1 Madzi. 8 - Bhaibheri Rakachena muChindau

Bhokisi reChitenderano Rinounzwa kuTemperi

¹ Zvino Soromoni wakaunganidza vakuru vaIsuraeri, nenduna dzeshe dzemadzinza avo, vatungamiriri vemhatso dzemadzibaba evana vaIsuraeri, pamberi pamambo Soromoni muJerusarema, kuti vaunze bhokisi rechitenderano chaMambo Mwari kubva mudhorobha raDhavhidha, rinozwi Zioni.

² Vamuna veshe vaIsuraeri vakadziunganidza kunamambo Soromoni kumushongano wokudya ngomwedzi unozwi Ethanimu, uwo uri mwedzi wechinomwe.

³ Nevakuru veshe vaIsuraeri vakauya, nevapristi vakatwara bhokisi rechitenderano.

⁴ Ndizvo vakakwidza bhokisi rechitenderano chaMambo Mwari, tende romushongano nezvidziyo zveshe zvakachena zvaiya mutende; vapristi nevaRevhi ndivo vakazvikwidza.

⁵ Mambo Soromoni nembungano yeshe yaIsuraeri, avo vaiya vakaungana pamberi pake, vaiya naye pamberi pebhokisi rechitenderano, vechipira midiro yemakwai neyekabi, idzo dzaiya dzisingaerengeki ngouwandu hwadzo.

⁶ Zvino vapristi vakapotedza bhokisi rechitenderano chaMambo Mwari pandau yaro, mundau yomukati yakachenesesa yemhatso, mundau yakapindisisa kuchena, ndau iri pashi pemaphaphiro emakherubhi.

⁷ Ngokuti makherubhi akatambanudza maphaphiro awo mairi padera pendau yebhokisi rechitenderano, kuti makherubhi afukidze bhokisi rechitenderano nemipingo yaro.

⁸ Mipingo yaiya yakarebesa kuti magumo emipingo aioneka ngomukati mwendau yakachena, nayo isikaoneki ngokubanze; ndipo peiri nanyamashi.

⁹ Mwaiya musina chiro mubhokisi rechitenderano kwega marusamba mairi emapuwe, akaiswamwo ndiMosi muHorebhi, apo Mambo Mwari paakaita chitenderano nevana vaIsuraeri, apo pevakabuda kubva munyika yeEgipite.

¹⁰ Naapo vapristi vabuda kubva mundau yakachenesesa, gore rakadzadza mhatso yaMambo Mwari,

¹¹ ndizvo vapristi avazi kuchakona kuema kuti vaite mushando ngendaa yegore; ngokuti uthende hwaMambo Mwari hwakadzadza mhatso yaMambo Mwari.

¹² Zvino Soromoni wakati, “Mambo Mwari wakaronza kuti unozogara mukudzama kwechidima.

¹³ Ndakuakira mhatso yakanaka, ndau yako yokuti ugare mhera nariini.”

Soromoni Unoereketa kuVanhu

¹⁴ Zvino mambo wakakunukuka, akafumisa mbungano yeshe yaIsuraeri, apo mbungano yeshe yaIsuraeri yakaema.

¹⁵ Wakati, “Ngaabongwe Mambo Mwari, Mwari waIsuraeri, uwo ngenyara yake wakadzadzisa izvo zvaakagondisa ngomuromo wake kunaDhavhidha baba angu, echiti,

¹⁶ ‘Kubvira pazuva rendakabudisa vanhu vangu Isuraeri kubva kunyika yeEgipite, andisati ndatsanangura dhorobha munyika dzeshe dzaIsuraeri, umwo mwendingaaka mhatso, kuti zina rangu rigaremwo; asi ndakatsanangura Dhavhidha kuti atonge padera pevanhu vangu Isuraeri.’

¹⁷ Zvino zvaiya mumwoyo mwaDhavhidha baba angu kuti aakire zina raMambo Mwari, Mwari waIsuraeri mhatso.

¹⁸ Asi Mambo Mwari wakati kunaDhavhidha baba angu: ‘Wakaita zvakanaka ngokuda mumwoyo mwako kuakira zina rangu mhatso.

