1 Madzi. 18 - Bhaibheri Rakachena muChindau

Erija neVaprofeti vaBhaari

¹ Ngesure kwemazuva mazhinji, izwi raMambo Mwari rakauya kunaErija mugore rechitatu rokuoma, rakati, “Enda, udzipangidzire kunaAhabhi; neni ndinozonaisa mvura padera penyika.”

² Ndizvo Erija wakaenda koodzipangidza pachake kunaAhabhi. Yaiyapo nzara huru muSamaria.

³ Ahabhi wakadaidza Obhadhia, uwo waiya mutongi wengome yake. (Zvino Obhadhia waitya Mambo Mwari kakurutu.

⁴ Naapo Jezebheri echiuraya vaprofeti vaMambo Mwari, Obhadhia wakatora vaprofeti zana, akavafisha ngezvikwata zviiri, makumi mashanu mubako rimwe, akavaburira chingwa nemvura.)

⁵ Zvino Ahabhi wakati kunaObhadhia, “Enda, uhambe ngomunyika kuzvinyuka zveshe zvemvura, nokumikova yeshe; pamweni tingaona mwenje wokuponesa mahachi nemanyurusi, kuti tisarashikirwa ngezvifuyo zvimweni.”

⁶ Ndizvo wakakoanisirana nyika pakati pavo, kuti vahambe ngomukati mwayo. Ahabhi wakaenda ngenjira imweni pachake, naObhadhia wakaenda ngenjira imweni pachake.

⁷ Naapo Obhadhia ari munjira, wakashongana naErija, naye wakamuzia, wakawa pashi ngehope yake echiti, “Ndiwe here, mambo wangu Erija?”

⁸ Naye wakati, “Ndini! Enda, uronzere mambo wako wechiti, ‘Erija waapano.’ ”

⁹ Naye wakati, “Ndakaita mashaishirenyi inini, kuti kupire muranda wako munyara dzaAhabhi, kuti andiuraye?

¹⁰ Kudai ngezvaanopona Mambo Mwari, Mwari wako, akuna dzinza nokuti umambo apo paasikazi kutuma munhu mambo wangu kukutsvaka; naapo vakati, ‘Aari pano akadi;’ waipikisa mhiko iro dzinza noumambo uhwo kuti avazi kukuona.

¹¹ Asi zvino iwewe unoti, ‘Enda, uronzere mambo wako’ kuti, ‘Ringira, Erija uri pano.’

¹² Naapo ndaenda kubva kwouri, Mweya waMambo Mwari unozokutwara nokukuisa kundau yendisikazii; ndizvo apo ndoouya ndamuronzera Ahabhi, naye aazokuoni, unozondiuraya, kunyazwi inini muranda wako ndinotya Mambo Mwari kubvira kuutsva hwangu.

¹³ Mambo wangu aazi kuronzerwa here ngeizvo zvendakaita ngemazuva apo Jezebheri paakauraya vaprofeti vaMambo Mwari, ngenjira yendakavafisha ndiyo mubako, ndechivaburira chingwa nemvura?

¹⁴ Asi zvino unoti, ‘Enda uronzere mambo wako kuti, ringira Erija waa pano;’ ngegwinyiso unozondiuraya.”

¹⁵ Erija wakati, “Kudai ngezvaanopona Mambo Mwari wehondo, uwo wendinoema pamberi pake, ngegwinyiso ndinodzionisa kwaari nyamashi.”

¹⁶ Ndizvo Obhadhia wakaenda kooshongana naAhabhi, akamuronzera; naAhabhi wakaenda kooshongana naErija.

¹⁷ Naapo Ahabhi aona Erija, Ahabhi wakati kwaari, “Ndiwe here, mutambudzi waIsuraeri?”

¹⁸ Wakapingura echiti, “Andizi kutambudza Isuraeri, asi ndiwe nevemhatso yababa ako, ngokuti mwakasiya mipango yaMambo Mwari, kuteera miedzaniso yaBhaari.

¹⁹ Ndizvo zvino, ndiunganidzire veshe vaIsuraeri paMutunhu Kharmeri, vaprofeti veshe vaBhaari mazana marongomuna namakumi mashanu (450), nevaprofeti vemakwasha mazana marongomuna (400), avo vanodya patafura raJezebheri.”

²⁰ Ndizvo Ahabhi wakatuma vanhu kuvana vaIsuraeri veshe, akavaunganidza pamwepo vaprofeti padera poMutunhu Kharmeri.

²¹ Erija zvino wakauya kunevanhu veshe, wakati, “Munozogara mukuwo wakaitawani pakati pemipinimidzo miiri? Kuti Mambo Mwari ari Mwari, muteerenyi; asi kuti ari Bhaari, zvino muteererenyi.” Vanhu avazi kumupingura neizwi.

²² Zvino Erija wakati kunevanhu veshe, “Inini, eya, inini ndega ndasara ndiri muprofeti waMambo Mwari; asi vaprofeti vaBhaari vamuna mazana marongomuna nemakumi mashanu (450).

²³ Ngavatipe mikono miiri; ngavadzitsanangurire mukono umwe, vautematema kuita zvigurwa, vauise padera pehuni, vasaisa muriro pashi padzo; neniwo ndinozonasira mukono umweni, ndechiuisa padera pehuni, ndisikaisiwo muriro.

