1 Madzi. 22 - Bhaibheri Rakachena muChindau

Muprofeti Mikhaia Unonyowedza Ahabhi

¹ Kwakapera makore matatu kusina kurwa pakati pevaAramu navaIsuraeri.

² Asi ngegore rechitatu Jehoshafati mambo waJudha wakadzaka kunamambo waIsuraeri.

³ Mambo waIsuraeri wakati kunevaranda vake, “Amuzii here kuti Ramothigireadhi ngeredu, asi isusu takanyarara, atizi kuritora kubva munyara yamambo waAramu?”

⁴ Wakati kunaJehoshafati, “Unotenda here kuenda neni koorwa hondo paRamothigireadhi?” Jehoshafati wakati kunamambo waIsuraeri, “Inini ndakadaiwo ndiwe, vanhu vangu vakadai ngevako, nemahachi angu akadai ngaako.”

⁵ Asi Jehoshafati wakati kunamambo waIsuraeri, “Bvunza, ndapota, kuzwa izwi raMambo Mwari nyamashi.”

⁶ Zvino mambo waIsuraeri wakaunganidza vaprofeti pamwepo, vaida kukwana mazana marongomuna (400), wakati kwevari, “Ndingaenda here koorwa neRamothigireadhi, nokuti ndirekere?” Vakati, “Kwirayo, ngokuti Mambo Mwari unozoripira munyara yamambo.”

⁷ Asi Jehoshafati wakati, “Akuna here muprofeti umweni waMambo Mwari ngokubanze kwaava, tibvunze kwaari?”

⁸ Mambo waIsuraeri wakati kunaJehoshafati, “Uchiripo munhu umwe, Mikhaia mukororo waImira, uwo wetingabvunza ndiye kunaMambo Mwari; asi ndinomuzonda, ngokuti aaprofeti zviro zvakanaka ndini, asi zvakashata.” Jehoshafati wakati, “Mambo asaronza chiro kudaro.”

⁹ Zvino mambo waIsuraeri wakadaidza muranda wake, akati, “Ngaakasire kuuya pano Mikhaia mukororo waImira.”

¹⁰ Zvino mambo waIsuraeri naJehoshafati mambo waJudha vaiya vakagara veshe pamadendemaro avo, vakapfeka zvokufuka zvavo, vari pambuwa pamusiwo weSamaria. Vaprofeti veshe vakaprofeta pamberi pavo.

¹¹ Zedhekia mukororo waKhenaana wakadzinasirira nyanga dzesimbi; naye wakati, “Unoronza izvi Mambo Mwari: Ngeidzi unozotunga vaAramu metsa vapedzwa.”

¹² Veshe vaprofeti vakaprofeta zvimwezvo vechiti, “Kwira uende Ramothigireadhi unyise; ngokuti Mambo Mwari unozoripa munyara yamambo.”

¹³ Nhumwa iyo yakatumwa koodaidza Mikhaia yakaereketa naye yechiti, “Ringira zvino, mazwi evaprofeti akapangidzira zvakanaka kunamambo ngokuereketa kunotodzana; mazwi ako, ndapota, ngaadai ngoumwe wavo, uerekete izvo zvakanaka.”

¹⁴ Asi Mikhaia wakati, “Kudai ngezvaanopona Mambo Mwari, izvo zvaanoronza Mambo Mwari kwendiri, ndizvo zvendinozoereketa.”

¹⁵ Naapo paakauya kunamambo, mambo wakati kwaari, “Mikhaia, kwakanaka here kuti tikwire koorwa Ramothigireadhi, nokuti tisaenda?” Naye wakamupingura kuti, “Eya, enda, unonyisa; ngokuti Mambo Mwari unozoripa munyara yamambo.”

¹⁶ Asi mambo wakati kwaari, “Kunozoita mikuwo minganai yendinozokupanga kuti undironzere zvinegwinyiso zvega ngezina raMambo Mwari?”

