1 Madzi. 19 - Bhaibheri Rakachena muChindau

Erija paMutunhu weSinai

¹ Ahabhi wakaronzera Jezebheri izvo zveshe zvaakaita Erija, nokuuraya kwaakaita vaprofeti ngeshoti.

² Zvino Jezebheri wakatuma nhumwa kunaErija echiti, “Ndizvo zvimwari ngazviite kudaro kwendiri nokupinda, kuti ndisikazoiti kuti kupona kwako kudai ngoumwe waavo, usati waguma mukuwo uno mangwani.”

³ Zvino wakatyiswa; wakamiruka, akatiza kuti adziponese, akaguma Bheerishebha raJudha, wakasiyapo muranda wake.

⁴ Asi iye pachake wakahamba muhambo wezuva rimwe mushango, wakaguma, akagara pashi pomuti unoitwa mutsvairo. Wakadzikumbirira kuti afe echiti, “Zvakwana; zvino, A Mwari, dusa kupona kwangu, ngokuti andizi kururama kupinda madzibaba angu.”

⁵ Zvino wakaata pashi pomuti unoitwa mutsvairo. Ngokukasira, ngirosi yakamugwama, yakati kwaari, “Muka, udye.”

⁶ Wakaringira, naapo raiyapo khekhe rakabikwa pamasimbe, nejomeya remvura dera kwesoro rake. Wakadya nokumwa, wakauya kuatazve.

⁷ Ngirosi yaMambo Mwari yakauyazve ngokwechipiri, yakamugwamazve yechiti, “Muka, udye, ngokuti muhambo wako mukuru.”

⁸ Wakamuka, akadya nokumwa; wakahamba ngesimba roukwo kudya mazuva makumi marongomuna, nousiku makumi marongomuna, kuenda kumutunhu waMwari unozwi Horebhi.

⁹ Wakaguma pandaupo paiya nebako, wakagaremwo usiku hweshe. Zvino, izwi raMambo Mwari rakauya kwaari rechiti, “Unoitenyi pano, Erija?”

¹⁰ Wakati, “Ndaiya ndechishandira yaamho Mambo Mwari, Mwari wehondo; ngokuti vana vaIsuraeri vakarasha chitenderano chako, vakaputsira pashi maarita ako, vakauraya vaprofeti vako ngeshoti. Inini, inini ndega ndini ndasara; navo vanotsvaka kundiuraya.”

¹¹ Wakati, “Buda, ueme padera pomutunhu pamberi paMambo Mwari; ringira, Mambo Mwari uchapinda ngeapapo.” Dutu guru rinesimba rakamwesa mitunhu, rechiputsa mapuwe kuita zvigurwa pamberi paMambo Mwari; asi Mambo Mwari waiya asirimwo mudutu. Ngesure kwedutu kwaiyapo kuzungunyika kwenyika; asi Mambo Mwari waiya asirimwo mukuzungunyika kwenyika.

¹² Ngesure kwokuzungunyika kwenyika, kwakauya muriro; asi Mambo Mwari waiya asirimwo mumuriro. Ngesure kwomuriro kwakauya maungira ekaizwi kadoko.

¹³ Naapo Erija azwa, wakafukidza hope yake ngechokufuka chake, wakabuda, akaema pamusiwo webako. Zvino rakauya izwi kwaari rechiti, “Unoitenyi pano, Erija?”

¹⁴ Wakati, “Ndaiya ndechishandira yaamho Mambo Mwari, Mwari wehondo; ngokuti vana vaIsuraeri vakarasha chitenderano chako, vakaputsira pashi maarita ako, vakauraya vaprofeti vako. Inini, inini ndega ndini ndasara; navo vanotsvaka kupona kwangu, kundiuraya.”

¹⁵ Zvino Mambo Mwari wakati kwaari, “Enda, uhwirire ngenjira yako inoenda ngomushango reDhamasekusi; naapo wagumayo, unodzodza Hazaeri kuita mambo weAramu.

¹⁶ Zve Jehu mukororo waNimishi unozomudzodza kuita mambo waIsuraeri; naErisha mukororo waShafati weAbherimehora unozomudzodza kuita muprofeti pandau yako.

¹⁷ Kunyazwi ndiani uwo unopokonyoka kubva kushoti yaHazaeri, unozourawa ndiJehu; nayezve unopokonyoka kubva kushoti yaJehu, unozourawa ndiErisha.

¹⁸ Asi ndichasiya vakasara vari kwendiri muIsuraeri makumi emazana manomwe (7,000), avo vasikazi kugwadama ngemabvi avo kunaBhaari, nemiromo yavo yeshe isikazi kumuchingamidza ngomuromo.”

Kudaidzwa kwaErisha

¹⁹ Ndizvo ngokudaro wakabvapo, wakaona Erisha mukororo waShafati, echirima ngen'ombe dzemajoka gumi namairi pamberi pake, iye waiya nedzegumi nambiri. Erija wakapinda ngepasinde pake, wakakandira bhachi rake padera pake.

²⁰ Wakasiya kabi dzake, wakarumba kuteera Erija, akati, “Nditendere, ndinokupota, kuti ndiende ndivhaise baba angu namai, naapo ndinozokuteera.” Zvino Erija wakati kwaari, “Hwirirazve; ndaitenyi kwouri?”

²¹ Wakahwirira sure kubva kwaari, wakatora kabi mbiri, wakadziuraya; akabika nyama ngezviro zvinoshandiswa ngen'ombe, wakapa kuvanhu navo vakadya. Naapo wakateera Erija, akamushandira.