1 Madzi. 12 - Bhaibheri Rakachena muChindau

Kumukira kweMadzinza eDera

¹ Rehobhoamu wakaenda Shekhemu, ngokuti vaIsuraeri veshe vaiya vauya Shekhemu kuti vamuite mambo.

² Naapo Jerobhoamu mukororo waNebhati azwa ndizvo, (uwo waiya achindori muEgipite, ngokuti waiya akatiza kubva pamberi pehope yamambo Soromoni,) zvino Jerobhoamu wakagara Egipite.

³ Navo vakatuma vanhu koomudaidza; naJerobhoamu nembungano yeshe yevaIsuraeri vakauya, kuereketa naRehobhoamu vechiti,

⁴ “Baba ako vakaita kuti joka redu rireme padera pedu. Zvino iwewe ita kuti mushando wababa ako wairema, nejoka rake rairema, raakaisa padera pedu, rireruke, nesu tinozokushandira.”

⁵ Naye wakati kwevari, “Ibvai muende mazuva matatu, ngesure kwawo muuyezve kwendiri.” Nevanhu vakaenda.

⁶ Zvino mambo Rehobhoamu wakaereketa nevamuna vasharuka, avo vaiema pamberi pababa ake Soromoni achapona, wakati, “Imwimwi munondiita mapangirenyi kuti ndipingure ava vanhu?”

⁷ Vakapingura kwaari vechiti, “Kudai wechizoita muranda weava vanhu nyamashi nokuvashandira, uvapingure, uerekete mazwi akanaka kwavari, naapo vanozokushandira mhera nariini.”

⁸ Asi iye wakaramba kupanga kwevamuna vasharuka kwevakamupa, wakapangana nemajaha awo aiya ndanga dzake aiema pamberi pake.

⁹ Naye wakati kwevari, “Munondipangenyi imwimwi chokuti tipingure kuvanhu ava vakaereketa kwendiri vechiti, ‘Ita kuti joka ravakaisa baba ako padera pedu rireruke?’ ”

¹⁰ Majaha aiya ndanga dzake akaereketa kwaari echiti, “Unozoronza izvi kuvanhu vakaereketa kwouri vechiti, ‘Baba ako akaita kuti joka redu rireme, asi iwewe ita kuti rireruke;’ ichi ndicho chounozoereketa kwevari kuti, ‘Chinwe changu chidoko chakafema kupinda chiunu chababa angu.

¹¹ Zvino baba angu pevakamutwarisa joka rinorema, inini ndinozotutsira kujoka renyu. Baba angu vakamuorora ngethabusi, asi inini ndinozomuorora ngezvinyaada.’ ”

¹² Ndizvo Jerobhoamu nevanhu veshe vakauya kunaRehobhoamu ngezuva rechitatu, kudai ngezvaakaronza mambo echiti, “Uyaizve kwendiri ngezuva rechitatu.”

¹³ Mambo wakapingura vanhu ngoushungu. Wakarekera kupanga kwevamuna vasharuka kwevakamupanga,

¹⁴ naye wakaereketa kwevari kudai ngokupanga kwemajaha echiti, “Baba angu vakaremesa joka renyu, asi inini ndinozotutsira kuriremeresa; baba angu vakamuorora ngethabusi, asi inini ndinozomuorora ngezvinyaada.”

¹⁵ Ndizvo mambo aazi kupurutana vanhu; ngokuti ichi chakabva kunaMambo Mwari, kuti azarise mazwi ake aakaereketa ndiAhija muShiro kunaJerobhoamu mukororo waNebhati.

¹⁶ Naapo vaIsuraeri veshe vaona kuti mambo aazi kupurutana kwevari, vanhu vakapingura mambo vechiti, “Tine chikoaniswa chenyi kunaDhavhidha? Atina nhaka kumukororo waJesi. Endai kumatende enyu, imwimwi vaIsuraeri! Ringira zvino kumhatso yako, iwewe Dhavhidha.” Ndizvo vaIsuraeri vakapararira kuenda kumatende avo.

¹⁷ Asi Rehobhoamu wakatonga padera pevana vaIsuraeri vaigara mumadhorobha aJudha.