¹⁹ Zvakanyadaro, auzoaki mhatso; asi mukororo wako unozobuda kubva muchiunu chako, ndiye unozoakira zina rangu mhatso.’

²⁰ Zvino Mambo Mwari wadzadzisa izwi rake raakaereketa; ngokuti inini ndamiruka pandau yaDhavhidha baba angu, ndinogara padendemaro raIsuraeri, kudai ngezvaakagondisa Mambo Mwari, ndaakira zina raMambo Mwari, Mwari waIsuraeri mhatso.

²¹ Umwo ndanasiramwo ndau yebhokisi rechitenderano, umwo munechitenderano chaMambo Mwari, icho chaakaita namadzibaba edu apo paakavabudisa kubva munyika yeEgipite.”

Mukumbiro waSoromoni

²² Zvino Soromoni wakaema pamberi paarita raMambo Mwari, mukuona kwembungano yeshe yaIsuraeri, akatambanudza nyara dzake mudenga.

²³ Wakati, “Mambo Mwari, Mwari waIsuraeri, akunazve Mwari umweni wakadai ndiwe mudenga padera nokuti munyika pashi, uwo unongwarira chitenderano norudo kuvaranda vako, avo vanohamba pamberi pako ngomwoyo wavo weshe.

²⁴ Iwewe wakangwarira kunomuranda wako Dhavhidha baba angu izvozvo zvowakamugondisa; wakagondisa ngomuromo wako, nazvo zvadzadzisika ngenyara yako nyamashi.

²⁵ Ndizvo zvino Mambo Mwari, Mwari waIsuraeri, ngwaririra muranda wako Dhavhidha baba angu icho chowakagondisa wechiti, ‘Akuzotamiki munhu mukuona kwangu wokuti agare padendemaro raIsuraeri, kudai vana vako vechizongwarira njira yavo, vahambe pamberi pangu kudai ngezvowakahamba iwewe pamberi pangu.’

²⁶ Ndizvo zvino, A Mwari waIsuraeri, ndinokupota kuti izwi rako riitike, rowakaereketa kunomuranda wako Dhavhidha baba angu.

²⁷ “Asi ngegwinyiso Mwari ungagara here munyika? Kunyazwi denga nedenga rematenga aakukwani iwewe; hino kunozoita kwakaitawani kutsonga kuneiyi mhatso yendakaaka!

²⁸ Mambo Mwari, Mwari wangu, remeredza mukumbiro womuranda wako nokupota kwake, kwaakumbira muranda wako pamberi pako nyamashi,

²⁹ kuti madziso ako abeukire kuneiyi mhatso usiku nemasikati, eya, nokuringira kundau iyo yowakaronza ndiyo kuti, ‘Zina rangu rinozoapo,’ kuti uzwe mukumbiro waanokumbira muranda wako ngeiyi ndau.

³⁰ Izwa mukumbiro womuranda wako nowevanhu vako Isuraeri, apo vanozokumbira vechiringira kuneiyi ndau; uzwe, uri mudenga mundau yako younogara; izwa, ukungurire.

³¹ “Kudai aripo munhu nokuti ngouri unendaa nomuakirwana wake, akapikiswa mhiko naye akauya akapika mhiko iyo pamberi pearita rako mumhatso iyi,

³² zvino izwa uri mudenga, uite, utonge varanda vako, uitire ndaa uwo wakashata, kuti uunzidzire kushata kwake padera pesoro rake, wechipembedza uwo wakarurama, umupe kudai ngokururama kwake.

³³ “Naapo vanhu vako Isuraeri vashaisha pamberi pako, vakanyiswa pamberi pemagaa avo, asi vechitenderukazve kwouri, vechitenda zina rako, vechikumbira, nokupota kwouri mumhatso iyi,

³⁴ zvino izwa uri mudenga, ukungurire kushaisha kwevanhu vako Isuraeri, nokuvaunzazve kunyika yowakapa kunemadzibaba avo.

