1 MaKro. 29 - Bhaibheri Rakachena muChindau

Zvipo zvoKuaka Temperi ndizvo

¹ Dhavhidha mambo wakati kunembungano yeshe, “Soromoni mukororo wangu, uwo ega waakatsanangura Mwari, uchiri mudoko, aasati azia chiro, nomushando mukuru; ngokuti temperi arisiri romunhupi, asi ngeraMambo Mwari, Mwari.

² Ndizvo ndakanasirira mhatso yaMwari wangu, kudai ngezvendaikona, mukore, kunasira zviro zvinoitwa ngomukore, sirivha zviro zvinonasirwa ngesirivha, thusi zviro zvinozonasirwa ngethusi, simbi zviro zvinonasirwa ngesimbi, matanda zviro zvinonasirwa ngematanda, mapuwe eonekisi, nemapuwe okuiswa, nemapuwe anon'anikira, nemapuwe anemiara akaparadzana, nembeu dzeshe dzemapuwe anomutengo mukuru, nemapuwe emiara akawanda.

³ Zve, ngokuti ndinodisisa mhatso yaMwari wangu, ndakapa zvoupfumi hwangu, mukore nesirivha, kututsira padera peizvo zveshe zvendakanasira zvemhatso yakachena.

⁴ Ndakapa mukore unopinda zana remametrikhi thanisi, womukore weOfiri, nemakumi marongomuna esirivha yakaereswa, zvokuseta ndizvo marukumbati emhatso,

⁵ nomushando weshe wokunasira zviro zvinonasirwa ngomukore, sirivha yokunasira zviro zvinonasirwa ngesirivha, nezvokuita mishando yeshe inonasirwa ngenyara dzengwazi. Ndiani zvino unotenda nyamashi kudzipira pachake ngokuda kunaMambo Mwari?”

⁶ Zvino vakuru vemhatso dzemadzibaba nevatungamiriri vemadzinza aIsuraeri, nenduna dzemakumi emazana, nedzemazana, pamwepo nevatongi vomushando wamambo, vakapa ngokuda.

⁷ Vakapa kumushando wemhatso yaMambo Mwari mametriki thanisi aida kupinda zana nemakumi manomwe (170) omukore, mametriki thanisi esirivha anodarika mazana matatu nemakumi marongomuna (340), mametriki thanisi ethusi aiguma mazana matanhatu nemakumi mairi (620), nemametriki thanisi esimbi aipinda makumi emazana matatu nemazana marongomuna (3,400).

⁸ Kunyazwi ndiani waiya nemapuwe anomutengo mukuru, vakaapira kuupfumi hwemhatso yaMambo Mwari, ngenyara yaJehieri muGershoni.

⁹ Zvino vanhu vakadakara ngokuti ava vaiya vapa ngokuda ngokuti vakapa ngomwoyo weshe kunaMambo Mwari; Dhavhidha mambo wakadakarawo kakurutu.

Dhavhidha Unokudza Mwari

¹⁰ Zvino Dhavhidha wakakudza Mambo Mwari pamberi pembungano yeshe; Dhavhidha wakati, “Ngaakudzwe Mambo Mwari, Mwari waIsuraeri baba edu, mhera nariini.

¹¹ Ukuru ngohwako, A Mambo Mwari, simba, uthende, kunyisa noumambo; ngokuti zveshe zviri mudenga nomunyika ngezvako; umambo ngohwako, A Mambo Mwari, iwewe wakamirudzwa kuita soro padera pezviro zveshe.

¹² Upfumi nokukudzwa zveshe zvinobva kwouri, newe unotonga padera pazvo zveshe. Munyara yako munesimba nokugwinya; zviri munyara yako kukurisa, nokupa veshe simba.

¹³ Nazvino, Mwari wedu, tinokubonga nokukudza zina rako rinouthende.

¹⁴ “Asi inini ndiri chiinyi, nevanhu vangu vari chiinyi, kuti isusu tikone kupa ngokuda? Ngokuti zviro zveshe zvinobva kwouri, nesu takupa izvo zviri zvako.

