1 Madzi. 7 - Bhaibheri Rakachena muChindau

Ngome yaSoromoni

¹ Soromoni wakapedza makore gumi namatatu echiaka mhatso yake, naye wakaipedza yeshe mhatso yake.

² Wakaaka mhatso mugwasha reRebhanoni; urebu hwayo hwaiya mamitha makumi marongomuna nemarongomuna, kupamhama mamitha makumi mairi nemairi, kukwira mudenga mamitha gumi namatatu nezvidoko zvishanu, yakaakwa padera pemisara mirongomuna yesika yemisidhari, nemwamba yemisidhari yaiya padera pesika idzo.

³ Yaiya yakapfumbiwa ngemisidhari padera pemwamba makumi marongomuna nemishanu, dzaiya gumi nashanu mumusara umwe, yaiya padera pesika.

⁴ Aiyapo mafasitera mumisara mitatu, rimwe rakaringirana nerimweni mumisara mitatu.

⁵ Yeshe misiwo nesika dzepamusiwo dzaiya nemarupande marongomuna akaringirana, rimwe rakaringirana nerimweni mumisara mitatu.

⁶ Wakaita ngome ngesika; urebu hwayo hwaiya mamitha makumi mairi namairi, kupamhama kwayo kwaiya mamitha gumi namatatu nezvidoko zvishanu. Paiya neberere pamberi raiya nesika neimweni mwamba yakafema yaiya pamberi padzo.

⁷ Wakaita ngome yedendemaro rokutongerapo, inozwi ngome yokutongera ndaa, yaiya yakafukidzwa ngemapuranga emisidhari kumarutii eshe.

⁸ Mhatso yake yaaigara yaiya kuneruwanze rumweni sure kwengome, kwaiya nokuakwa kwakatodzana. Soromoni wakaakirawo mwanasikana waFaro mhatso yakatodzana neyaaigara, uwo waakatora kuita mukadzi.

⁹ Kweshe uku kuakiwa kwakaitwa ngemapuwe anomutengo mukuru, akanasirwa kudai ngokupimwa kwemapuwe akatsetswa, akasahiwa ngemasaho, sure nemberi, kubvira patsikiro kuguma pamaruriro, nokubvira ngokubanze metsa kuguma paberere guru.

¹⁰ Madzeyo aiya emapuwe anomutengo mukuru, mapuwe makuru, mapuwe amweni aiita mamitha matatu nehafu kureba, neamweni aiita mamitha marongomuna kureba.

¹¹ Padera paiya nemapuwe anomutengo mukuru, akapimwa kudai ngokupimwa kwemapuwe akatsetswa, nemwamba yemisidhari.

¹² Berere guru rakaakiwa ngemisara mitatu yemapuwe akanasirwa, nomusara wemwamba womusidhari kutenderera, kudai ngendau yomukati yemhatso yaMambo Mwari, neberere remhatso iyo.

Mushando waHiramu

¹³ Zvino mambo Soromoni wakatuma vanhu kutora Hiramu kubva Thire.

¹⁴ Waiya mukororo weshirikadzi, wedzinza raNafitari, uwo baba ake vaiya munhu weThire, mupfuri wethusi; waiya akangwara nokuzwisisa, noungwazi, kushanda mishando yeshe yethusi. Wakauya kunamambo Soromoni, akaita mishando yake yeshe.

Sika Mbiri dzeThusi

¹⁵ Wakaumba sika mbiri dzethusi. Imwe ngaimwe yaiya mamitha masere kureba kuenda mudenga; kutendenedza imwe ngaimwe yaiya mamitha mashanu nezvidoko zvitatu.

¹⁶ Wakaumba zvipanda zviiri zvethusi rakanyunguruswa, zvokugadzika sika padera pazvo; kuturama kwechimwe ngachimwe kwaiya mamitha mairi nezvidoko zviiri.

¹⁷ Wakaita mambure anematyabi esimbi nemaketani okuisa pazvipanda zvaiya padera pesika; manomwe pachipanda chimwe, nemanomwe pachipanda chimweni.

