1 Madzi. 15 - Bhaibheri Rakachena muChindau

Mambo Abhijamu weJudha

¹ Zvino ngegore regumi nemasere okutonga kwamambo Jerobhoamu mukororo waNebhati, Abhijamu wakatonga Judha.

² Wakatonga makore matatu muJerusarema. Zina ramai ake raizwi Maakha, mwanasikana waAbhisharomu.

³ Wakaita zvishaishi zveshe zvababa ake, zvevakaita kumutangira; mwoyo wake waiya usikazi kuperera pamberi paMambo Mwari, Mwari wake, kudai ngomwoyo waDhavhidha baba ake.

⁴ Zvakanyadaro, ngendaa yaDhavhidha, Mambo Mwari, Mwari wake wakamupa chibani muJerusarema ngokuemesa mukororo wake sure kwake, nokugwinyisa Jerusarema;

⁵ ngokuti Dhavhidha wakaita izvo zvaiya zvakanaka mukuona kwaMambo Mwari, aazi kupauka kubva kuchiro kunyazwi ngechiri chaakamupanga, eshe mazuva okupona kwake, kwega ngendaa yaUria muHiti.

⁶ Hondo yakatanga pakati paRehobhoamu naJerobhoamu yakaangira eshe mazuva okupona kwake.

⁷ Mishando imweni yaAbhijamu, nazvo zveshe zvaakaita, azvizi kunyorwa here muBhuku reMishando yeZuva ngeZuva yeMadzimambo aJudha? Kwaiyapo hondo pakati paAbhijamu naJerobhoamu.

⁸ Abhijamu wakaata nemadzibaba ake, vakamutsira mudhorobha raDhavhidha. Zvino Asa mukororo wake wakatonga pandau yake.

Mambo Asa weJudha

⁹ Asa wakatonga padera paJudha ngegore remakumi mairi raJerobhoamu.

¹⁰ Wakatonga muJerusarema makore makumi marongomuna narimwe. Zina rambuya ake raizwi Maakha, mwanasikana waAbhisharomu.

¹¹ Asa wakaita izvo zvakanaka mukuona kwaMambo Mwari, kudai ngezvaakaita Dhavhidha baba ake.

¹² Wakadzinga avo vaiita chishaishi cheSodhoma, nokudusa miedzaniso yavakaita madzibaba ake.

¹³ Wakadusawo Maakha mbuya ake kuti vasachaita vahosi, ngokuti vaiya vakaita muedzaniso wokudira mugwasha; Asa wakaputsa muedzaniso wamai ake, akaupisha pasinde pomukova Kedhironi.

¹⁴ Asi ndau dzakakwirira adzizi kuduswa. Zvakanyadaro mwoyo waAsa waiya wakaperera pamberi paMambo Mwari mazuva eshe okupona kwake.

¹⁵ Wakaunza mumhatso yaMambo Mwari zvipo zvakapirwa ndibaba ake, neizvo zvaakapira emene kunaMambo Mwari, sirivha, mukore nezvidziyo.

¹⁶ Kwaiyapo hondo pakati paAsa naBhaasha mambo waIsuraeri mazuva eshe okupona kwavo.

¹⁷ Bhaasha mambo waIsuraeri wakakwira koochakata Judha, wakaaka Rama, kupinga vanhu kuti vasabuda kubanze nokuti vasapinda mukati kunaAsa mambo waJudha.

¹⁸ Zvino Asa wakatora sirivha yeshe nomukore zvakasara mumhatso youpfumi hwaMambo Mwari, noupfumi hwemhatso yamambo, wakazviisa munyara dzevaranda vake. Mambo Asa wakazvitumira kunaBhenihadhadhi mukororo waTabhirimoni, mukororo waHezioni, mambo weAramu waigara Dhamasekusi, echiti,

¹⁹ “Ngachiwepo chitenderano pakati pangu inini newe kudai ngechaiyapo pakati pababa angu nababa enyu. Ringira, ndinotumira kwouri chipo chesirivha nomukore; enda ugure chitenderano chako naBhaasha mambo waIsuraeri, kuti abve kwendiri.”

²⁰ Bhenihadhadhi wakapurutana kunamambo Asa, akatuma nduna dzehondo yake koorwa nemadhorobha aIsuraeri. Wakanyisa Ijoni, Dhani, Abheribhethimaakha, neKhinerothi reshe, nenyika yeNafitari.

²¹ Naapo Bhaasha azwa ndizvo, wakarekera kuaka Rama, wakagara Thiriza.

²² Zvino mambo Asa wakapanga vaJudha veshe; pasina munhu wakatenderwa kuti asare; navo vakatwara mapuwe eRama nematanda aro, zvaiakiwa ndizvo ndiBhaasha; naavo mambo Asa wakaaka Gebha raBhenjamini neMizipha.

²³ Mishando imweni yeshe yaAsa, nesimba rake reshe, nazvo zveshe zvaakaita, nemadhorobha aakaaka, azvizi kunyorwa here muBhuku reMishando yeZuva ngeZuva yeMadzimambo aJudha? Asi ngomukuwo wousharuka hwake, wakabatwa ngenhenda mutsoka dzake.

²⁴ Zvino Asa wakaata namadzibaba ake, wakatsirwa namadzibaba ake mudhorobha raDhavhidha baba ake; mukororo wake Jehoshafati wakatonga pandau yake.

Mambo Nadhabhi weIsuraeri

²⁵ Nadhabhi mukororo waJerobhoamu wakatanga kutonga Isuraeri ngegore rechipiri raAsa mambo waJudha, naye wakatonga padera paIsuraeri makore mairi.

²⁶ Wakaita zvakashata mukuona kwaMambo Mwari, wakahamba ngenjira dzababa ake, nomuchishaishi chaakaita kuti Isuraeri ashaishe ndicho.

²⁷ Bhaasha mukororo waAhija munhu wemhatso yaIsakha, wakamupandukira; naBhaasha wakamubaya muGibhethoni, mudhorobha revaFiristia; ngokuti Nadhabhi navaIsuraeri veshe vakakomba Gibhethoni.

²⁸ Ndizvo Bhaasha wakamuuraya ngegore rechitatu raAsa mambo waJudha, wakatonga pandau yake.

²⁹ Naapo aitwa mambo, wakauraya veshe vemhatso yaJerobhoamu; aazi kusiya naumwe kumhatso yaJerobhoamu waifema, metsa aiparadza, kudai ngeizwi raMambo Mwari, raakaereketa kubudikidza ngomuranda wake Ahija muShiro,

³⁰ ngendaa yezvishaishi zvaakashaisha Jerobhoamu, nezvaakaita kuti Isuraeri ashaishe, nokutambudza kwake kwaakamusa ndikwo ushungu hwaMwari waIsuraeri.

³¹ Zvino mishando imweni yaNadhabhi, nazvo zveshe zvaakaita, azvizi kunyorwa here muBhuku reMishando yeZuva ngeZuva yeMadzimambo aIsuraeri?

³² Kwaiyapo hondo pakati paAsa naBhaasha mambo waIsuraeri ngemazuva avo eshe.

Mambo Bhaasha weIsuraeri

³³ Ngegore rechitatu raAsa mambo waJudha, Bhaasha mukororo waAhija wakatanga kutonga padera paIsuraeri reshe muThiriza, naye wakatonga makore makumi mairi nemarongomuna.

³⁴ Wakaita zvakashata mukuona kwaMambo Mwari, echihamba ngenjira yaJerobhoamu, nomuchishaishi ichi aakaita kuti Isuraeri ashaishe.