1 MaKro. 17 - Bhaibheri Rakachena muChindau

Izwi raNathani kunaDhavhidha

¹ Zvino apo Dhavhidha agara mumhatso yake, Dhavhidha wakati kunomuprofeti Nathani, “Ringira, inini ndinogara mumhatso yemisedhari, asi bhokisi rechitenderano chaMambo Mwari rinogara pashi petende.”

² Nathani wakati kunaDhavhidha, “Ita zveshe zviri mumwoyo wako, ngokuti Mwari unewe.”

³ Asi ngousiku uhwo izwi raMambo Mwari rakaguma kunaNathani rechiti,

⁴ “Enda, wooronzera Dhavhidha muranda wangu kuti, ‘Unoronza izvi Mambo Mwari: Auzondiakiri mhatso yokuti ndigaremwo.

⁵ Ngokuti andizi kutongogara mumhatso kubvira zuva rendakabudisa Isuraeri metsa nanyamashi; asi ndakagara mutende, nomuthabhenakeri.’

⁶ Kundau dzeshe dzendakahamba pakati pevaIsuraeri ndakamboereketa izwi here kuneumwe wevatongi vaIsuraeri, avo vendakapanga kuti vaushe vanhu vangu ndechiti, ‘Amuzi kundiakira mhatso yemisedhari ngenyi?’ ”

⁷ Ndizvo zvino unozoronza kudai kunomuranda wangu Dhavhidha, “Mambo Mwari wehondo unoronza izvi: Ndakakutora kubva kumbusho dzemakwai, kubva kooteera makwai, kuti uite mutongi padera pevanhu vangu Isuraeri;

⁸ neni ndaiya ndinewe peshe pewakahamba, ndikauraya magaa ako eshe kubva pamberi pako; neni ndinozokuitira zina guru kudai ngezina revakakura vari munyika.

⁹ Ndinozoemesa ndau yevanhu vangu Isuraeri, ndinozovasima, kuti vagare mundau yavo, avachazotsukunuswizve; vaiti vezvakashata avachazovaparadzi, kudai ngokutanga,

¹⁰ kubvira panguva yendakaemesa vatongi padera pevanhu vangu Isuraeri; neni ndinozonyisa magaa ako eshe. “Zve, ndinoronzera kwouri kuti Mambo Mwari unozokuakira mhatso.

¹¹ Naapo mazuva ako akwana kuti uende kunemadzibaba ako, ndinozomirudza mibarirwana yako inoteera sure kwako, umwe wevakororo vako, neni ndinozogwinyisa umambo hwake.

¹² Unozondiakira mhatso, neni ndinozogwinyisa dendemaro rake mhera nariini.

¹³ Ndinozoita baba kwaari, naye unozoita mukororo kwendiri. Andizodusi rudo rwangu kubva kwaari, kudai ngezvendakarudusa kuneuwo waiya pamberi pako,

¹⁴ asi ndinozomugwinyisa mumhatso yangu nomuumambo hwangu mhera nariini, nedendemaro rake rinozogwinyiswa mhera nariini.”

¹⁵ Kudai ngemazwi eshe aya, nechioniso ichi, ndicho Nathani wakaereketa kunaDhavhidha.

Mukumbiro waDhavhidha woKubonga

¹⁶ Zvino mambo Dhavhidha wakapinda, akagara pamberi paMambo Mwari, akati, “Ndiri anani inini, A Mambo Mwari, Mwari, mhatso yangu chiinyi kuti undigumise kwakadai?

¹⁷ Kunyazwi neichi chaiya chiro chidoko mukuona kwako, A Mwari; ngokuti waereketawo ngendaa yemhatso yomuranda wako ngomukuwo wakareba uchauya. Newe wandierenga kudai ngomunhu unoremeredzeka, A Mambo Mwari, Mwari.

¹⁸ NaDhavhidha ungachaereketenyi kwouri kuti muranda wako aremeredzwe? Ngokuti iwewe unozia muranda wako.

¹⁹ Ngendaa yomuranda wako, A Mambo Mwari, nokudai ngendaa yomwoyo wako, wakaita izvi zveshe zviito zvakakura, kuita kuti izvi zviro zveshe zvikuru zviziikanwe.

²⁰ Akuna naumwe wakadai ndiwe, Mambo Mwari, akunazve Mwari umweni ngepabanze pako, kudai ndizvo zveshe zvetakazwa ngenzee dzedu.

²¹ Ngeriri dzinza rimweni munyika rinotodzana nevanhu vako Isuraeri, dzinza rimwe munyika iro Mwari raakaenda koosunhura kuti vaite vanhu vake, kuti udziitire zina pachako ngezviro zvikuru nezvinotyisa, ngokudzinga madzinza kubva pamberi pevanhu vako, avo vewakasunhura kubva Egipite?

²² Newe wakaita vanhu vako Isuraeri kuti vaite vako mhera nariini; newe, Mambo Mwari, ukaita Mwari wavo.

²³ “Zvino, Mambo Mwari, kudai ngeizwi rowakaereketa ngendaa yomuranda wako, nendaa yemhatso yake, ngazvigwinyiswe mhera nariini, uite kudai ngokugondisa kwako.

²⁴ Ndizvo zvino zina rako rinozogwinyiswa nokukudzwa mhera nariini, wechiti, ‘Mambo Mwari wehondo, Mwari waIsuraeri, ndiMwari waIsuraeri, nemhatso yomuranda wako Dhavhidha inozogwinyiswa pamberi pako.’

²⁵ Ngokuti iwewe, Mwari wangu, wakaonisa kumuranda wako kuti unozomuakira mhatso; ndizvo muranda wako wakatsunga kukumbira pamberi pako.

²⁶ Zvino, Mambo Mwari, iwewe uri Mwari, newe wakagondisa ichi chiro chakanaka kunomuranda wako;

²⁷ ndizvo ngachikudakadze kuti iwewe ufumise mhatso yomuranda wako, kuti iangire kugara pamberi pako mhera nariini. Ngokuti iwewe, Mambo Mwari, chounofumisa, chinofumiswa mhera nariini.”