1 Madzi. 21 - Bhaibheri Rakachena muChindau

Munda weMivhini waNabhothi

¹ Ngesure kweizvi zviro, zvinoteera zvakaitika: Nabhothi muJezireeri waiya nomunda wemivhini waiya muJezireeri, pasinde nengome yaAhabhi mambo weSamaria.

² NaAhabhi wakati kunaNabhothi, “Ndipe munda wako wemivhini, kuti uite wangu ndisime muriwo, ngokuti uri pasinde pemhatso yangu; ndinozokupa munda wemivhini wakapinda kunaka pandau pouwo, nokuti dai zvechioneka zvakanaka kwouri, ndinozokupa mutengo wawo wemare.”

³ Asi Nabhothi wakati kunaAhabhi, “Mwari ngaarambidze kuti ndisapa nhaka yemadzibaba angu kwouri.”

⁴ Ahabhi wakapotera mumhatso yake echiremerwa, asikadakari ngendaa yeizwi raakaereketa Nabhothi muJezireeri kwaari; ngokuti waiya akati kwaari, “Andizokupi nhaka yemadzibaba angu.” Ndizvo wakaata pashi pamubhedhi wake, wakafuratira hope yake, aazi kudya nechokudya.

⁵ Jezebheri mukadzi wake wakauya kwaari, akati kwaari, “Mwoyo wako unotambudzika kudai ngenyi, kuti audi kudya?”

⁶ Naye wakati kwaari, “Ngokuti ndakaereketa kunaNabhothi muJezireeri, ndikati kwaari, ‘Ndipe munda wako wemivhini, nditenge ngemare; nokuti wechida ndinozokupa munda umweni wemivhini pandau pawo;’ asi wakapingura echiti, ‘Andizokupi munda wangu wemivhini.’ ”

⁷ Mukadzi wake Jezebheri wakati kwaari, “Andiwepi here mutongi, mambo waIsuraeri? Miruka, udye kudya, kuti mwoyo wako udakare; inini ndinozopa munda wemivhini waNabhothi muJezireeri kwouri.”

⁸ Ndizvo wakanyora tsamba ngezina raAhabhi, wakaisa chinamatiso chaAhabi padera padzo, wakatumira tsamba idzo kuvakuru, nokunevakuru vaigara mudhorobha rake raaigara Nabhothi.

⁹ Wakanyora mutsamba echiti, “Emesa kuera kudya, mwechikudza Nabhothi pakati pendau iri padera mukati mwevanhu veshe.

¹⁰ Muemese vanhu vairi madzongoni pamberi pake, vechiita zvapupu ndiye kuti, ‘Iwewe wakatuka Mwari namambozve.’ Naapo munozomutora, mumuponde ngemapuwe kuti afe.”

¹¹ Vanhu veguta iro, vakuru nevatungamiriri, vagari vedhorobha rake vakaita kudai ngezvaakatuma kwevari Jezebheri, nokudai ngezvaiya zvakanyorwa mutsamba dzakatumirwa kwevari.

¹² Vakaemesa kuera kudya, vakaemesa Nabhothi pandau iri padera mukati mwevanhu.

¹³ Vakauya vanhu vairi, madzongoni, vakagara pamberi pake; nevanhu ava madzongoni vakaitira ndaa Nabhothi pamberi pevanhu vechiti, “Nabhothi wakatuka Mwari namambo.” Ndizvo vakamubudisa kubanze kwedhorobha, vakamuponda ngemapuwe, wakafa.

¹⁴ Navo vakatumira izwi kunaJezebheri vechiti, “Nabhothi wapondwa ngemapuwe, wafa.”

¹⁵ Ngokukasira apo Jezebheri azwa kuti Nabhothi waiya apondwa ngemapuwe, nokuti wafa, Jezebheri wakati kunaAhabhi, “Miruka, uende utore munda wemivhini waNabhotti muJezireeri, uwo waairamba nawo kutengesa kwouri ngemare; ngokuti Nabhothi aachaponi, asi wafa.”

¹⁶ Naapo Ahabhi azwa kuti Nabhothi waiya afa, Ahabhi wakamiruka kudzaka kumunda wemivhini waNabhothi muJezireeri kooutora.

¹⁷ Zvino izwi raMambo Mwari rakauya kunaErija muThishibhe rechiti,

¹⁸ “Miruka, udzake kooshongana naAhabhi mambo waIsuraeri, uri muSamaria; ringira, uri mumunda wemivhini waNabhoti iyo kwaakadzaka kooutora.

¹⁹ Unozoereketa kwaari wechiti, ‘Unoronza izvi Mambo Mwari: Wakauraya here, nokutorazve?’ Newe unozoereketa kwaari wechiti, ‘Unoronza izvi Mambo Mwari: Pandau yedzakanambura imbwa ngazi yaNabhothi, naapo imbwa dzinozonamburawo ngazi yako.’ ”

²⁰ Ahabhi wakapingura Erija echiti, “Wazondiona, iwewe gaa rangu here?” Naye wakapingura, “Eya, ndakuona, ngokuti iwewe wakadzitengesa kuita zvakashata mukuona kwaMambo Mwari.

²¹ Ringira, ndinozounza kushata padera pako, ndinozopedza mibarirwana yako, ndechiuraya kubva kunaAhabhi vamuna veshe, vakasungwa nevakasunhurika, vakasara muIsuraeri.

²² Ndinozoita kuti mhatso yako idai ngemhatso yaJerobhoamu mukororo waNebhati, nokudaizve ngemhatso yaBhaasha, mukororo waAhija, ngendaa yokumusa kwewakamusa ushungu hwangu ndikwo, nokuita kuti vaIsuraeri vashaishe.

²³ Zve, ngendaa yaJezebheri, Mambo Mwari wakaereketa ndiye echiti, ‘Imbwa dzinozodya Jezebheri parukumbati rweJezireeri.’

²⁴ Nouwo weshe uri waAhabhi unozofa mudhorobha unozodyiwa ngembwa, nouwo unozofa mumashango unozodyiwa ngeshiri dzomudenga.”

²⁵ Ngegwinyiso paiya pasina munhu wakadai ndiAhabhi, uwo wakadzitengesa kushanda zvakashata mukuona kwaMambo Mwari, uwo wakamuswa ngomukadzi wake Jezebheri.

²⁶ Wakaita zvinonyangadza ngokuteera miedzaniso yokudira, kudai ngokuita kweshe kwavaAmori, vaakadzinga Mambo Mwari kubva pamberi pevana vaIsuraeri.

²⁷ Naapo Ahabhi azwa mazwi aya, wakabaura zvokufuka zvake, akadzipfekesa machira emasaka, akaera kudya, akaata mumasaka, echidzipfaisa.

²⁸ Zvino izwi raMambo Mwari rakaguma kunaErija muThishibhe rechiti,

²⁹ “Waona here njira yaadzipfaisa ndiyo Ahabhi pamberi pangu? Ngokuti wadzipfaisa pamberi pangu, andizounzi kushata ukwo ngemazuva ake; asi ngemazuva omukororo wake ndinozounza kushata ukwo padera pemhatso yake.”