1 MaKro. 21 - Bhaibheri Rakachena muChindau

Dhavhidha Unoerenga Vanhu vaIsuraeri

¹ Sathani wakamukira Isuraeri, akamusa Dhavhidha kuti aerenge vanhu vaIsuraeri.

² Ndizvo Dhavhidha wakati kunaJoabhi nokunduna dzehondo, “Endai mwooerenga vaIsuraeri, mubvire ngeBheerishebha metsa mugume Dhani; muunze mushumo kwendiri kuti ndizie uwandu hwavo.”

³ Asi Joabhi wakapingura, akati, “Mambo Mwari ngaawandise uwandu hwevanhu vake ngezana rakapetwa kupinda zvino! Andivopi, makosi wangu mambo, veshe pamwepo varanda vamambo wangu? Ngenyi zvino mambo wangu unodirenyi kuti abvunze ichi? Ngenyi echida kuunza kushaisha padera paIsuraeri?”

⁴ Asi izwi ramambo rakakurira Joabhi. Ndizvo Joabhi wakaenda, wakapinda ngomukati mwenyika dzeshe dzaIsuraeri, wakapetuka Jerusarema.

⁵ Joabhi wakaronzera Dhavhidha uwandu hwevanhu. MuIsuraeri mweshe vaiya miriyoni rimwe nezana rimwe remakumi emazana (1,100,000) avo vaikona kurwa ngeshoti, nomuJudha mwaiya nemazana marongomuna nemakumi manomwe emakumi emazana (470,000) vaikona kurwa ngeshoti.

⁶ Asi aazi kuerenga vaRevhi nevaBhenjamini mukuerenga uku, ngokuti izwi ramambo kunaJoabhi raiya chinyangadzo.

⁷ Asi Mwari wakanyangadzwa ngeichi chiro; ndizvo wakachaya vaIsuraeri.

⁸ Dhavhidha wakati kunaMwari, “Ndashaisha kakurutu, ngokuti ndaita ichi chiro. Asi zvino, ndinokupota, dusa kushaisha kwomuranda wako; ngokuti ndaita ngoupenzi.”

⁹ Mambo Mwari wakaereketa kunaGadhi, mufemberi waDhavhidha echiti,

¹⁰ “Enda, wooronzera Dhavhidha wechiti, ‘Unoronza izvi Mambo Mwari: Ndinozokupa zviro zvitatu; tsanangura chimwe chazvo kuti ndichiite kwouri.’ ”

¹¹ Ndizvo Gadhi wakauya kunaDhavhidha, akati kwaari, “Mambo Mwari unoronza izvi, ‘Tsanangura iwewe:

¹² Kuti kuapo makore matatu enzara; nokuti mwedzi mitatu yokutambudzwa ngemagaa ako, ngenguvayo shoti yemagaa ako inozomubaya; nokuti mazuva matatu inemwi shoti yaMambo Mwari, kuronza, nhenda inotyisa munyika, nengirosi yaMambo Mwari iuraye mukati mwenyika yaIsuraeri yeshe.’ Zvino nasa kupinimidza kuti izwinyi rendinozopingura uwo wandituma.”

¹³ Zvino Dhavhidha wakati kunaGadhi, “Ndahahairwa kakurutu: ngandiwire munyara dzaMambo Mwari, ngokuti nyasha dzake ihurutu yaamho; asi ndisawira munyara dzavanhu.”

¹⁴ Ndizvo Mambo Mwari wakatumira nhenda inotyisa padera pevaIsuraeri; navo vakafapo vanhu vaIsuraeri makumi manomwe emakumi emazana (70,000).

¹⁵ NaMwari wakatuma ngirosi muJerusarema kooriparadza; asi apo ooda kuriparadza, Mambo Mwari wakaringira, wakakunukuka kubva kunokushata ukwo; wakati kunengirosi yokuparadza, “Zvakwana! Pfinyisa nyara yako.” Ngirosi yaMambo Mwari zvino yaiya yakaema pambuwa yokupurira yaOrinani muJebhusi.

