1 MaKro. 13 - Bhaibheri Rakachena muChindau

Bhokisi reChitenderano Rinoduswa Kubva Kiriathijearimu

¹ Dhavhidha wakapangana nenduna dzegumi remazana nedzemazana nevatungamiriri veshe.

² Dhavhidha wakati kumbungano yeshe yaIsuraeri, “Kudai kwechioneka kwakanaka kwomuri, nokuti kudai kuri kuda kwaMambo Mwari, Mwari wedu, ngatitumire kunehama dzedu dziri kundau dzeshe, dzakasara munyika yaIsuraeri, pamwepo nevapristi nevaRevhi, vari mumadhorobha awo anenyika yemafuro, kuti vauye vabatane pamwepo nesu.

³ Zvino ngatiunze bhokisi rechitenderano chaMwari wedu kwetiri; ngokuti atizi kupinimidza ngekweriri ngamazuva aSauri.”

⁴ Mbungano yeshe yakatenda kuchiita, ngokuti chaiya chiro chakanaka mukuona kwavanhu veshe.

⁵ Ndizvo Dhavhidha wakaunganidza vaIsuraeri veshe pamwepo kubvira Shihori reEgipite metsa kuguma Rebhohamathi, koounza bhokisi rechitenderano chaMwari kubva Kiriathijearimu.

⁶ NaDhavhidha navo veshe vaIsuraeri vakakwira kuenda Bhaara, ndikwo kuti Kiriathijearimu raJudha, kuti vaunze kubvapo bhokisi rechitenderano chaMwari, Mambo Mwari, uwo unogara pakati pemakherubhi, rinodaidzwa ngezina rake.

⁷ Vakatwara bhokisi rechitenderano chaMwari mungoro itsva kubva mumhatso yaAbhinadhabhi; naUza naAhio ndivo vakahambisa ngoro.

⁸ Dhavhidha nevaIsuraeri veshe vakazvina pamberi paMambo Mwari ngesimba ravo reshe, ngokuemba nokuridza zvidangari, magitari, mbira, ngoma dzesimbi nemagwama.

⁹ Naapo vaguma kumbuwa yokupurira yeKhidhoni, Uza wakatambanudza nyara yake kubata bhokisi rechitenderano, ngokuti raizunguzwa ngekabi.

¹⁰ Noushungu hwaMambo Mwari hwakabaka kunaUza; wakamuchaira pashi ngokuti wakatambanudza nyara yake kubata bhokisi rechitenderano; naye wakafapo pamberi paMambo Mwari.

¹¹ NaDhavhidha wakashishwa ngokuti Mambo Mwari waiya ahonokera Uza; ndizvo ndau iyo inodaidzwa kuti Pherezuza metsa nanyamashi.

¹² Dhavhidha wakatya Mambo Mwari ngeiro zuva echiti, “Ndinozoita maunzirenyi bhokisi rechitenderano chaMwari kanyi kwendiri?”

¹³ Ndizvo Dhavhidha aazi kuunza bhokisi rechitenderano kwaari mudhorobha raDhavhidha, asi wakapauka kuriisa mumhatso yaObhedhedhomu muGithi.

¹⁴ Bhokisi rechitenderano chaMwari rakagara mwedzi mitatu mumhatso yaObhedhedhomu naMambo Mwari wakafumisa mhatso yaObhedhedhomu nazvo zveshe zvaaiya nazvo.