1 Madzi. 14 - Bhaibheri Rakachena muChindau

Kufa kwoMukororo waJerobhoamu

¹ Ngouwo mukuwo Abhija mukororo waJerobhoamu wakarwara.

² Jerobhoamu wakati kunomukadzi wake, “Miruka, ndapota, udziitise kuti usaziikanwa kuti uri mukadzi waJerobhoamu, uende Shiro; ringira uripo Ahija muprofeti uwo wakandironzera kuti ndinozoita mambo padera peava vanhu.

³ Utore zvingwa gumi nemakhekhe, nejomeya rouchi, uende kwaari; naye unozokuronzera icho chinozoitika kunemwana.”

⁴ Mukadzi waJerobhoamu wakaita kudaro, akamiruka, akaenda Shiro kumhatso yaAhija. Zvino Ahija waiya asikachaoni, ngokuti madziso ake aiya oita rubuma ngendaa yousharuka hwake.

⁵ Asi Mambo Mwari wakati kunaAhija, “Ringira, mukadzi waJerobhoamu unouya kookubvunza ngendaa yomukororo wake; ngokuti unorwara. Unozoereketa ichi neichi kwaari. Naapo aguma unozodziitisa kuti aringirike kudai ngomukadzi umweni.”

⁶ Asi apo Ahija azwa musindo wetsoka dzake, achipotera pamusiwo, wakati, “Pinda, iwewe mukadzi waJerobhoamu; unodziitisa ngenyi kuti uringirike kudai ngomunhu umweni? Ngokuti ndatumwa kwouri nemashoko akakonza.

⁷ Enda, wooronzera Jerobhoamu wechiti, ‘Unoronza izvi Mambo Mwari, Mwari waIsuraeri: Ngokuti ndakakukudza pakati pevanhu, ndikakuita mutungamiriri padera pevanhu vangu Isuraeri,

⁸ ndikadusa umambo kubva kumhatso yaDhavhidha, ndikahupa kwouri; asi auzi kuita kudai ngomuranda wangu Dhavhidha, uwo wakangwarira mipango yangu, wakanditeerazve ngomwoyo wake weshe, kuita izvo zvega zvainaka mukuona kwangu.

⁹ Asi iwewe wakaita zvakashata kupinda avo veshe vakatanga pamberi pako, newe wakaenda ukadziitira zvimwari zvimweni, nemiedzaniso yakanyunguruswa, kundimusa kuti nditseneke, newe wakandirasha sure kwomushana wako.

¹⁰ Ndizvo, ringira, ndinozounza kushata padera pemhatso yaJerobhoamu. Ndinozouraya kubva kumhatso yaJerobhoamu mwana weshe wemwamuna, veshe vakasungwa naavo vakasunhurwa muIsuraeri, nokudusa avo vakasara vemhatso yaJerobhoamu, kudai ngomunhu unopisha disa metsa ripere reshe.

¹¹ Weshe munhu waJerobhoamu unozofira mudhorobha, unozodyiwa ngembwa; nouwo unozofira mushango, unozodyiwa ngeshiri dzomudenga; ngokuti Mambo Mwari wakazviereketa.’

¹² Ndizvo miruka, uende kumhatso yako. Naapo tsoka dzako dzoopotera mudhorobha, mwana unozofa.

¹³ VaIsuraeri veshe vanozomuchema nokumuika; ngokuti ndiye ega wemhuri yaJerobhoamu unozoikwa, ngokuti mwaari mwakaoneka zviro zvimweni zvakanaka mukuona kwaMambo Mwari, Mwari waIsuraeri, mumhatso yeshe yaJerobhoamu.

¹⁴ Zvakanyadaro Mambo Mwari unozodziemesera mambo padera paIsuraeri, uwo unozouraya vemhatso yaJerobhoamu nyamashi, kunyazwi zvinopano.