¹⁶ Dhavhidha wakaringira, akaona ngirosi yaMambo Mwari yakaema pakati pedenga nenyika, ineshoti yakashwamurwa munyara yayo, yakatambanudzirwa padera peJerusarema. Zvino Dhavhidha nevakuru vakapfeka masaka, vakawa pashi ngehope dzavo.

¹⁷ NaDhavhidha wakati kunaMwari, “Andinipi here ndakapanga kuti vanhu vaerengwe? Ndini ndakashaisha, ndakaita zvakashata ngegwinyiso. Asi aya makwai akashaishenyi? Ndinokupota, A Mambo Mwari, Mwari wangu, nyara yako ngaigare padera pangu nepadera pemhatso yababa angu; asi haiwa kuti nhenda igare padera peava vanhu.”

¹⁸ Zvino ngirosi yaMambo Mwari yakapanga Gadhi kuti aronzere Dhavhidha, kuti akwire kooakira Mambo Mwari arita pandau yembuwa yaOrinani muJebhusi.

¹⁹ Ndizvo Dhavhidha wakakwira kudai ngokuronza kwaGadhi, ukwo kwaakaereketa ngezina raMambo Mwari.

²⁰ Orinani wakaringira sure, akaona ngirosi; naapo vakororo vake varongomuna vaiya naye vakadzihwarisa ngokwavo, Orinani wakaangira kupura koroni.

²¹ Naapo Dhavhidha aguma kunaOrinani, Orinani wakaringira, akaona Dhavhidha; wakabuda kubva pambuwa, akakotamira pashi hope yake kuremeredza Dhavhidha.

²² Dhavhidha wakati kunaOrinani, “Ndipe iyi ndau yembuwa, kuti ndiakirepo arita kunaMambo Mwari; ipe kwendiri ngomutengo wayo wakakwana, kuti nhenda inotyisa ibve pakati pevanhu.”

²³ Zvino Orinani wakati kunaDhavhidha, “Itore, namambo wangu ngaaite icho chinooneka chakanaka mukuona kwake; wona, ndinozokupa kabi kuita mudiro wokupisha, nezviro zvokupura ndizvo kuita huni, nekoroni yokuita mudiro wezviyo; ndinopa zveshe.”

²⁴ Asi mambo Dhavhidha wakati kunaOrinani, “Haiwa; asi ngegwinyiso ndinozozvitenga ngomutengo wazvo wakakwana. Andizotoreri Mambo Mwari icho chiri chako, nokuti kupira mudiro wokupisha ndisikazi kudusa mutengo wawo.”

²⁵ Ndizvo Dhavhidha wakapa kunaOrinani zvigurwa zvomukore mazana matanhatu (600) mutengo wendauyo.

²⁶ NaDhavhidha wakaakirapo Mambo Mwari arita, akapira midiro yokupisha nemidiro yokuiyanisa. Wakakumbira kunaMambo Mwari, naye wakamupingura ngomuriro wakabva mudenga ukadzaka padera pearita romudiro wokupisha.

²⁷ Zvino Mambo Mwari wakapanga ngirosi, nayo yakahwirinza shoti yayo mumakara ayo.

²⁸ Ngouwo mukuwo, zvino Dhavhidha aona kuti Mambo Mwari waiya amupingura pandau yembuwa yaOrinani muJebhusi, wakaitapo midiro.

²⁹ Ngokuti thabhenakeri raMambo Mwari, iro raakanasira Mosi mushango, nearita remidiro yokupisha, ngeiyo nguva raiya kundau dzakakwirira muGibheoni;

³⁰ asi Dhavhidha waiya asikachakoni kuenda pamberi paro koobvunza kunaMwari, ngendaa yokuti waiya echitya shoti yengirosi yaMambo Mwari.