1 Madzi. 16 - Bhaibheri Rakachena muChindau

¹ Izwi raMambo Mwari rakauya kunaJehu mukororo waHanani kurwisana naBhaasha rechiti,

² “Ngokuti ndakakumirudza kubva kubukuta, ndikakuita mutungamiriri padera pevanhu vangu Isuraeri; newe wakahamba ngenjira dzaJerobhoamu, newe wakaita kuti vanhu vangu Isuraeri vashaishe, vakamusa ushungu hwangu ngezvishaishi zvavo,

³ ringira, ndinozoparadza Bhaasha nemibarirwana yemhatso yake; ndinozoitazve kuti mhatso yako idai ngemhatso yaJerobhoamu mukororo waNebhati.

⁴ Weshe waBhaasha unozofira mudhorobha unozodyiwa ngembwa, weshe waBhaasha unozofira mushango unozodyiwa ngeshiri dzomudenga.”

⁵ Zvino mishando imweni yaBhaasha, nazvo zveshe zvaakaita, nesimba rake, azvizi kunyorwa here muBhuku reMishando yeZuva ngeZuva yeMadzimambo aIsuraeri?

⁶ Bhaasha wakaata namadzibaba ake, wakatsirwa muThiriza; naEra mukororo wake wakatonga pandau yake.

⁷ Zvakanyadaro rakagumazve izwi raMambo Mwari kubudikidza ngomuprofeti Jehu mukororo waHanani, rechirwisana naBhaasha nevemhatso yake veshe, ngendaa yokushata kweshe kwaakaita mukuona kwaMambo Mwari, akamusa ushungu hwake ngemishando yenyara dzake, ngokuita kwakadai ngekwemhatso yaJerobhoamu, ngokutizve wakaiparadza.

Mambo Era weIsuraeri

⁸ Mugore remakumi mairi nematanhatu raAsa mambo waJudha, Era mukororo waBhaasha wakatanga kutonga padera paIsuraeri muThiriza, wakatonga makore mairi.

⁹ Asi muranda wake Zimuri, nduna yorupande rwengoro dzake wakamumukira. Naapo paaiya ari muThiriza, echimwa echiradza mumhatso yaArza, uwo waiya nduna yengome yake muThiriza,

¹⁰ Zimuri wakapoteremwo akamubaya akafa, ngegore remakumi mairi nemanomwe rokutonga kwaAsa mambo waJudha, naye wakatonga pandau yake.

¹¹ Naapo paakatanga kutonga, ngokukasira apo akagara padendemaro rake, wakauraya veshe vemhatso yaBhaasha; aazi kumusiira mukororo naumwe, kunyazwi kuhama dzake, nokuti wevangani vake.

¹² Ndizvo Zimuri wakauraya veshe vemhatso yaBhaasha, kudai ngokuronza kweizwi raMambo Mwari, raakaereketa kubudikidza ngomuprofeti Jehu kurwisana naBhaasha,

¹³ ngendaa yezvishaishi zveshe zvaBhaasha, nezvishaishi zvaEra mukororo wake, zvevakashaisha, neizvo zvevakaita ndizvo kuti vaIsuraeri vashaishe, kumusa ushungu hwaMambo Mwari, Mwari waIsuraeri ngezvimwari zvavo zvisina shwiro.

¹⁴ Zvino mishando imweni yaEra, neizvo zveshe zvaakaita, azvizi kunyorwa here muBhuku reMishando yeZuva ngeZuva yeMadzimambo aIsuraeri?

Mambo Zimuri weIsuraeri

¹⁵ Mugore remakumi mairi nemanomwe rokutonga kwaAsa mambo waJudha, Zimuri wakatonga padera paIsuraeri mazuva manomwe muThiriza. Zvino vamuna vehondo vaiya vakadzimika matende vakaringirana neGibhethoni, raiya dhorobha revaFiristia,

¹⁶ nevanhu vehondo vaiya mumatende vazwa kuti Zimuri wakamukira mambo, wakauraya mambo; ndizvo vaIsuraeri veshe vakaemesa Omuri, nduna yehondo kuita mambo padera paIsuraeri ngeiro zuva mukamba.