¹⁷ Naye wakati, “Ndakaona vaIsuraeri veshe vakapararira pamitunhu kudai ngemakwai asina muushi; naMambo Mwari wakati, ‘Avana mungwariri, ngavapetuke munhu weshe kumhatso yake.’ ”

¹⁸ Mambo waIsuraeri wakati kunaJehoshafati, “Andizvopi zvendakaronza here kuti aazoprofeti zvakanaka ndini, asi zvakashata?”

¹⁹ Zvino Mikhaia wakati, “Ndizvo izwai izwi raMambo Mwari: Ndakaona Mambo Mwari akagara padendemaro rake roumambo, nehondo yeshe yomudenga yakaema pasinde pake ngokumudyo kwake nokumuoshwe.

²⁰ NaMambo Mwari wakati, ‘Ndiani unozonyengerera Ahabhi kuti akwire Ramothigireadhi aurawe?’ Zvino umwe wakamupingura ngenjira iyi, noumweni wakamupingura ngenjira imweni,

²¹ metsa kwakabudapo mweya, wakaema pamberi paMambo Mwari, ukati, ‘Inini ndinozomunyengerera.’

²² Mambo Mwari wakati kwaari, ‘Ngenjiranyi?’ Wakati, ‘Ndinozobuda, ndiite mweya wokunyepa pamiromo yeshe yevaprofeti vake.’ Zvino Mambo Mwari wakati, ‘Iwewe unozomunyengera, unozobudirira; buda, uite kudaro.’

²³ Ndizvo ringira, Mambo Mwari waisa mweya wokunyepa pamiromo yeava vaprofeti vako veshe; Mambo Mwari wakaereketa zvakashata ndiwe.”

²⁴ Zvino Zedhekia mukororo waKhenaana wakakwira pasinde paMikhaia, wakamuchaya parutsaya echiti, “Mweya waMambo Mwari wakaenda ngenjiranyi kubva kwendiri kooereketa newe?”

²⁵ Mikhaia wakati, “Ringira, unozoona ngezuva rounozoenda koodzifisha mukamera romukati.”

²⁶ Mambo waIsuraeri zvino wakapanga, wakati, “Bata Mikhaia, uhwirire naye kunaAmoni mungwariri wedhorobha, nokunaJoashi mukororo wamambo.

²⁷ Uronze kuti, ‘Izvi ndizvo zvinoronza mambo: Isai uyu munhu mutirongo, umugutise ngokudya nemvura zvakatsonzwa, metsa ndauya mukunyarara.’ ”

²⁸ Mikhaia wakati, “Kudai ukapetuka mukunyarara, Mambo Mwari aazi kuereketa kubudikidza ndini.” Naye wakati, “Izwai imwimwi vanhu mweshe!”

Kufa kwaAhabhi

²⁹ Ndizvo mambo waIsuraeri naJehoshafati mambo waJudha vakakwira Ramothigireadhi.

³⁰ Mambo waIsuraeri wakati kunaJehoshafati, “Ndinozoita kuti ndisaziikanwa kuti ndipinde mukurwa; asi iwewe pfeka zvoumambo zvako.” Ndizvo mambo waIsuraeri wakadziitisa kudai ngomunhu nhando, wakapinda mukurwa.

³¹ Zvino mambo weAramu wakapanga nduna dzake dzengoro dzaiya makumi matatu nembiri echiti, “Musarwa nomunhu mudoko nokuti mukuru, asi irwai namambo waIsuraeri.”

³² Naapo nduna dzengoro dzaona Jehoshafati, dzakati, “Ngegwinyiso ndiye mambo waIsuraeri!” Ndizvo vakapauka kwaari kurwa naye; naJehoshafati wakaboorera.

³³ Naapo nduna dzaona kuti waiya asiri mambo waIsuraeri, vakarekera kumurumbirira.

³⁴ Asi munhu umweni wakatera kuposheramwo musee wake, wakafura mambo waIsuraeri ngepaditi rake, ngepanosungirwa ganga utari rake; ndizvo wakati kunomutinhi wengoro yake, “Petudza ngoro sure, unditware kubva kuhondo; ngokuti ndaremadzwa.”

