1 MaKro. 16 - Bhaibheri Rakachena muChindau

¹ Vakaunza bhokisi rechitenderano chaMwari, vakarigadzika mukati mwetende, raakariakira Dhavhidha; vakapira midiro yokupisha nemidiro yokuiyanisa pamberi paMwari.

² Naapo Dhavhidha apedza kupira midiro yokupisha nemidiro yokuiyanisa, wakafumisa vanhu ngezina raMambo Mwari;

³ naye wakakovera kumunhu weshe muIsuraeri, vamuna nevakadzi ngokuedzanisa kuneumwe ngaumwe, mumhu wechingwa, nhindi yakanaka yenyama, nekhekhe rinemavhini akaomeswa.

⁴ Wakaemesa vamweni vevaRevhi kuti vashande pamberi pebhokisi rechitenderano chaMambo Mwari, kuti vakumbire vechidaidzira, kubonga nokukudza Mambo Mwari, Mwari waIsuraeri.

⁵ Asafi waiya mukuru, nedeedzeri rake ndiZekharia, Jeieri, Shemiramothi, Jehieri, Matithia, Eriabhi, Bhenaia, Obhedhedhomu naJeieri, vairidza magitari nezvidangari; Asafi wairidza ngoma yesimbi;

⁶ Bhenaia naJahazieri vapristi vairidza magwama pamberi pebhokisi rechitenderano chaMwari nguva dzeshe.

⁷ Zvino ngeiro zuva Dhavhidha wakaemesa kutanga Asafi nehama dzake kuembwa kwokukudza Mambo Mwari Asafi nehama dzake.

Nduyo yaDhavhidha yoKukudza

⁸ Bongai Mambo Mwari, daidzai zina rake, ziisai zviito zvake pakati pevanhu.

⁹ Embai kwaari, muembe nduyo dzokukudza kwaari, ronzai ngemishando yake yeshe inoshamisa.

¹⁰ Dakarai imwimwi ngezina rake rakachena; ngaidakare mwoyo yaavo vanotsvaka Mambo Mwari.

¹¹ Tsvakai Mambo Mwari nesimba rake, mutsvake hope yake nguva dzeshe.

¹² Karakadzai ngemishando inoshamisa yaakaita, minana yake nokutonga kwomuromo wake,

¹³ Imwimwi rudzi rwomuranda wake Isuraeri, imwimwi vana vaJakobe, vakatsanangurwa vake.

¹⁴ Ndiye Mambo Mwari, Mwari wedu; kutonga kwake kuri munyika yeshe.

¹⁵ Karakadzai ngechitenderano chake mhera nariini; izwi raakapanga kumibarirwana iri gumi remazana,

¹⁶ chitenderano icho chaakaita naAbrahama, nemhiko yechitenderano chaakagondisa kunaIsaka,

¹⁷ chaakagwinyisa kunaJakobe kuita chironzo, kunaIsuraeri kuita chitenderano chemhera nariini,

¹⁸ echiti, “Kwouri ndinozopa nyika yeKhenani, iri chikoaniswa chenhaka yenyu.”

¹⁹ Naapo vaiya vashomani, eya vashomanani vasikaerengwi mukati mwenyika nevapara munyika,

²⁰ vakapepesheka kubva kudzinza rimwe kuenda kudzinza rimweni, kubva kunamambo umwe kuenda kuvanhu vamweni.

²¹ Aazi kutendera naumwe kuvaitira zvakashata; eya, wakakaraidza madzimambo ngendaa yavo,

²² echiti, “Musagwama vakadzodzwa vangu, musaita zvakashata kuvaprofeti vangu.”

²³ Embai kunaMambo Mwari, imwimwi nyika yeshe. Chumairai ruponeso rwake zuva ngezuva.

²⁴ Teketesai mbiri yake pakati pemadzinza, mishando yake inoshamisa pakati pevanhu veshe.

²⁵ Ngokuti Mambo Mwari mukuru, naye unosisira kukudzwa kakurutu; ndiye unosisira kutyiwa padera pezvimwari zveshe.

²⁶ Ngokuti zvimwari zveshe zvevanhu miedzaniso, asi Mambo Mwari ndiye wakarura matenga.

²⁷ Uthende nokuremeredzwa zviri pamberi pake; simba nokudakara zviri pandau yake.

²⁸ Ipai kunaMambo Mwari, imwimwi mhuri dzeshe dzevanhu, ipai kunaMambo Mwari uthende nesimba.

²⁹ Ipai kunaMambo Mwari uthende hunosisira zina rake; unzai mudiro, muuye pamberi pake. Dirai Mambo Mwari muunaku hwokuchena kwake.

³⁰ Hutai pamberi pake, imwimwi nyika yeshe. Nyika yakanasa kugwinyiswa, aizotsukunuswi.

³¹ Matenga ngaadakare, nenyika ngaidakare; vanhu ngavaronze pakati pemadzinza kuti, “Mambo Mwari ndiMambo!”

³² Ruandhle ngaruungumire, nazvo zveshe zvirimwo; minda ngaikudze, nazvo zveshe zvirimwo.

³³ Zvino miti yegwasha inozoemba ngokudakara pamberi paMambo Mwari, ngokuti unouya kootonga nyika.

³⁴ Bongai Mambo Mwari, ngokuti wakanaka; ngokuti rudo rwake runogara mhera nariini.

³⁵ Ronzaiwo kuti, “Tiponese, iwewe Mwari woruponeso rwedu, utiunganidze pamwepo, utinunure kubva pakati pemadzinza, kuti tibonge zina rako rakachena, tidakare mukuirikidzwa kwako.”

³⁶ Ngaakudzwe Mambo Mwari, Mwari waIsuraeri, kubva kusingaperi kuenda kusingaperi. Zvino veshe vakati, “Ameni!” Navo vakakudza Mambo Mwari.

Kudira paJerusarema nepaGibheoni

³⁷ Dhavhidha wakasiyapo Asafi nehama dzake pamberi pebhokisi rechitenderano chaMambo Mwari, kuti vashande pamberi pebhokisi rechitenderano nguva dzeshe, kudai ngezvinosisira mishando yezuva ngezuva,

³⁸ naObhedhedhomu nehama dzake, makumi matanhatu nemasere; naapo Obhedhedhomu mukororo waJedhuthuni naHosa vaizoita varindi vemisiwo.

³⁹ Naye wakasiya Zadhoki mupristi nehama dzake vapristi pamberi pethabhenakeri raMambo Mwari mundau yakakwirira yaiya muGibheoni,

⁴⁰ kuti vapire midiro yokupisha kunaMambo Mwari paarita remidiro yokupisha nguva dzeshe, mangwanani nemadeekoni, kudai ngeizvo zveshe zvakanyorwa mumipango yaMambo Mwari kudai ngezvaakapanga vaIsuraeri.

⁴¹ Vaiya naye ndiHemani naJedhuthuni, nevamweni vakatsanangurwa avo vakadudzwa ngemazina kuti vabonge kunaMambo Mwari, ngokuti rudo rwake runogara mhera nariini.

⁴² Hemani naJedhuthuni vaiya nemagwama nengoma dzesimbi dzevairidza, nezviro zvokuemba ndwiyo dzaMwari. Vakororo vaJedhuthuni vakaemeswa kurinda misiwo.

⁴³ Zvino veshe vanhu vakapararira munhu weshe kumhatso yake, naDhavhidha wakapetuka koofumisa mhatso yake.