¹⁵ “Mambo Mwari unozochaya Isuraeri, kudai ngorutsanga runozungunyiswa mumvura; unozobvita Isuraeri kubva kuneiyi nyika yakanaka, yaakapa kumadzibaba avo, nokuvaparadzira seri kworwizi Yufratesi, ngokuti vakaita miedzaniso yavo yokudira Ashithorethi, vechimusa ushungu hwaMambo Mwari.

¹⁶ Unozosiya vaIsuraeri ngendaa yezvishaishi zvaJerobhoamu, uwo wakashaisha emene, nokuita kuti vaIsuraeri vashaishe.”

¹⁷ Zvino mukadzi waJerobhoamu wakamiruka akaenda, akauya Thiriza. Naapo aguma padimba romusiwo, mwana wakafa.

¹⁸ Navo vakamutsira, nevaIsuraeri veshe vakamuchema, kudai ngeizwi raMambo Mwari, raakaereketa ngomuranda wake Ahija muprofeti.

Kufa kwaJerobhoamu

¹⁹ Zvino mishando yeshe yaJerobhoamu, kurwa kwake nokutonga kwake, ringirai zvakanyorwa muBhuku reMishando yeZuva ngeZuva yeMadzimambo aIsuraeri.

²⁰ Mazuva okutonga kwaJerobhoamu kwaiya makore makumi mairi namairi; zvino wakaata nemadzibaba ake, naNadhabhi mukororo wake wakatonga pandau yake.

Mambo Rehobhoamu weJudha

²¹ Zvino Rehobhoamu mukororo waSoromoni wakatonga muJudha. Rehobhoamu waiya nemakore makumi marongomuna narimwe apo wakatanga kutonga, naye wakatonga makore gumi nemanomwe muJerusarema, dhorobha raakatsanangura Mambo Mwari pakati pemadzinza eshe aIsuraeri, kuti aisemwo zina rake. Zina ramai ake raizwi Naama muAmoni.

²² Judha wakaita zvakashata mukuona kwaMambo Mwari; vakamumusira ndurumwa ngezvishaishi zvavo zvevakaita, kupinda zveshe zvakaitwa ngemadzibaba avo.

²³ Ngokuti avozve vakadziakira pachavo ndau dzakakwirira, nokudziitira miedzaniso, nemakwasha okudira, padera pemitunhu nepashi pemiti yeshe yakasvipirika;

²⁴ kwaiyapo munyika avo vakaita kushaisha ukwo kweSodhoma. Vakaita kushata kweshe kwemadzinza aakadzinga Mambo Mwari kubva pamberi pevana vaIsuraeri.

²⁵ Mugore rechishanu rokutonga kwamambo Rehobhoamu, Shishaki mambo weEgipite wakakwira koochakata Jerusarema.

²⁶ Wakatora upfumi hweshe hwemhatso yaMambo Mwari, noupfumi hweshe hwemhatso yamambo; wakatora zviro zveshe. Wakatorawo zvihlangu zvomukore zvakanasirwa ndiSoromoni;

²⁷ ndizvo mambo Rehobhoamu wakaita zvihlangu zvethusi pandau peizvo, akazvipa munyara dzenduna dzaiya padera pevarindi, vairinda misiwo yamambo.

²⁸ Naapo mambo paaipotera mumhatso yaMambo Mwari varindi vaizvitwara, nokuzviunzazve mukamera rairindwa.

²⁹ Zvino mishando imweni yaRehobhoamu, nazvo zveshe zvaakaita azvizikunyorwa here muBhuku reMishando yeZuva ngeZuva yeMadzimambo aJudha?

³⁰ Kwaiyapo kurwa pakati peRehobhoamu naJerobhoamu mazuva eshe okupona kwavo.

³¹ Rehobhoamu wakaata nemadzibaba ake, naye wakatsirwa nemadzibaba ake mudhorobha raDhavhidha. Zina ramai ake raizwi Naama muAmoni. Abhijamu mukororo wake wakatonga pandau yake.