¹⁷ Ndizvo Omuri wakakwira Gibhethoni nevaIsuraeri veshe naye, vakakomba Thiriza.

¹⁸ Naapo Zimuri aona kuti dhorobha ratorwa, wakapotera mungome yamambo; wakapisha ngome yamambo, akadzipishiremwo pachake, akafa ngomuriro,

¹⁹ ngendaa yezvishaishi zvake zvaakashaisha mukuona kwaMambo Mwari, ngokuhamba kudai ngenjira yaJerobhoamu, nomuchishaishi chaakaita kuti vana vaIsuraeri vashaishe ndicho.

²⁰ Zvino mishando yeshe imweni yaZimuri, nokumukira kwake kwaakaita, azvizi kunyorwa here muBhuku reMishando yeZuva ngeZuva yeMadzimambo aIsuraeri?

Mambo Omuri weIsuraeri

²¹ Zvino vanhu vaIsuraeri vakaparadzana kuita zvikwata zviiri; chikwata chimwe chakateera Thibhini mukororo waGinathi, kuti vamuemese kuita mambo; nechikwata chimweni chakateera Omuri.

²² Asi vanhu vakateera Omuri vakanyisa padera pevanhu vakateera Thibhini mukororo waGinathi; ndizvo Thibhini wakafa, naOmuri wakatonga.

²³ Mugore remakumi matatu narimwe raAsa mambo waJudha, Omuri wakatanga kutonga padera paIsuraeri; wakatonga makore gumi namairi, matanhatu awo wakatonga muThiriza.

²⁴ Zvino wakatenga mutunhu weSamaria ngemakumi emazana matanhatu (6,000) ezvigurwa zvesirivha kubva kunaShema, wakaaka padera pomutunhu, akadudza zina redhorobha raakaaka kuti Samaria, zina raShema, mune womutunhu.

²⁵ Omuri wakaita zvakashata mukuona kwaMambo Mwari; wakaita zvakashata kupinda avo vakatanga pamberi pake.

²⁶ Ngokuti wakahamba ngenjira dzeshe dzaJerobhoamu mukororo waNebhati, nomuzvishaishi zvake zvaakaita kuti Isuraeri ashaishe, kumusa ushungu hwaMambo Mwari, Mwari waIsuraeri, ngezvimwari zvavo zvisina shwiro.

²⁷ Zvino mishando imweni yaOmuri, iyo yaakaita, nesimba rake raakaonisa, azvizi kunyorwa here muBhuku reMishando yeZuva ngeZuva yeMadzimambo aIsuraeri?

²⁸ Omuri wakaata nemadzibaba ake, akatsirwa muSamaria; Ahabhi mukororo wake wakatonga pandau yake.

Mambo Ahabhi weIsuraeri

²⁹ Mugore remakumi matatu nemasere raAsa mambo waJudha, Ahabhi mukororo waOmuri wakatanga kutonga Isuraeri; Ahabhi mukororo waOmuri wakatonga Isuraeri makore makumi mairi nemairi muSamaria.

³⁰ Ahabhi mukororo waOmuri wakaita zvakashata mukuona kwaMambo Mwari kupinda avo veshe vakatanga pamberi pake.

³¹ Chakaringirika chakada kudai ngechiro chidoko kwaari kuhamba muzvishaishi zvaJerobhoamu mukororo waNebhati, kuti wakatora Jezebheri mwanasikana waEthibhaari mambo weSidhoni, kuti aite mukadzi wake, naye wakaenda akashandira Bhaari, akamudira.

³² Wakaakira Bhaari arita mumhatso yaBhaari, iyo yaakamuakira muSamaria.

³³ NaAhabhi wakaita sika yokudira. Ahabhi wakaita zviro zvakawanda zvokumusa ushungu hwaMambo Mwari, Mwari waIsuraeri, kupinda madzimambo eshe aIsuraeri akatanga pamberi pake.

³⁴ Mumazuva ake Hieri muBhetheri wakaaka Jerikho. Wakaisa madzeyo aro ngorufu rwedangwe rake Abhiramu. Wakaemesa misiwo yaro ngorufu rwomukororo wake wokugumisira Segubhi, kudai ngezvakaronza izwi raMambo Mwari, kubudikidza ndiJoshua mukororo waNuni.