1 Madzi. 3 - Bhaibheri Rakachena muChindau

Soromoni Unokumbira Ungwaru

¹ Soromoni wakaiyana naFaro, mambo weEgipite; akatora mwanasikana waFaro, akamuunza mudhorobha raDhavhidha, metsa apedza kuaka mhatso yake, nemhatso yaMambo Mwari, norukumbati rwaitendenedza Jerusarema.

² Vanhu vaipira midiro pandau dzakakwirira, ngokuti paiya pasina mhatso yaiya yakaakirwa zina raMambo Mwari, metsa kumazuva awo.

³ Soromoni wakamuda Mambo Mwari, echihamba ngezviemeso zvaDhavhidha baba ake; kwega kuti wakapira midiro yokupisha zvinonuhwira pandau dzakakwirira.

⁴ Mambo wakaenda Gibheoni koopirayo mudiro, ngokuti ndiyo yaiya ndau huru yakakwirira. Soromoni wakapira paarita iro midiro gumi remazana.

⁵ MuGibheoni Mambo Mwari wakaoneka kunaSoromoni usiku mukurota; Mwari wakati kwaari, “Kumbira chounoda ndinozokupa.”

⁶ NaSoromoni wakati, “Iwewe wakaonisa nyasha huru kunomuranda wako Dhavhidha baba angu, ngokuti wakahamba pamberi pako mukugondeka nomukururama kwomwoyo wake kwouri; newe wakamungwaririra urwu rudo rukurutu newe wakamupa mukororo kuti agare padendemaro rake nyamashi.

⁷ Nazvino, A Mambo Mwari, Mwari wangu, wakaita kuti muranda wako aite mambo padendemaro raDhavhidha baba angu, kunyazwi inini ndiri mwana mudoko; andizii kubuda kubanze nokuti kupotera.

⁸ Muranda wako uri pakati pevanhu vako, avo vowakatsanangura, vanhu vazhinji, vasikaerengeki ngouwandu.

⁹ Ndizvo ipa kunomuranda wako mwoyo unokuzwisisa kuti nditonge vanhu vako, kuti ndikone kutsanangura pakati pezvakanaka nezvakashata; ngokuti ndiani ungakona kutonga vanhu vako ava vakadai kuwanda?”

¹⁰ Zvakadakadza Mambo Mwari kuti Soromoni wakakumbira chiro ichi.

¹¹ Mwari wakati kwaari, “Ngokuti wakumbira ichi chiro, usikazi kudzikumbirira kupona kwakareba, nokuti auzi kudzikumbirira upfumi, nokuti kukumbira kufa kwamagaa ako, asi wadzikumbirira ngokwako kungwara kuti uzie kutonga kwakarurama,

¹² ringira zvino, ndaita kudai ngokuronza kweizwi rako. Ngegwinyiso ndinokupa mwoyo unokuzia nokuzwisisa; ngokudaro kwaiya kusina naumwe wakadai ndiwe nakamwe, kunyazwi unoteera sure kwako akuna unozodai ndiwe.

¹³ Zve, ndakakupa icho chiro chousikazi kukumbira, zveshe upfumi nokuremeredzwa; akuna naumwe unozoedzana newe pakati pemadzimambo mazuva eshe okupona kwako.

¹⁴ Kudai wechizohamba ngenjira dzangu, wechingwarira zvironzo zvangu nezviemeso zvangu, kudai ngezvaakazvingwarira baba ako Dhavhidha, zvino ndinozowanza mazuva okupona kwako.”

¹⁵ Zvino Soromoni wakamuka; ringira, kwaiya kurota. Wakauya Jerusarema, apo paakaema pamberi pebhokisi rechitenderano chaMambo Mwari. Wakapa midiro yokupisha, akapazve midiro yokuiyanisa, akaitira varanda vake veshe dhiri.

Soromoni Unotonga Ndaa Yakakonza

¹⁶ Zvino vakauya vakadzi vairi, vaiya mahure, kunamambo, vakaema pamberi pake.

¹⁷ Mukadzi umwe wakati, “Ndapota mambo wangu, inini nouyu mukadzi tinogara mumhatso imweyo; neni ndakabereka mwana, arimwowo mumhatso.

¹⁸ Zvino ngesure kwemazuva matatu okubereka kwangu, uyu mukadzi wakaberekawo. Taiya pamwepo; paiya pasina umweni mumhatsomwo, taiya tiri vairi tega mumhatso.

¹⁹ Zvino mwana wouyu mukadzi wakafa usiku, ngokuti wakamutsikirira.

²⁰ Wakamuka pakati pousiku, naye wakatora mwana wangu kubva paditi pangu, apo muranda wako akaata. Wakamuisa paditi pake, akaisa mwana wake wakafa paditi pangu.

²¹ Naapo ndamuka mangwanani kuamwisa mwana wangu, ndakaona kuti waiya afa; asi apo ndamuringisisa, ndakaona kuti aasiri mwana wangu akadi, wendakabereka.”

²² Asi mukadzi umweni wakati, “Haiwa, uwo unopona ngowangu, nouwo wakafa ngowake.” Noumweni wakati, “Haiwa, uwo wakafa ngowake, nouwo unopona ngowangu.” Ukwo ndikwo kuereketa kwevakaita pamberi pamambo.

²³ Zvino mambo wakati, “Umwe unoti, ‘Uwo uchapona ngowangu, wako ngowafa;’ noumweni unoti, ‘Azvizi kudaro, wakafa ngowako, wangu ngouchapona.’ ”

²⁴ Ndizvo mambo wakati, “Ndiunzire shoti.” Navo vakaunza shoti pamberi pamambo.

²⁵ Mambo wakati, “Badzura mwana unopona ngepakati, upe rupande kunoumwe norupande rumweni kunoumweni.”

²⁶ Asi mudzimai uwo waiya nomwana uchapona, ngokuti mwoyo wake wakapisha ngendaa yomwana wake, wakati kunamambo, “Ndapota, A mambo wangu, mupei mwana uchaponawo, ngegwinyiso musamuuraya!” Umweni wakati, “Eya, asaita wangu nokuti wako, asi ngaabadzurwe.”

²⁷ Zvino mambo wakapingura echiti, “Ipa mwana uchapona kumukadzi wokutanga, usamuuraya. Ndiye mai vomwanawo.”

²⁸ VaIsuraeri veshe vakazwa kutonga kwamambo; navo vakatya mambo, ngokuti vakaona kuti ungwaru hwaMwari hwaiya mwaari mukutonga kwakarurama.