1 MaKro. 22 - Bhaibheri Rakachena muChindau

¹ Zvino Dhavhidha wakati, “Panapa ndipo pachazoita mhatso yaMambo Mwari, Mwari, neiri ndiro arita remidiro yokupisha yaIsuraeri.”

Kunasirira Kuakwa kweTemperi

² Dhavhidha wakapanga kuti kuunganidzwe pamwepo vapara vaigara munyika yaIsuraeri, kuti vatsetse mapuwe okuaka ndiwo mhatso yaMwari.

³ Dhavhidhawo wakaunza simbi dzakawanda dzokuita zvipikiri zvezvivhayo zvemisiwo, nezvokuvharisa ndizvo, nethusi rakawanda risikapimiki,

⁴ nematanda emisidhari akawanda; ngokuti vaSidhoni nevaThire vakaunza matanda akawanda emisidhari kunaDhavhidha.

⁵ Ngokuti Dhavhidha wakati, “Soromoni mukororo wangu uchimudoko aasati abva muzero, nemhatso inozoakirwa Mambo Mwari inozoita yakapindisisa kunaka, inembiri nouthende pakati pemadzinza eshe; ndizvo zvino ndinozoinasirira.” Ndizvo Dhavhidha wakanasirira zvakawanda asati afa.

⁶ Zvino wakadaidza Soromoni mukororo wake, wakamupanga kuti aakire mhatso Mambo Mwari, Mwari waIsuraeri.

⁷ Dhavhidha wakati kunaSoromoni, “Mukororo wangu, inini ndaiya ndaronga mumwoyo wangu kuti ndiakire zina raMambo Mwari, Mwari waIsuraeri, mhatso.

⁸ Asi izwi raMambo Mwari rakaguma kwendiri rechiti, ‘Iwewe wakaparadza ngazi yakawanda, wakarwa hondo kakurutu; auzoakiri zina rangu mhatso, ngokuti wakaparadza ngazi yakawanda munyika pamberi pangu.

⁹ Wona, mukororo unozobarwa kwouri; unozoita munhu wokunyarara. Ndinozomupa kunyarara kubva kumagaa ake akamutendenedza; ngokuti zina rake rinozozwi Soromoni, neni ndinozopa kunyarara nokugarisika kuvaIsuraeri mumazuva ake.

¹⁰ Ndiye unozoakira zina rangu mhatso. Unozoita mukororo kwendiri, neni ndinozoita baba kwaari; ndinozogwinyisisa dendemaro roumambo hwake padera paIsuraeri mhera nariini.’

¹¹ Zvino, mukororo wangu, Mambo Mwari ngaanewe, kuti ubudirire, mukuaka mhatso yaMambo Mwari, Mwari wako, kudai ngezvaakaereketa ndiwe.

¹² Kwega Mambo Mwari ngaakupe kungwara nokuzwisisa, kuti apo paanokupa simba padera paIsuraeri, ungwarire mipango yaMambo Mwari, Mwari wako.

¹³ Zvino unozobudirira kudai wechizongwarira kuita zviemeso nemipango izvo zvaakapanga Mambo Mwari kunaMosi, ngendaa yevana vaIsuraeri. Ita wakagwinya, ushinge. Usatya; usapera simba.

¹⁴ Ngokurwadziwa kukurutu ndakanasirira mhatso yaMambo Mwari, mametriki thanisi makumi emazana matatu nemazana marongomuna (3,400) omukore, nemakumi emazana makumi matatu nemarongomuna (34,000) esirivha, thusi nesimbi zvisikabviri kupimwa ngouwandu; ndakanasirirazve matanda nemapuwe. Kune izvi iwewe unozotutsira zvimweni.

¹⁵ Iwewe une vashandi vakawanda: vatsetsi vemapuwe, vanoaka ngemapuwe, vatsetsi vematanda, nevanhu veshe vanobheja kuita mbeu dzeshe dzemishando vasikaerengeki, ngwazi dzemishando

¹⁶ yomukore, sirivha, thusi nesimbi. Zvino miruka, utange mushando, naMambo Mwari aanewe.”

¹⁷ Dhavhidha wakapangawo vatungamiriri veshe vaIsuraeri, kuti vadetsere Soromoni mukororo wake echiti,

¹⁸ “Mambo Mwari, Mwari wenyu aanemwipi here? Aazi kumupa kunyarara here kundau dzeshe? Ngokuti wakapa munyara dzangu avo veshe vanogara munyika; nenyika yakanyiswa pamberi paMambo Mwari nepamberi pevanhu vake.

¹⁹ Zvino emesai mwoyo yenyu nomweya yenyu kutsvaka Mambo Mwari, Mwari wenyu. Endai muake mhatso yakachena yaMambo Mwari, Mwari, kuti muunzemwo bhokisi rechitenderano chaMambo Mwari, nezvidziyo zvakachena zvaMwari, mumhatso inozoakirwa zina raMambo Mwari.”