¹⁸ Wakaita sika nemisara miiri yakatenderera padera pomushando wechipanda chimwe, kufukidzira zvipanda zvaiya padera pemiedzaniso yemaphomegraniti. Wakaitazve kudaro kuchipanda chimweni.

¹⁹ Zvino zvipanda zvaiya padera pesika, izvo zvaiya padera pesika muberere zvakaitwa zvakadai ngemiedzaniso yemaruva egofa, zvaiya mitha rimwe nezvidoko zvisere kureba kuenda mudenga.

²⁰ Zvipanda zviiri zvaiya padera pesika mbiri, nepaderawo pebundu rakatenderera raiya pasinde pomushando wakanaka; panemaphomegraniti mazana mairi emisara yakatendenedza padera pechipanda chimwe.

²¹ Wakaemesa sika muberere retemperi; wakaemesa sika yokubani, akaidudza zina rokuti Jakhini; wakaemesa sika yedera, akaidudza zina rokuti Bhoazi.

²² Nepadera pesika wakanemesa ngemiedzaniso yemaruva egofa. Ndizvo mushando wesika wakapera.

Gandwa reThusi

²³ Zvino wakaaka gandwa rakatenderera ngethusi rakanyunguruswa, raiya mamitha mairi nezvidoko zviiri kudzama kubva kurutii rumwe kuguma kurutii rumweni, nokupamhama kwaro kwaiya mamitha marongomuna nezvidoko zvirongomuna; nokutenderera kwaro kwaiya mamitha gumi namatatu nezvidoko zviiri.

²⁴ Pashi paro pakanemeswa ngemafundo aiya gumi pamitha rimwe, akatendenedza gandwa reshe; mafundo akanyunguruswa anemisara miiri akaumbwa apo perakanyunguruswa.

²⁵ Rakaemeswa padera pemiedzaniso yekabi gumi nembiri, nhatu dzakaringira dera, nhatu dzakaringira kumabirirazuva, nhatu dzakaringira kubani, nhatu dzakaringira kumabvazuva; negandwa raigara padera padzo. Marupande adzo esure aiya mukati.

²⁶ Kutimba kwaro kwaiya kwakadai ngechanza chenyara yomunhu, nomuromo waro waiya wakaumbwa kudai ngomuromo wekomechi, unemiedzaniso yemaruva raikwana maritha makumi marongomuna emakumi emazana (40,000).

Ngoro dzeThusi

²⁷ Naye wakaita matsikiro gumi ethusi; urebu hwawo rimwe ngarimwe hwaiya mitha rimwe nezvidoko zvisere kureba, mitha rimwe nezvidoko zvisere kupamhama, nemitha rimwe nezvidoko zvitatu kureba kukwira mudenga.

²⁸ Uyu ndiwo mushando wematsikiro; aiya nemipendero; mipendero yaiya pakati pemushando wetsikiro;

²⁹ pamipendero yaiya pakati pakaemeswa miedzaniso yemhondoro, yekabi, nemakherubhi. Pamushando wetsikiro, peshe padera nepashi mhondoro nekabi, paiya nezvimweni zvakatutsirwa, zvakaitwa ngokutetepesa.

³⁰ Matsikiro eshe aiya nemavhiri marongomuna ethusi, nemwamba yemavhiri yethusi; pamakhona marongomuna paiya nezvitsimiso zvakaumbwa kumarutii eshe.

³¹ Muromo wacho pakati pechipanda ngepadera kwaiya masendimitha makumi marongomuna namashanu kubvira padera pengoro, nemasendimitha gumi namasere kudzama. Muromo wacho waiya wakatenderera, kudai ngetsikiro, muromo wacho waiya wakabiribidwa, nemipendero yacho yaiya nemakhona marongomuna, haiwa akatenderera.

³² Mavhiri marongomuna aiya ngepashi pematsikiro, mwamba wemavhiri waiya muzvitsimiso; kuturama kwevhiri kwaiya masendimitha makumi matanhatu nematanhatu kukwira mudenga.

³³ Kunasirwa kwemavhiri kwaiya kwakatodzana nokunasirwa kwevhiri rengoro; mwamba wemavhiri, simbi dzemavhiri nemasipokisi awo, zveshe zvaiya zvethusi rakanyunguruswa.

