1 MaKro. 23 - Bhaibheri Rakachena muChindau

¹ Naapo Dhavhidha aamusharuka aanemakore mazhinji, wakaemesa Soromoni mukororo wake kuti aite mambo padera paIsuraeri.

Mushando weVaRevhi

² Dhavhidha wakaunganidza pamwepo veshe vatungamiriri vaIsuraeri, vapristi nevaRevhi.

³ VaRevhi vakaerengwa kubvira ngevaane makore makumi matatu nokuenda mberi: nouwandu hwevakaerengwa vaiya makumi matatu nemasere emakumi emazana (38,000).

⁴ Dhavhidha wakati, “Makumi mairi namarongomuna emakumi emazana, (24,000) eavo vaiyapo ava vakaemeserwa kuita mushando wemhatso yaMambo Mwari; nemakumi emazana matanhatu (6,000) kuita nduna nevatongi,

⁵ makumi emazana marongomuna (4,000) kuita vangwariri vemisiwo, nemakumi emazana marongomuna (4,000) vaikudza Mambo Mwari ngezviro zvokuridza izvo zvendakanasira kukudza Mambo Mwari ndizvo.”

⁶ NaDhavhidha wakavaronga kuita zvikwata zvakaedzana pakati pevakororo vaRevhi, Gershoni, Kohathi naMerari.

⁷ Vakororo vaGershoni vaiya Radhani naShimei.

⁸ Vakororo vaRadhani: Jehieri waiya mukuru, Zethamu naJoeri, vatatu.

⁹ Vakororo vaShimei: Sheromothi, Hazieri naHarani, vatatu. Ava vaiya vakuru vemhatso dzemadzibaba avo Radhani.

¹⁰ Nevakororo vaShimei: Jahathi, Zina, Jeushi naBheria. Ava varongomuna vaiya vakororo vaShimei.

¹¹ Jahathi waiya mukuru, naZiza waiya wechipiri; asi Jeushi naBheria vaiya vasina vakororo vakawanda; ndizvo vakaerengwa pamwepo kuita vemhatso imwe yababa avo.

¹² Vakororo vaKohathi: Amiramu, Izihari, Hebroni naUzieri, veshe varongomuna.

¹³ Vakororo vaAmiramu: Aroni naMosi. Aroni wakaemeserwa kunasira zviro zvakanyanyisa kuchena, kuti iye nevakororo vake mhera nariini vapishe mitombo inegwema rakanaka pamberi paMambo Mwari, kuti vamushandire, nokufumisa vanhu ngezina rake mhera nariini.

¹⁴ Asi ngendaa yaMosi munhu waMwari, vakororo vake vakaerengwa pamwepo nedzinza raRevhi.

¹⁵ Vakororo vaMosi: Gershoni naErieza.

¹⁶ Vakororo vaGershoni: Shebhueri waiya mukuru.

¹⁷ Vakororo vaErieza: Rehabhia waiya mukuru. Erieza waiya asina vakororo vamweni, asi vakororo vaRehabhia vaiya vazhinji kakurutu.

¹⁸ Vakororo vaIzihari: Sheromithi waiya mukuru.

¹⁹ Vakororo vaHebroni: Jeria waiya mukuru, Amaria wechipiri, Jahazieri wechitatu naJekameamu wechirongomuna.

²⁰ Vevakororo vaUzieri: Mikha waiya mukuru naIshia waiya wechipiri.

²¹ Vakororo vaMerari: Mahiri naMushi. Vakororo vaMahiri: Ereaza naKishi.

²² Ereaza wakafa, asina vakororo, asi vanasikana vega; hama dzavo, vakororo vaKishi vakavaroora.

²³ Vakororo vaMushi: Mahiri, Edheri naJeremothi, vaiya vatatu.

²⁴ Ava ndivo vakororo vaRevhi kudai ngemhatso dzamadzibaba avo, vakuru vemhatso dzemadzibaba avo, kudai ngokuerengwa kwemazina eavo vakaerengwa, avo vaiita mushando wemhatso yaMambo Mwari, kubvira ngeavo vaiya nemakore makumi mairi nokuenda mberi.

²⁵ Ngokuti Dhavhidha wakati, “Mambo Mwari, Mwari waIsuraeri, wakapa vanhu vake kunyarara, naye unogara muJerusarema mhera nariini.

²⁶ Ndizvo vaRevhi avachazotwari thabhenakeri, nokuti zvidziyo zvaro, zvinoshandiswa kweriri.”

²⁷ Ngokuti kudai ngemazwi okugumisira aDhavhidha, vaRevhi vakaerengwa kubvira ngeavo vaiya nemakore makumi mairi nokuenda mberi.

²⁸ Asi mushando wavo waiya wokudetsera mibarirwana yaAroni, yokuita mushando wemhatso yaMambo Mwari, mumaruwanze, nomumakamera, kusukisisa zveshe zviro zvaiya zvakacheneswa, nomushando wake wemhatso yokudira yaMwari;

²⁹ nokudetserazve mumisara yezvingwa zvinopirwa kunaMwari, nowoufu hwakamotseka, mudiro wezviyo, wezvingwa zvisina mumera, wezvakabikwa munhamba, mudiro wakakanywa nemafuta, wezvakakangiwa, nowezvipimo zveshe zvinembeu dzakaparadzana.

³⁰ Navo vanozoema mangwanani eshe kubonga nokukudza Mambo Mwari, nokudarozve mumadeekoni;

³¹ kunyazwi naapo panopirwa yeshe midiro yokupisha kunaMambo Mwari ngemaSabatha, nomukutawa kwomwedzi, nomumadhiri akaemeserwa, kudai ngouwandu hunodiwa ngokuangirira pamberi paMambo Mwari.

³² Ndizvo vanozongwarira tende romushongano, nokungwarira ndau yakachena, nokudetsera vakororo vaAroni hama dzavo, mumushando wemhatso yaMambo Mwari.