³⁵ “Naapo denga rinokonywa, nemvura isikanayi, ngokuti vakashaisha kwouri, navo vechizokumbira vechiringira kuneiyi ndau, nokutenda zina rako, vechitenderuka kubva kuzvishaishi zvavo, ngokuti iwewe unovatambudza,

³⁶ zvino izwa uri mudenga, ukungurire kushaisha kwevaranda vako, vanhu vako Isuraeri, apo woovadzidzisa njira yakanaka inosisira kuti vahambe ndiyo, unayise mvura padera penyika yako yowakapa kuvanhu vako kuita nhaka yavo.

³⁷ “Kudai ikaapo nzara munyika, nhenda, chimbarara, chirotarota, ndongwe, makonye kudai magaa avo echizovakomba munyika yemadhorobha avo; kunyazwi nhenda yakaitawani, kunyazwi kurwa kwakaitawani;

³⁸ kunyazwi ngouri mukumbiro nokuti kupota kunozokumbirwa ngomunhu kunyazwi ngouri, nokuti ngevanhu vako veshe Isuraeri, weshe uwo unozia nhenda yomwoyo wake, nokutambanudzira nyara dzake kumhatso iyi,

³⁹ zvino izwa uri mudenga muugaro hwako, ukungurire, ita, ipa kuneweshe uwo wounozia mwoyo wake kudai ngezviito zvake, iwewe, ndiwe wega, unozia zviri mumwoyo womunhu weshe,

⁴⁰ kuti vakutye mazuva eshe evanopona munyika yowakapa kunemadzibaba avo.

⁴¹ “Naapo vapara, avo vasiri vevanhu vako Isuraeri, avo vanobva kunyika iri kuretu ngendaa yezina rako,

⁴² (ngokuti vanozozwa mbiri yezina rako guru, ngenyara yako inesimba nomuoko wako wakatambanudzwa) naapo mupara kuti akauya nokukumbira echiringira mhatso iyi,

⁴³ zvino izwa uri mudenga muugaro hwako, ita kudai ngeizvo zveshe zvaanokumbira mupara, kuitira kuti vanhu veshe vomunyika vazie zina rako, vakutye, kudai ngezvevanoita vanhu vako Isuraeri; kuti vazie kuti iyi mhatso yendakaaka inodaidzwa ngezina rako.

⁴⁴ “Kudai vanhu vako vechienda koorwa nemagaa avo, kunyazwi ngeiri njira younozovatuma ndivo, navo vechikumbira kunaMambo Mwari, vechiringira kuneiri dhorobha rowakatsanangura, nokumhatso iyo yendakaakira zina rako,

⁴⁵ zvino izwa uri mudenga kukumbira kwavo nokupota kwavo, urwire ndaa yavo.

⁴⁶ “Kudai vechishaisha kwouri, ngokuti akuna munhu usikashaishi, newe wechivatsenekera, nokuvapira kumagaa avo, kuti vatorwe ndivo kuita hloko kunyika yemagaa, kuretu nokuti pasinde;

⁴⁷ asi, kudai vechizokarakadza vari munyikeyo yevakatorwa kuitwa hloko nokutenderuka, vechipota kwouri vari munyika yeavo vakavatora kuita hloko vechiti, ‘Takashaisha takaita zvokupauka; takaita zvakashata;’

⁴⁸ kudai vechitenderuka kudaro kwouri ngomwoyo yavo yeshe nemweya yavo yeshe, vari munyika yemagaa avo, avo akavatora kuita hloko, vechikumbira kwouri vechiringira kuneiyi nyika, iyo yowakapa kunemadzibaba avo, dhorobha iro rowakatsanangura, nokumhatso yendakaakira zina rako,

⁴⁹ zvino izwa kukumbira kwavo nokupota kwavo, uri mudenga riri ugaro hwako, urwire ndaa yavo,

⁵⁰ ukungurire vanhu vako vakashaisha kwouri, nokupauka kweshe kwevakapauka kubva kwouri, uite kuti vaone nyasha mukuona kwaavo vakavatora kuita hloko, kuti ivo vavaitire nyasha;

⁵¹ ngokuti ava vanhu vako, venhaka yako, avo vowakabudisa kubva kunyika yeEgipite, kubva pakati pechoto chesimbi.

⁵² Madziso ako abeukire kunekupota kwomuranda wako, nokupota kwevanhu vako Isuraeri, upurutane kwevari nguva dzeshe dzevanozokumbira kwouri.

