1 Madzi. 6 - Bhaibheri Rakachena muChindau

Soromoni Unoaka Temperi

¹ Mugore remazana marongomuna nemakumi masere (480) ngesure kwokubuda kwevana vaIsuraeri kubva Egipite, ngegore rechirongomuna rokutonga kwaSoromoni padera paIsuraeri, mumwedzi unozwi Zivhi ndiwo mwedzi wechipiri, waakatanga kuaka mhatso yaMambo Mwari.

² Mhatso yaakaakira Mambo Mwari mambo Soromoni, kureba kwayo kwaiya mamitha makumi mairi nemanomwe, kupamhama kwayo kwaiya mamitha mapfumbamwe, nourebu hwayo kukwira mudenga hwaiya mamitha gumi namatatu nehafu.

³ Berere ngepamberi petemperi remhatso, kureba kwaro kwaiya mamitha marongomuna nehafu, kupamhama kwaro mamitha mapfumbamwe pamberi pemhatso.

⁴ Wakaitira mhatso mafasitera akapamhama kubanze, mukati akatetepa.

⁵ Wakaakazve ngepamarukumbati emhatso makamera kuitendenedza, zveshe temperi nendau yakachenesesa; wakaaka makamera kuitendenedza.

⁶ Nekamera raiya ngepashi, kupamhama kwaro kwaiya mamitha mairi nezvidoko zviiri, nekamera romuturika wepakati, kupamhama kwaro kwaiya mamitha mairi nezvidoko zvinomwe, nomuturika wepadera wechitatu waiya mamitha matatu nechidoko chimwe kupamhama kwaro; ngokuti kutenderera ngokubanze kwemhatso wakaaka sika dzokutendenedza kumarutii eshe kuti mwamba isungirwe pamarukumbati emhatso.

⁷ Mhatso yakaakwa ngemapuwe akanasirirwa ngepamberi asati aunzwa; ngokudaro akuzi kuzwika bope rehamera nokuti redemo nokuti rechokushanda ndicho chesimbi, apo mhatso yechiakwa.

⁸ Musiwo womuturika wepakati waiya ngokurupande rwokubani kwemhatso; rakakwira danho raitendenedza kuenda kumuturika wepakati, nokubva mumuturika wepakati yaikwira ngokudaro kuenda kumuturika wechitatu.

⁹ Ndizvo wakaaka mhatso, akaipedza; wakapfumba mhatso ngemwamba yemapuranga omusidhari.

¹⁰ Wakaaka makamera ngomumarutii eshe emhatso, kukura kwawo kwaiya mamitha mairi nezvidoko zviiri kuenda mudenga, akabatanidzwa nemhatso ngepadera ngemiti yemisidhari.

¹¹ Zvino izwi raMambo Mwari rakaguma kunaSoromoni rechiti,

¹² “Ngendaa yemhatso iyi younoaka, kudai wechizohamba muzviemeso zvangu, kupurutana mipango yangu, nokungwarira zvironzo zvangu zveshe ngokuhamba mukati mwazvo, zvino ndinozogwinyisa chigondiso changu newe, chendakaereketa kunaDhavhidha baba ako.

¹³ Ndinozogara pakati pevana vaIsuraeri, andizovasiyi vanhu vangu Isuraeri.”

Kunemeswa kweMukati mweTemperi

¹⁴ Ndizvo Soromoni wakaaka mhatso, akaipedza.

¹⁵ Wakanemesa marukumbati emhatso ngomukati ngemapuranga omusidhari; kubvira ngepashi pemhatso, metsa kumwamba yomudenga mwayo, wakaafukidza ngomukati mwayo ngemapuranga; akafukidza pashi pemhatso ngemapuranga omusiprasi.

¹⁶ Wakaaka mamitha mapfumbamwe okureba kwekamera ngesure kwemhatso ngemapuranga emisidhari, kubvira pashi kukwira kuguma pamwamba, naye wakaaka iyi ngomukati mwakachena kuita ndau yakapindisisa kuchena.

¹⁷ Mhatso, ndiro temperi, iri pamberi pendau yakapindisisa kuchena, yaiya mamitha gumi nemasere kureba.

