1 Madzi. 13 - Bhaibheri Rakachena muChindau

¹ Ringira, wakauya munhu waMwari echibva kwaJudha apangirwa izwi raMambo Mwari kuenda Bhetheri; naJerobhoamu waiya akaema paarita echipisha mutombo unegwema rakanaka.

² Naye wakadaidzira kuarita ngeizwi raMambo Mwari echiti, “Iwewe arita, arita, unoronza izvi Mambo Mwari: ‘Ringira, kunozoberekwa mukororo kumhatso yaDhavhidha, Josia ndiro zina rake; nepadera pako unozopira vapristi vendau dzakakwirira, avo vanopisha mitombo inegwema rakanaka padera pako, nemagodo evanhu anozopishwa padera pako.’ ”

³ Wakapa chioniso ngezuva ririro echiti, “Ichi ndicho chioniso chaakaereketa ndicho Mambo Mwari: ‘Ringirai, arita rinozomweka, nemarota ari padera paro anozodururirwa pashi.’ ”

⁴ Naapo mambo Jerobhoamu azwa chakadaidzirwa ngomunhu waMwari, uwo wakadaidzira ngendaa yearita raiya muBhetheri, Jerobhoamu wakatambanudza nyara yake kubva paarita echiti, “Mubatenyi!” Asi nyara yake yaakatambanudza yakaoma, aazi kuchakona kuipfinyisa.

⁵ Aritawo rakamweka, nemarota akadururirwa pashi kubva paarita, kudai ngechioniso icho chaakapa munhu waMwari ngeizwi raMambo Mwari.

⁶ Mambo wakapingura, akati kunomunhu waMwari, “Pota zvino pamberi pehope yaMambo Mwari, Mwari wako, undikumbirire, kuti nyara yangu itambiswe.” Ndizvo munhu waMwari wakapota kunaMambo Mwari, nenyara yamambo yakatambiswa, ikadai ngekaretu.

⁷ Zvino mambo wakati kunomunhu waMwari, “Uya kanyi, udye neni, neni ndinozokupa musharo.”

⁸ Asi munhu waMwari wakati kunamambo, “Kudai wechizondipa hafu youmambo hwako, andizopindi newe, nokuti kuzodya kudya nokuti kuzomwa mvura kuneiyi ndau.

⁹ Ngokuti ndizvo zvakapangwa kwendiri kudaro ngeizwi raMambo Mwari rechiti, ‘Usazodya kudya, nokuti kumwa mvura, nokuti kuhwirira ngenjira yowakauya ndiyo.’ ”

¹⁰ Ndizvo wakahamba ngenjira imweni, aazi kupetuka ngenjira yaakauya ndiyo Bhetheri.

Muprofeti Musharuka weBhetheri

¹¹ Zvino kwaigaremwo muBhetheri muprofeti musharuka. Vakororo vake vakauya, vakamuronzera ngemishando yeshe yakaitwa ngomunhu waMwari muBhetheri ngeiro zuva; mazwiwo aakaereketa kunamambo, vakaaronza kunababa avo.

¹² Baba avo vakati kwevari, “Ngeiri njira yaakakwira ndiyo?” Vakororo vake vakamupangidzira njira ngokuti vaiya vaona njira yaakakwira ndiyo munhu waMwari wakabva kwaJudha.

¹³ Zvino wakati kunevakororo vake, “Ndisungirei mbongoro.” Navo vakamusungira mbongoro, wakaigadha.

¹⁴ Wakateera munhu waMwari, akamuona akagara pashi pomuti womuokhi. Wakati kwaari, “Ndiwe here munhu waMwari wakabva kwaJudha?” Naye wakati, “Ndini.”

¹⁵ Zvino wakati kwaari, “Uya neni kanyi, udye kudya.”

¹⁶ Asi wakati, “Andingahwiriri newe, nokuti kupotera newe, nokuti kudya kudya nokuti kumwa mvura newe kundau iyi.