⁵³ Ngokuti iwewe wakavapaura kubva pakati pevanhu veshe venyika, kuti vaite nhaka yako, kudai ngezvewakagondisa kubudikidza ngomuranda wako Mosi, apo pewakabudisa madzibaba edu kubva munyika yeEgipite, A Mambo Mwari, Mwari.”

Mukumbiro woKugumisira

⁵⁴ Zvino apo Soromoni apedza kukumbira weshe uyu mukumbiro, nokupota kweshe kunaMambo Mwari, wakamiruka kubva pamberi pearita raMambo Mwari, paaiya akagwadama ngemabvi ake, nenyara dzake dzakatambanudzirwa mudenga;

⁵⁵ wakaema, akafumisa mbungano yeshe yaIsuraeri ngokudaidzira kukuru echiti.

⁵⁶ “Ngaabongwe Mambo Mwari, uwo wakapa kuzorora kuvanhu vake Isuraeri kudai ndizvo zveshe zvaakagondisa; apana izwi narimwe rakakorera rezvigondiso zvake zvakanaka, raakaereketa kubudikidza ngomuranda wake Mosi.

⁵⁷ Mambo Mwari, Mwari wedu, ngaagare nesu kudai ngezvaaigara namadzibaba edu; haiwa kuti atisiye, nokuti kutirekera,

⁵⁸ asi akweye mwoyo yedu kuti iringire kwaari, kuti tihambe ngenjira dzake dzeshe, nokungwarira mipango yake, zviemeso zvake nezvitongero zvake, zvaakapanga madzibaba edu.

⁵⁹ Tendera aya mazwi angu endakapota ndiwo pamberi paMambo Mwari kuti agare pasinde paMambo Mwari, Mwari wedu, masikati nousiku, naye arwire ndaa yomuranda wake, nendaa dzevanhu vake Isuraeri, kudai ngezvinodiwa ngezuva rimwe ngarimwe,

⁶⁰ kuitira kuti vanhu veshe venyika vazie kuti Mambo Mwari ndiMwari, akunazve umweni.

⁶¹ Ndizvo mwoyo yenyu ngaigare isina ndaa pamberi paMambo Mwari, Mwari wedu, kuhamba mumipango yake, nokungwarira zviemeso zvake, kudai ngezvomunoita nyamashi.”

Kupirwa kweMhatso yaMambo Mwari

⁶² Zvino mambo nevaIsuraeri veshe naye vakapira midiro pamberi paMambo Mwari.

⁶³ Soromoni wakapira kuita mudiro wokuiyanisa kunaMambo Mwari, makabi makumi mairi nemairi emakumi emazana (22,000) nezana nemakumi mairi emakumi emazana (120,000) emakwai. Ndizvo mambo nevaIsuraeri vakapira mhatso yaMambo Mwari.

⁶⁴ Ngezuva ririro mambo wakachenesa mupanda waiya pakati pemhatso, uwo waiya pamberi pemhatso yaMambo Mwari; ngokuti apo ndipo paakapira midiro yokupisha, nemidiro yezviyo, zvigurwa zvemafuta emidiro yokuiyanisa, ngokuti arita rethusi iro raiya pamberi paMambo Mwari, raiya doko risikakwani kupishirapo midiro, nemidiro yezviyo, nezvigurwa zvemafuta emidiro yokuiyanisa.

⁶⁵ Ngouwo mukuwo Soromoni wakaita dhiri, pamwepo nevaIsuraeri veshe naye, mushongano mukuru, vanhu vakabva Rebhohamathi, metsa kuguma kurwizi rweEgipite, pamberi paMambo Mwari, Mwari wedu, kupedza mazuva manomwe, eya namanomwezve, mazuva gumi namarongomuna.

⁶⁶ Ngezuva rechisere wakaparadza vanhu; navo vakakudza mambo, vakaenda kumatende avo, vechidakara nokudakadzwa mumwoyo yavo ngendaa yokunaka kweshe kwaakaita Mambo Mwari kunaDhavhidha muranda wake, nevaIsuraeri vanhu vake.