¹⁸ Misidhari yaiya mumhatso yakanemeswa ngemafundo nemaruwa akabeuka; zveshe zvakaitwa ngomusidhari, pasina buwe raioneka.

¹⁹ Ndau yakachenesesa wakainasira mukati mwemhatso, kuti agadzikemwo bhokisi rechitenderano chaMambo Mwari.

²⁰ Ndau yakachenesesa yomukati yaiya mamitha mapfumbamwe kureba kwayo mamitha mapfumbamwe kupamhama kwayo, nemamitha mapfumbamwe kukwira mudenga; naye wakaiseta ngomukore wakaera. Wakasetawo arita raiya romusidhari.

²¹ Soromoni wakaseta mhatso ngomukore mukati mwayo; zvino wakaisa maketani omukore kuchinjika pamberi pendau yakachenesesa, akaiseta ngomukore.

²² Wakaseta mhatso yeshe ngomukore, kuti mhatso iite yakaperera; kunyazwi arita reshe romukati mwakachena wakariseta ngomukore.

²³ Mundau yakachenesesa wakaita makherubhi mairi ngomuti womuorivhi, rimwe ngarimwe raiya mamitha marongomuna nezvidoko zvirongomuna kureba kuenda kudenga.

²⁴ Phaphiro rimwe rekherubhi raiya mamitha mairi nezvidoko zviiri kureba, nerimweni raiya nemamitha mairi nezvidoko zviiri; kubvira kumagumo kwephaphiro rimwe kuguma pamagumo kunerimweni kwaiya mamitha marongomuna nezvidoko zvirongomuna.

²⁵ Kherubhi rimweni raiya mamitha marongomuna nezvidoko zvirongomuna; makherubhi eshe aiya nechipimo chimwecho nechiemo chimwecho.

²⁶ Urebu hwekherubhi rimwe hwaiya mamitha marongomuna nezvidoko zvirongomuna, nerimweni racho ngokudaro.

²⁷ Wakagadzika makherubhi mumhatso yomukati iri pakati; namakherubhi akatambanudza maphaphiro kuti phaphiro rimwe rigwame rukumbati rumwe, nephaphiro rerimweni rigwame rukumbati rumweni, nemaphaphiro epakati pemhatso agwamane phaphiro paphaphiro.

²⁸ Wakasetawo makherubhi ngomukore.

²⁹ Wakanemesa marukumbati eshe emhatso ngemiedzaniso yakatsetswa yemakherubhi, neyemiti yomubvumo, namaruva akabeuka, mukati mwayo nokubanze kwemakamera.

³⁰ Pashi mumhatso wakaseta ngomukore mukati nokubanze mwemakamera.

³¹ Pamusiwo pendau yakachenesesa wakaita zvivhayo ngomuti womuorivhi; nechigogiso nesika dzokurutii dzaiya nemarupande mashanu omukati.

³² Wakaseta zvivharo zviiri zvomuti womuorivhi ngezvinemeso zvemiedzaniso yemakherubhi, miti yemibvumo nemaruwa akabeuka, wakaiseta ngomukore, akaparadzira mukore padera pemakherubhi, nepemiti yemibvumo.

³³ Ndizvo wakaitazve sika dzomusiwo wetemperi ngomuti womuorivhi dzinoita marupande marongomuna imwe ngaimwe.

³⁴ Zvivhayo zviiri zvaiya zvemiti yomusiprasi; marupande mairi echivhayo chimwe aipetwa pamwepo, nemarupande echivhayo chimweni aipetwawo.

³⁵ Wakanangurapo miedzaniso yemakherubhi, miti yemibvumo nemaruva akabeuka; wakazviseta ngomukore wakanasa kuiswa, padera pezvakanangurwa.

³⁶ Wakaaka makamera omukati anemisara mitatu yemapuwe akatsetswa, nomusara wemwamba yemisidhari.

³⁷ Mugore rechirongomuna mumwedzi unozwi Zivhi, madzeyo emhatso yaMambo Mwari akaiswa.

³⁸ Mugore regumi narimwe mumwedzi unozwi Bhuri, ndiwo mwedzi wechisere, mhatso yakapera, marupande ayo eshe, kudai ngechiemo cheyaisisira kuakwa ndicho.Wakaiaka ngemakore manomwe.