¹⁸ Naapo mambo Rehobhoamu paakatuma Adhoramu, uwo waiya mukuru wechibaro, vaIsuraeri veshe vakamuponda ngemapuwe, wakafa. Ndizvo mambo Rehobhoamu wakakasira kukwira ngoro yake, echitiza kuenda Jerusarema.

¹⁹ Ndizvo vaIsuraeri vakamukira mhatso yaDhavhidha metsa nanyamashi.

²⁰ Naapo vaIsuraeri vazwa kuti Jerobhoamu waiya auyazve, vakatuma vanhu kuti vamudaidze auye pakati pembungano, vakamuita mambo padera pevaIsuraeri veshe. Paiya pasina naumwe wakateera mhatso yaDhavhidha, asi dzinza raJudha rega.

Chiprofeti chaShemaia

²¹ Naapo Rehobhoamu aguma muJerusarema, wakaunganidza veshe vemhatso yaJudha neverudzi rwaBhenjamini, vaiya zana nemakumi masere emakumi emazana (180,000) evamuna vakatsanangurwa, vaikona kurwa, kurwa nevemhatso yaIsuraeri, nokuunzazve umambo kunaRehobhoamu mukororo waSoromoni.

²² Asi izwi raMwari rakauya kunaShemaia munhu waMwari rechiti,

²³ “Ereketa wechiti kunaRehobhoamu mukororo waSoromoni, mambo waJudha, nokumhatso yeshe yaJudha neyaBhenjamini, nokuneavo vakasara vevanhu,

²⁴ ‘Unoronza izvi Mambo Mwari: Amuzokwiri nokuti kurwa nehama dzenyu vana vaIsuraeri. Munhu weshe ngaapetuke kumhatso yake; ngokuti chiro ichi chakaitwa ndini.’ ” Ndizvo vakapurutana izwi raMambo Mwari, vakahwirira kuenda kudai ngezverakaronza izwi raMambo Mwari.

Jerobhoamu Unofuratira Kubva kunaMambo Mwari

²⁵ Zvino Jerobhoamu wakaaka Shekhemu mumutunhu waEfuremu, akagaremwo, nokubva arimwo wakaaka Phenueri.

²⁶ Zvino Jerobhoamu wakati mumwoyo mwake, “Zvino umambo hungazohwirira kumhatso yaDhavhidha.

²⁷ Kudai ava vanhu vechizoangira kukwira kuenda koopira midiro kumhatso yaMambo Mwari Jerusarema, mwoyo yaava vanhu ingazotenderukira kunamambo wavo, mambo Rehobhoamu waJudha; navo vanozondiuraya, vechihwirira kunaRehobhoamu mambo waJudha.”

²⁸ Ndizvo mambo wakatsvaka zano, akaita makonyana mairi omukore. Wakati kuvanhu, “Kukwira kwenyu Jerusarema kwanyanya zvakwana. Zviripano zvimwari zvenyu, imwimwi Isuraeri, izvo zvakamubudisa kubva munyika yeEgipite.”

²⁹ Wakaisa chimwe muBhetheri, nechimweni wakachiisa muDhani.

³⁰ Neichi chiro chakaita chishaishi, ngokuti vanhu vakaenda koodira pamberi pechimwari, nepamberi peicho chaiya muDhani.

³¹ Wakaakazve mhatso kundau dzakakwirira, akaemesa vapristi vevanhu vaiya pashi, avo vaiya vasiri vevakororo vaRevhi.

Kudira Kunorambiwa paBhetheri

³² Jerobhoamu wakakoka mushongano wokudya ngomwedzi wechisere, ngezuva rechigumi namashanu romwedziwo, kudai ngomushongano wokudya waiya nevaJudha, naye wakapira midiro padera pearita; ndizvo wakaitazve kudaro muBhetheri, echipira midiro kunemakonyana aakaita. Naye wakaemesa muBhetheri vapristi vendau dzakakwirira dzaakaaka.

³³ Wakaenda koopira midiro paarita raakaita muBhetheri ngezuva regumi namashanu romwedzi wechisere, ngomwedzi uwo waakaronga mumwoyo mwake; wakakoka mushongano wokudya wevaIsuraeri, naye wakapira midiro paarita, akapisha mitombo inegwema rakanaka.