1 Madzi. 17 - Bhaibheri Rakachena muChindau

Erija neMakore oKuoma

¹ Zvino Erija muThishibhe uwo waiya weThishibhe muGireadhi wakati kunaAhabhi, “Kudai ngezvaanopona Mambo Mwari, Mwari waIsuraeri, wendinoema pamberi pake, akuzoapo beto nokuti mvura makore aya, ngepabanze peizwi rangu.”

² Izwi raMambo Mwari rakauya kwaari rechiti,

³ “Miruka, ubve pano, uende ngokumabvazuva, udzifishe pasinde pechinyuka chinozwi Kherithi, chiri pamberi paJorodhani.

⁴ Unozomwa kubva kuchinyuka, neni ndapanga makungu kuti akupepo kudya.”

⁵ Ndizvo wakaenda, wakaita kudai ngokuronza kwaMambo Mwari; wakaenda, akagara pachinyuka chinozwi Kherithi, pamberi paJorodhani.

⁶ Makungu akamuunzira chingwa nenyama mangwanani, nechingwa nenyama madeekoni; naye wakamwa pachinyuka.

⁷ Asi ngesure kwemazuva chinyuka chakaoma, ngokuti kwaiya kusina mvura yainaya munyika.

Erija neShirikadzi muZarefathi

⁸ Zvino izwi raMambo Mwari rakauya kwaari rechiti,

⁹ “Miruka, uende Zarefathi, dhorobha raSidhoni, ugarepo; ringira, ndakapanga shirikadzi yeapo kuti ikuburire.”

¹⁰ Ndizvo wakamiruka, wakaenda Zarefathi. Naapo apotera pamusiwo wedhorobha, wakaona shirikadzi yaiyapo yechitheza huni; naye wakadaidza kweiri echiti, “Ndichererewo mvura, ndapota, shomani muchidziyo, kuti ndimwe.”

¹¹ Naapo ichaenda kooichera, wakadaidzira kweiri echiti, “Undiunzire kachingwa munyara yako, ndapota.”

¹² Asi yakati, “Kudai ngezvaanopona Mambo Mwari, Mwari wako, andina chingwa, asi tsimba youfu muhari, nezvimafuta zvidoko mujomeya; ringira, ndinotheza zvihuni zvishomani kuti ndiende kanyi, ndidzibikire inini nomukororo wangu, kuti tidye, techitofa.”

¹³ Erija wakati kweiri, “Usatya; enda, uite kudai ngezvowaronza; asi ndibikire inini kutanga ndihwo kachingwa, uchiunze kwendiri, ngesure wechidzibikira iwewe nomukororo wako.

¹⁴ Ngokuti unoronza izvi Mambo Mwari, Mwari waIsuraeri, hari youfu aizoperi, nokuti jomeya remafuta arizoperi, metsa rigume zuva raanonaisa mvura Mwari padera penyika.”

¹⁵ Wakaenda, akaita kudai ngezvaakaronza Erija; iye naErija navo veshe mumhatso yake vakadya mazuva akawanda.

¹⁶ Hari youfu aizi kupera, zve, nejomeya remafuta arizi kupera, kudai ngezvakaronza izwi raMambo Mwari, raakaereketa kubudikidza ndiErija.

¹⁷ Ngesure kweizvo zviro, mukororo weshirikadzi mune wemhatso wakarwara; nokurwara kwake kwakanyanyisa metsa akuna nomweya wakasara mwaari.

¹⁸ Naye zvino wakati kunaErija, “Ndinenyi newe, iwewe munhu waMwari? Wakauya pano here kundicherechedzisa zvishaishi zvangu, nokuuraya mukororo wangu?”

¹⁹ Asi wakati kweiri, “Ndipe mwana wako.” Wakamutora kubva paditi rake, wakakwira naye mukamera repadera, apo paaigara, akamuradzika pamubhedhi wake.

²⁰ Wakakumbira kunaMambo Mwari echiti, “A, Mambo Mwari, Mwari wangu, ngegwinyiso wakaunza here kushata kuneiyi shirikadzi yendinogara kweiri, ngokumuuraira mukororo wake?”

²¹ Naye wakadzitambanudza katatu padera pomwana, wakakumbira kunaMambo Mwari echiti, “A, Mambo Mwari, Mwari wangu, ndinokupota, mweya wouyu mwana ngauuyezve kwaari.”

²² Mambo Mwari wakazwa izwi raErija, nomweya womwana wakauyazve kwaari, naye wakamuka.

²³ Erija wakatora mwana, wakadzaka naye kubva mukamera repadera kumuisa mumhatso, wakamupa kunamai ake; zvino Erija wakati, “Wona, mukororo wako unopona.”

²⁴ Ndizvo mukadzi wakati kunaErija, “Zvino ngeizvi ndinozia kuti iwewe uri munhu waMwari, nokuti izwi raMwari riri mumuromo wako ngegwinyiso.”