wake pamuchinjiko, kuti isusu tife mukushaisha, tipone mukururama; kubudikidza ngemaronda ake mwakaponeswa.

²⁵ Ngokuti mwaiya mwechipepesheka kudai ngemakwai, asi zvino mwapetuka kuMuushi noMungwariri womweya yenyu.