¹⁷ Ngokuti kwakaronzwa kwendiri ngeizwi raMambo Mwari rechiti, ‘Auzodyi kudya nokuti kumwa mvura apo, nokuti kuhwirira ngenjira yewakauya ndiyo.’ ”

¹⁸ Zvino wakati kwaari, “Neniwo ndiri muprofeti kudai ndiwe; nengirosi yaMambo Mwari yakaereketa kwendiri ngeizwi raMambo Mwari yechiti, ‘Mupetudze sure newe kumhatso yako kuti adye kudya nokumwa mvura.’ ” Asi waimunyepera.

¹⁹ Zvino munhu waMwari wakapetuka naye, wakadya kudya nokumwa mvura mumhatso yake.

²⁰ Naapo vachakagara patafura, izwi raMambo Mwari rakauya ngokunomuprofeti uwo wakamupetudza sure.

²¹ Wakadaidzira kunomunhu waMwari, uwo wakabva kwaJudha echiti, “Unoronza izvi Mambo Mwari: Ngokuti auzi kupurutana zvinobva kumuromo waMambo Mwari, usikazi kuita icho chaakakupanga Mambo Mwari, Mwari wako,

²² asi wapetuka sure, nokudya nokumwa mvura mundau yaakaronza Mambo Mwari kwouri kuti, ‘Usadyeyo kudya, nokuti kumwa mvura;’ muiri wako auzoikwi muiba remadzibaba ako.”

²³ Ngesure munhu waMwari apedza kudya nokuti kumwa, wakamusungira mbongoro yake yomuprofeti uwo waakapetudza sure.

²⁴ Naapo echienda, mhondoro yakashongana naye munjira, yakamuuraya. Muiri wake wakakandirwa munjira, nembongoro yakaema pasinde pawo; mhondoro yakaemawo pasinde pawo.

²⁵ Vanhu vakapinda ngaapo, vakaona muiri wakakandirwa munjira, nemhondoro yakaema pasinde pomuiri. Navo vakauya, vakaronzera vanhu mudhorobha paaigara muprofeti musharuka.

²⁶ Naapo azwa, uwo muprofeti wakamupetudza sure kubva munjira yake, wakati, “Ndiye munhu waMwari, uwo usikazi kupurutana izwi raMambo Mwari. Ndizvo Mambo Mwari wakamupira kumhondoro, yakamubaura nokumuuraya, kudai ngezvakaronza izwi raakaereketa kwaari Mambo Mwari.”

²⁷ Naye wakaereketa kuvakororo vake echiti, “Ndisungirei mbongoro.” Ndizvo vakaisunga.

²⁸ Wakaenda, akaona muiri wakakandirwa munjira, mbongoro nemhondoro zvakaema pasinde pomuiri. Mhondoro aizi kudya muiri uwo, nokuti kuruma mbongoro.

²⁹ Muprofeti musharuka wakatora muiri womunhu waMwari, akauisa padera pembongoro, akaupetudza kudhorobha romuprofeti musharuka koomuchema nokumutsira.

³⁰ Wakaika muiri muiba rake; vakamuchema vechiti, “Ihehe, hama yangu!”

³¹ Apedza kumuika, wakaereketa kunevakororo vake echiti, “Apo ndoofa, ndiikenyi muiba raakaikwa munhu waMwari; muradzike magodo angu pasinde pemagodo ake.

³² Ngendaa yeizwi raMambo Mwari raakaereketa kunearita riri muBhetheri, nokumhatso dzeshe dzendau dzakakwirira mumadhorobha eSamaria, ngegwinyiso zvinozoitika.”

Chishaishi chaJerobhoamu Chikurutu

³³ Ngesure kweizvi Jerobhoamu aazi kutenderuka kubva kunjira dzake dzakashata, asi wakaangira kuemesa vanhu vari pashi kuita vapristi vendau dzakakwirira; kunyazwi ngouri uwo waida kuita mupristi, waimuemesa kuita mupristi wendau dzakakwirira.

³⁴ Ichi chiro chakaita chishaishi kumhatso yaJerobhoamu, kuti iparadzwe, nokupedzwa padera penyika.