1 Madzi. 5 - Bhaibheri Rakachena muChindau

Soromoni Unonasirira Kuaka Temperi

¹ Zvino Hiramu mambo weThire wakatuma varanda vake kunaSoromoni, naapo paakazwa kuti vaiya vakamudzodza kuita mambo pandau yababa ake; ngokuti Hiramu waiya mungani waDhavhidha nguva dzeshe.

² Soromoni wakatumira izwi kunaHiramu echiti,

³ “Iwewe unozia kuti Dhavhidha baba angu avazi kukona kuakira mhatso zina raMambo Mwari, Mwari wake, ngendaa yokurwisana nemagaa ake akamutendenedza, metsa Mambo Mwari aaisa pashi petsoka dzake.

⁴ Asi zvino Mambo Mwari, Mwari wangu, wakandipa kuzorora kumarutii eshe; apana gaa nokuti kushata.

⁵ Ndizvo ndaemesa kuakira zina raMambo Mwari, Mwari wangu, mhatso, kudai ngezvaakaereketa Mambo Mwari kunababa angu Dhavhidha echiti, ‘Mukororo wako wendinozoemesa padendemaro rako, muugaro hwako, iye unozoakira zina rangu mhatso.’

⁶ Ndizvo zvino, vapange kuti vanditemere miti yomusedhari muRebhanoni. Varanda vangu vanozobatana pamwepo nevaranda vako, neni ndinozokupa kunyazwi mutengonyi kudai ndizvo zveshe zvounozoemesera varanda vako; ngokuti unozia kuti akuna kwetiri ngwazi yokutsetsa miti kudai ngevaSidhoni.”

⁷ Naapo Hiramu azwa mazwi aSoromoni, wakadakara kakurutu, akati, “Ngaakudzwe Mambo Mwari nyamashi, uwo wakapa kunaDhavhidha mukororo wakangwara wokutonga ava vanhu vazhinji.”

⁸ Hiramu wakatumira izwi kunaSoromoni echiti, “Ndakazwa mashoko owakatumira kwendiri; neni ndinozoita chidisiso chako ngendaa yemiti yemisidhari, nendaa yemiti yemisiprasi.

⁹ Varanda vangu vanozoiunza kubva Rebhanoni vaiise kuruandhle; ndinozoita kuti isungwe, iuyeyo ngomuruandhle ngokuerera kuguma pandau younoronza. Ndinozoita kuti isunhurirwepo uitorerepo. Newe unozoita kudai ngezvinodiwa ngomwoyo wangu ngokupa kudya kunevaranda vemhatso yangu.”

¹⁰ Ndizvo Hiramu wakaunzira Soromoni miti yemisidhari nemiti yemisiprasi iyo yaaida.

¹¹ Soromoni wakapa Hiramu mametrikhi thanisi makumi emazana mairi (2,000) ekoroni, kuita kudya kwevanhu vake, nemabiya emafuta maritha mazana marongomuna emakumi emazana (400,000) akaengiwa. Soromoni wakapa izvi kunaHiramu gore ngegore.

¹² Ndizvo Mambo Mwari wakapa Soromoni ungwaru, kudai ngezvaakamugondisa. Kwaiyapo kunyarara pakati paHiramu naSoromoni; navo vairi vakaita chitenderano.

¹³ Mambo Soromoni wakaemesa chikomondera kuvaIsuraeri veshe; neiyo zheti yaiya vamuna makumi matatu emakumi emazana (30,000).

¹⁴ Wakavatumira Rebhanoni gumi remakumi emazana (10,000) evanhu jana ngejana; vaipedza mwedzi vari Rebhanoni, nokupedza mwedzi miiri kanyi. Adhoniramu waiya nduna yezheti.

¹⁵ Soromoni waiya nevanhu makumi manomwe emakumi emazana (70,000) vaitwara mitwaro, nemakumi masere emakumi emazana (80,000) evaitsetsa mapuwe munyika yemitunhu,

¹⁶ ngepabanze penduna huru dzaSoromoni, idzo dzaibata mushando, vaiya makumi emazana matatu nemazana matatu (3,300), vaitonga padera pevanhu veshe vaishanda.

¹⁷ Ngokupanga kwamambo vakaunza mapuwe makuru anomutengo mukuru, kuti vaite madzeyo emhatso ngemapuwe akatsetswa.

¹⁸ Ndizvo vaaki vaSoromoni nevaHiramu, pamwepo nevaGebhari, vakanasira miti nemapuwe kuti vaake mhatso.