1 Pet. 1 - Bhaibheri Rakachena muChindau

Kuchingamidza

¹ Petro, mupostori waJesu Kristu, ndinonyorere kwavari vakatsanangurwa vari zvigarandimo, vakapararira muPontusi, Garatia, Khapadhosia, Asia neBhithinia,

² kudai ngokuzia karetu kwaMwari Baba, mukucheneswa kwoMweya, kuti vapurutane kunaJesu Kristu, nokufafazirwa ngengazi yake. Nyasha nokunyarara ngazviwanzwe kwomuri.

Gonda Rinopona

³ Ngaakudzwe Mwari, Baba aMambo wedu Jesu Kristu! Uwo ngenyasha dzake huru wakatibarazve kuti tianegonda rinopona kubudikidza ngokumuka kwaJesu Kristu kubva kwevakafa,

⁴ kuti tianenhaka isikaori, isikasvipiswi, isikanyangariki, yakangwaririrwa imwimwi mudenga,

⁵ imwimwi munongwarirwa ngesimba raMwari kubudikidza ngokugonda kuti muano ruponeso rwakanasirirwa kuti ruzooniswa ngomukuwo wokugumisira.

⁶ Muizvi munodakara kakurutu, kunyazwi zvino kwomukuwo mudoko, kudai zvechisisira, mwakatambudzwa ngezviedzo zvembeu zhinji,

⁷ kuti kuedzwa kwokugonda kwenyu, kunomutengo mukuru kupinda mukore unopera kunyazwi wechipera unoedzwa ngomuriro, kungaoneka kwechiita kukudza nouthende nokuremeredza ngenguva yokuoneka kwaJesu Kristu.

⁸ Kunyazwi amuzi kumuona munomuda; kwaari kunyazwi zvino amumuoni, asi munomutenda nokudakara ngokudakara kusikabviri kuti kuereketwe kwakazara ngouthende,

⁹ ngokuti munoashira chomunovavarira mukugonda kwenyu, chiri ruponeso rwomweya yenyu.

¹⁰ Ngendaa yourwu ruponeso vaprofeti avo, vakaprofeta ngenyasha idzo dzemwaizoitirwa, vakanasa kutsvakisisa,

¹¹ vechitsvaka ngendaa yomunhu nokuti nguva iyo yakaronzwa, ngoMweya waKristu waigara mukati mwavo, apo pewakapupura ngekaretu ngemadambudziko aKristu nouthende hwaizoteera.

¹² Kwavari zvakaoniswa kuti avasaidzishandira, asi imwimwi muzviro izvo, zvakaronzwa kwomuri kubudikidza ngaavo vakachumaira vhangeri kwomuri ndiMweya Wakachena wakatumwa kubva mudenga, izvo zviro ngirosi dzinoda kuzvizwisisa!

Kudaidzirwa Kupona Kwakacheneswa

¹³ Ndizvo sungai zviunu zvemipinimidzo yenyu, itai vakangwara; muemese reshe gonda renyu kunyasha dzinounzwa kwomuri pakuoneka kwaKristu Jesu.

¹⁴ Kudai ngevana vanopurutana, musadzitodzanise nokuemura kwenyu kwokutanga kwenguva yokusikazia kwenyu.

¹⁵ Asi kudai ngouwo wakamudaidza wakachena, ngokudaro imwimwiwo itai vakacheneswa mukupona kwenyu kweshe;

¹⁶ ngokuti kwakanyorwa kuti, “Munozoita vakacheneswa, ngokuti inini ndakachena.”

¹⁷ Kudai mwechimudaidza kuti Baba, uwo unotonga vanhu veshe asina mukheto kudai ngomushando womunhu umwe ngaumwe, ponai mukuwo wouchigarandimo hwenyu mukutya.

¹⁸ Imwimwi munozia kuti amuzi kuripirwa ngezviro zvinoora, kudai ngesirivha nomukore, kubva kunjira isina shwiro yokupona kwenyu yomwakasiirwa ngemadzibaba enyu,

¹⁹ asi mwakaripirwa ngengazi yaKristu ino mutengo mukuru, kudai ngeyegwai risina gotsa nokuti cheringapomerwa.

²⁰ Uwo ngegwinyiso wakaziikanwa nyika isati yaemeswa, asi wakaoniswa ngendaa yenyu mukugumisira kwenguva.

²¹ Kubudikidza ndiye imwimwi munogonda kunaMwari, uwo wakamumusa kubva kwavakafa, akamupa uthende, kuti kugonda kwenyu nokutenda kwenyu zviemeswe pana Mwari.

²² Zvino mwakachenesa mweya yenyu mukupurutana gwinyiso kuti muite rudo rusikadziitisi, mudanane umwe noumweni ngomwoyo wakasukika kakurutu.

²³ Imwimwi mwakabarwazve patsva, haiwa ngembeu inoora, asi ngeisikaori, kubudikidza ngeizwi raMwari rinopona mhera nariini.

²⁴ Ngokuti “Nyama yeshe yakadai ngomwenje, nouthende hwayo hweshe hwakadai ngeruva romwenje. Mwenje unozeketera neruva rinowa pashi.

²⁵ Asi izwi raMwari rinondogara mhera nariini.” Izwi iro ndiro vhangeri rakachumairwa kwomuri.