¹⁵ Ngokuti isusu tiri vapara pamberi pako nevahambi, kudai ngemadzibaba edu eshe; mazuva edu padera penyika akadai ngebvute, akuna gonda.

¹⁶ A Mambo Mwari, Mwari wedu, zveshe izvi zvakawanda zvetakanasirira kuakira zina rako rakachena mhatso, zvinobva munyara yako, zveshe ngezvako.

¹⁷ Ndinozia, Mwari wangu, kuti iwewe unoedza mwoyo, unodakarira kururama; mukururama kwomwoyo wangu ndakapa zviro zveshe izvi ngokuda; zvino ndaona vanhu vako vari pano, vechipa kwouri ngokuda nokudakara.

¹⁸ A Mambo Mwari, Mwari waAbrahama, waIsaka nowaIsuraeri, madzibaba edu, ita kuti kudisisa nemipinimidzo zvigare mumwoyo yevanhu vako mhera nariini, kweerai mwoyo yavo kwouri.

¹⁹ Ipa kunaSoromoni mukororo wangu mwoyo wakaperera, wokungwarira mipango yako, zvitongero nezviemeso zvako nokuita izvi zveshe, nokuaka temperi rendakanasirira.”

²⁰ Zvino Dhavhidha wakati kunembungano yeshe, “Kudzai Mambo Mwari, Mwari wenyu.” Nembungano yeshe yakakudza Mambo Mwari, Mwari wemadzibaba avo, vakakotamisa masoro avo pashi, vakakudza Mambo Mwari, namambo wakakudzwawo.

²¹ Ngezuva raiteera vakapira midiro kunaMambo Mwari, vakapira midiro yokupisha kunaMambo Mwari, mikono gumi remazana (1,000), nemagondohwe gumi remazana (1,000), nemakwai gumi remazana, (1,000), pamwepo nemidiro yavo yokumwa, nemidiro mizhinji yevaIsuraeri veshe;

²² navo vakadya nokumwa pamberi paMambo Mwari ngeiro zuva vanokudakara kukurutu. Navo ngokwechipiri vakaita Soromoni mambo mukororo waDhavhidha; vakamudzodza pamberi paMambo Mwari kuita mutongi waMambo Mwari, naZadhoki kuita mupristi.

²³ Zvino Soromoni wakagara padendemaro raMambo Mwari kuita mambo pandau yababa ake Dhavhidha; wakabudirira, nevaIsuraeri veshe vakamupurutana.

²⁴ Vatungamiriri veshe nengwazi, nevakororo veshe vamambo Dhavhidha, vakadzipfaisa kunaSoromoni mambo.

²⁵ NaMambo Mwari wakakwidzidza Soromoni kakurutu mukuona kwavaIsuraeri veshe, akamupa uthende hwoumambo hwakadai husikazi kumboapozve kunamambo umweni waIsuraeri wakatanga pamberi pake.

Ndaa yoKutonga kwaDhavhidha ngoKufupisa

²⁶ Ndikwo kutonga kwaakaita Dhavhidha mukororo waJesi padera paIsuraeri weshe.

²⁷ Mukuwo waakatonga padera paIsuraeri waiya makore makumi marongomuna; muHebroni wakatonga makore manomwe, nemakore makumi matatu nematatu wakatonga muJerusarema.

²⁸ Zvino wakafa, aamusharuka kakurutu, aane makore mazhinji, aneupfumi nokuremeredzwa; naSoromoni mukororo wake wakatonga pandau yake.

²⁹ Zvino mishando yaDhavhidha mambo, kubvira pakutanga nokugumisira, zvakanyorwa mubhuku raSamueri muprofeti, nomubhuku raNathani muprofeti, nomubhuku yaGadhi muprofeti,

³⁰ pamwepo nemishando yokutonga kwake, nesimba rake, nezvakaitika kwaari nevaIsuraeri, noumambo hweshe hwenyika.