³⁴ Kwaiyapozve zvitsimiso zvirongomuna kumakhona etsikiro rimwe ngarimwe; nezvitsimiso zvaro zvaiya zvorupande rwetsikiro.

³⁵ Nepadera petsikiro paiya nedendenedzwa raiya masendimitha makumi mairi namairi kutenderera; padera petsikiro, mafundo aro nemipendero yaro zvaiya zvimwezvo.

³⁶ Padera pakaterama nepazvitsimiso zvaro, nepamipendero yaro, wakarinangurira miedzaniso yemakherubhi, yemhondoro, neyemibvumo, kudai ngomuemo hwazvo, nezvimweni kuatendenedza.

³⁷ Munjira iyi wakaitazve matsikiro gumi, eshe pamwepo kunyunguruswa kwawo kwakaitwa ngenjira imweyo, nechipimo chimwecho, nokuedzana kumwekwo.

³⁸ Wakaita zvidziyo gumi zvethusi; chidziyo chimwe ngachimwe chaiya nemitha rimwe nezvidoko zvisere kukura kwacho, chechitwara maritha mazana masere (800); paiya nechidziyo chimwe patsikiro rimwe ngarimwe rematsikiro gumi.

³⁹ Wakaisa matsikiro mashanu ngokubani kwemhatso, nemashanu ngedera kwemhatso, akaemesa gandwa ngorutii rwokubani kwemhatso ngokumabvazuva.

Midziyo yeshe yomuMhatso yaMwari

⁴⁰ Hiramu wakaitawo mapoto, mafoshoro, nemabhasini. Ndizvo Hiramu wakapedza mishando yeshe yaakaitira Soromoni mumhatso yaMambo Mwari:

⁴¹ sika mbiri, nezvigadzikiro zviiri zvezvipanda zvaiya padera pesika mbiri, nemambure mairi aiya nematyabi okufukidzira zvigadzikiro zvezvipanda padera pesika;

⁴² nemiedzaniso yemaphomegraniti mazana marongomuna emambure mairi, misara miiri yemaphomegraniti omumbure umwe, kufukidza zvigadzikiro zviiri zvezvipanda zvaiya padera pesika;

⁴³ matsikiro gumi, nezvidziyo gumi zvokushambiramwo zvaiya padera pematsikiro;

⁴⁴ gandwa rimwe, nemiedzaniso yekabi gumi namiiri ngepashi pegandwa.

⁴⁵ Hari, mafoshoro, nemabhasini, zveshe izvi zvidziyo zvakaitirwa mhatso yaMambo Mwari ndiHiramu kunamambo Soromoni, zvaiya zvethusi rinon'anikira.

⁴⁶ Murubaya rweJorodhani mambo wakazviumba, ngemavhu edongo ngepakati peSukothi neZarethani.

⁴⁷ Soromoni wakasiya asikazi kupima zvidziyo zveshe, ngokuti zvaiya zvakanyanya kuwanda; nokurema kwethusi akuzi kuziikanwa.

⁴⁸ Ndizvo Soromoni wakaita zvidziyo zveshe zvaiya mumhatso yaMambo Mwari: arita romukore, tafura romukore, apo paiiswa zvingwa zvisina mumera,

⁴⁹ zvigadzikiro zvezvibani zvomukore wakaera, zvishanu ngokubani, zvishanu ngedera, pamberi pendau yakachenesesa, pamwepo nemiedzaniso yemaruva, zvibani, nembato dzomukore;

⁵⁰ mikheyo, zvifuridzo, mabhasini, ndiro dzokuisa mutombo unegwema rakanaka, ndiro dzomuriro dzomukore wakaera; nemahinjisi omukore, eshe emisiwo yepakati, nendau yakapindisisa kuchena, neyemisiwo yemhatso yomukati yetemperi.

⁵¹ Ndizvo wakapera weshe mushando wamambo Soromoni waakaitira mhatso yaMambo Mwari. Soromoni wakaunza mukati zviro zvaakapira Dhavhidha baba ake kunaMwari, sirivha, mukore, nezvidziyo, wakazvingwarira pakati poupfumi hwemhatso yaMambo Mwari.