³⁵ Hondo yakarwiwa kakurutu ngeiro zuva, namambo waiya akagara mungoro yake akaringirana navaAramu, wakafa kwabira; nengazi yakaerera kubva kumaronda ake kuenda mukati mwengoro.

³⁶ Zvino zuva rooda kubira kwakazwika kudaidzira mukati mwehondo kwechizwi, “Munhu weshe ngaapararire kuenda kudhorobha rake, nomunhu weshe ngaaende kunyika yake!”

³⁷ Ndizvo mambo wakafa, naye wakaunzwa Samaria. Vakamutsira mambo muSamaria.

³⁸ Vakageza ngoro mugandwa reSamaria; nembwa dzakanambura ngazi yake, mahure akashambamwo mungazi, kudai ngemazwi aakaereketa Mambo Mwari.

³⁹ Zvino mishando imweni yaAhabhi, nazvo zveshe zvaakaita, nemhatso yenyanga dzenzou yaakaaka, nemadhorobha eshe aakaaka, azvizi kunyorwa here muBhuku reMishando yeZuva ngeZuva yeMadzimambo aIsuraeri?

⁴⁰ Ndizvo Ahabhi wakaata nemadzibaba ake; naAhazia mukororo wake wakatonga pandau yake.

Mambo Jehoshafati weJudha

⁴¹ Jehoshafati mukororo waAsa wakatanga kutonga padera paJudha mugore rechirongomuna raAhabhi mambo waIsuraeri.

⁴² Jehoshafati waiya nemakore makumi matatu namashanu apo paakatanga kutonga, naye wakatonga makore makumi mairi namashanu muJerusarema. Zina ramai ake raizwi Azubha, mwanasikana waShirihi.

⁴³ Wakahamba ngenjira dzeshe dzaAsa baba ake; aazi kupauka kubva kwedziri, echiita izvo zvakanaka mukuona kwaMambo Mwari; asi zvakanyadaro, ndau dzakakwirira adzizi kuduswa, nevanhu vakaangira kupira nokupisha mitombo inegwema rakanaka pandau dzakakwirira.

⁴⁴ Jehoshafati wakaiyana namambo waIsuraeri.

⁴⁵ Zvino mishando imweni yaJehoshafati, nesimba rake raakapangidzira, nokurwa kwake, azvizi kunyorwa here muBhuku reMishando yeZuva ngeZuva yeMadzimambo aJudha?

⁴⁶ Naavo vaiita chishaishi cheSodhoma vakasara ngemazuva ababa ake Asa, wakavabvisa munyika.

⁴⁷ Kwaiya kusina mambo munyika yeEdhomu ngouwo mukuwo; asi nduna ndiyo yaitonga.

⁴⁸ Jehoshafati wakaita ngarava dzakadai ngedzeTharshishi kuti dziende Ofiri kootora mukore; asi adzizi kuenda, ngokuti ngarava dzakaputsika paEzionigebha.

⁴⁹ Zvino Ahazia mukororo waAhabhi wakati kunaJehoshafati, “Tendera varanda vangu ngavaende nevaranda vako mungarava,” asi Jehoshafati aazi kutenda.

⁵⁰ Jehoshafati wakaata nemadzibaba ake mudhorobha raDhavhidha baba ake; Jehoramu mukororo wake wakatonga pandau yake.

Mambo Ahazia weIsuraeri

⁵¹ Ahazia mukororo waAhabhi wakatanga kutonga Isuraeri muSamaria ngegore regumi nemanomwe raJehoshafati mambo waJudha; wakatonga makore mairi padera paIsuraeri.

⁵² Wakaita zvakashata mukuona kwaMambo Mwari, akahamba ngenjira yababa ake nomunjira yamai ake, nomunjira yaJerobhoamu mukororo waNebhati, uwo wakaita kuti Isuraeri ashaishe.

⁵³ Wakashandira Bhaari, akamudira; akamusira ushungu hwaMambo Mwari, Mwari waIsuraeri, kudai ndizvo zveshe zvaakaita baba ake.