²⁴ Zvino mukumbire ngezina rechimwari chenyu, neni ndinozokumbira ngezina raMambo Mwari; naMwari uwo unozopingura ngomuriro, ngegwinyiso ndiye Mwari.” Vanhu veshe vakapingura vechiti, “Zvanasa kuronzwa!”

²⁵ Zvino Erija wakati kunevaprofeti vaBhaari, “Tsanangurai pachenyu mukono umwe, muunasirire kutanga, ngokuti muri vazhinji; zvino mukumbire ngezina rechimwari chenyu, asi musaisa muriro pashi pawo.”

²⁶ Ndizvo vakatora mukono wakapuwa kwevari, vakaunasirira, vakakumbira ngezina raBhaari kubvira mangwanani metsa masikati vechiti, “A Bhaari, tipingure!” Asi kwaiya kusina izwi haro, nokuti mupinguro. Vakanyandukira padera pearita rakaakwa.

²⁷ Masikati Erija wakavaitira jee echiti, “Zhambararai! Ngegwinyiso chimwari; pamweni chinopinimidza, nokuti chakabatika, nokuti chiri murwendo, nokuti pamweni chakaata, chinotama kumuswa.”

²⁸ Zvino vakazhambarara kakurutu, vechidzicheka ngemapanga nemikhondo kudai ngemishuma yavo, metsa ngazi yabuda padera pavo.

²⁹ Masikati makuru apera, vakaprofeta metsa mukuwo wokupisha mudiro wemadeekoni, asi kwaiya kusina neizwi haro, nokuti mupinguro, nokuti unopurutana.

³⁰ Zvino Erija wakati kunevanhu veshe, “Kwedzerai kwendiri,” nevanhu veshe vakakwedzera kwaari. Kutanga wakanasirira arita raMambo Mwari, raiya rakaputsirwa pashi.

³¹ Erija wakatora mapuwe gumi namairi, kudai ngouwandu hwevana vaJakobe, rakauya kwaari izwi raMambo Mwari rechiti, “Isuraeri ndiro rinozoita zina rako.”

³² Ngemapuwe awo wakaaka arita ngezina raMambo Mwari. Zvino wakatsa mugero unotendenedza arita, unokwanisa kutwara maritha emvura gumi nemarongomuna.

³³ Zvino wakaronga huni, akatematema mukono, akauisa padera pehuni. Wakati, “Dzadzai mabiya marongomuna emvura, muidururire padera pomudiro wokupisha, nepadera pehuni.”

³⁴ Zvino wakati, “Itai izvi kairi,” vakazviita ngokwechipiri. Akatizve, “Itai ngokwechitatu;” navo vakazviita kwechitatu.

³⁵ Ndizvo mvura yakaerera kutendenedza arita, yakadzadzawo mugero ngemvura.

³⁶ Ngomukuwo wokupira mudiro wemadeekoni, Erija muprofeti wakakwedzera pasinde, wakati, “A Mambo Mwari, Mwari waAbrahama, waIsaka nowaIsuraeri, ngaakuziikanwe nyamashi kuti iwewe uri Mwari waIsuraeri, nokuti inini ndiri muranda wako, nokuti ndaita izvi zveshe ngeizwi rako.

³⁷ Ndipingure, A Mambo Mwari, ndipingure kuti ava vanhu vazie kuti iwewe Mwari uri Mambo Mwari, nokuti watenderudzazve mwoyo yavo kwouri.”

³⁸ Zvino muriro waMambo Mwari wakadzaka, wakapedza mudiro wokupisha, huni, mapuwe, bukuta nemvura yaiya mumugero.

³⁹ Naapo vanhu veshe vazviona, vakawa pashi ngehope dzavo, vakati, “Mambo Mwari ngegwinyiso ndiye Mwari; Mambo Mwari ngegwinyiso ndiye Mwari.”

⁴⁰ Erija wakati kwevari, “Batai vaprofeti vaBhaari, musarekera naumwe wavo kuti apone.” Zvino vakavabata; naErija wakavaunza kurwizi rinozwi Kishoni, wakavaurayapo.

Magumo oKuoma kweNyika

⁴¹ Erija wakati kunaAhabhi, “Zvino kwira, idya nokumwa; ngokuti chiripo chaungu chemvura yakawanda inoerera.”

⁴² Ndizvo Ahabhi wakakwira koodya nokumwa. Erija wakakwira padera poMutunhu Kharmeri, wakadzigwadamisa pashi pamavhu, wakatsikitsira hope yake pakati pemabvi ake.

⁴³ Wakati kunomuranda wake, “Kwira zvino, uringire kuruandhle.” Wakakwira, wakaringira, akati, “Akuna chiro.” Zvino wakati, “Hwirirazve, metsa wakwira mikuwo minomwe.”

⁴⁴ Ngomukuwo wechinomwe wakati, “Ringira, gore doko risikazi kukura kupinda nyara yomunhu rinokwira kubva kuruandhle.” Zvino wakati, “Kwira, uronzere Ahabhi kuti, ‘Sungira ngoro yako udzake, kuti usazobatwa ngemvura.’ ”

⁴⁵ Ngomukuwo mudoko denga rakasvipa ngemakore nedutu; kwaiyapo mvura yakakura. Ahabhi wakahamba ari mungoro yake, wakaguma Jezireeri.

⁴⁶ Asi nyara yaMambo Mwari yaiya padera paErija, naye wakasungisa chiunu chake, wakarumba kupindira Ahabhi, wakaguma pamusiwo waJezireeri.