1 Madzi. 11 - Bhaibheri Rakachena muChindau

Soromoni Unokunukuka Kubva kunaMwari

¹ Mambo Soromoni wakada vakadzi vazhinji vapara, pamwepo nomwanasikana waFaro: vakadzi vaiya veMoabhi, veAmoni, veEdhomu, veSidhoni, neveHiti,

² kubva kumadzinza awo Mambo Mwari aakavapanga ndiwo vana vaIsuraeri echiti, “Musazoroodzana navo, navowo vasazoroodzana nemwi; ngokuti ngegwinyiso vanozopaukisa mwoyo yenyu kuti muteere zvimwari zvavo;” Soromoni wakanamatira kwevari ngorudo.

³ Pakati pevakadzi vake paiya nevakadzi mazana manomwe (700), nemabunha mazana matatu (300); nevakadzi vake vakapaukisa mwoyo wake.

⁴ Ngokuti apo Soromoni aamusharuka, vakadzi vake vakapaukisa mwoyo wake kuti ade zvimwari zvavo; mwoyo wake usikachazi kururama kunaMambo Mwari, Mwari wake, kudai ngomwoyo wababa ake Dhavhidha.

⁵ Ngokuti Soromoni wakateera Ashithorethi, chimwari chevaSidhoni, naMirikhomu, chinyangadzo chavaAmoni.

⁶ Ndizvo Soromoni wakaita zvakashata mukuona kwaMambo Mwari, naye aazi kuteera Mambo Mwari kwakaperera, kudai ngezvaakaita Dhavhidha baba ake.

⁷ Zvino Soromoni wakaaka ndau yakakwirira yokudira Khemoshi, chinyangadzo cheMoabhi, neyaMorekhi chinyangadzo chevana vaAmoni, pamutunhu uri ngokumabvazuva kweJerusarema.

⁸ Ngenjira iriyo wakaitira vakadzi vake veshe vapara, avo vakapisha mitombo inegwema rakanaka kunezvimwari zvavo.

⁹ Zvino Mambo Mwari wakatsenekera Soromoni ngokuti mwoyo wake wakapaukiswa kubva kunaMambo Mwari, Mwari waIsuraeri, uwo wakaoneka kwaari kairi,

¹⁰ naye waiya akamupanga ngendaa iyi, kuti asazoteera zvimwari zvimweni; asi aazi kungwarira izvo zvaakapangwa ndiMambo Mwari.

¹¹ Ndizvo Mambo Mwari wakati kunaSoromoni, “Ngokuti wakaita zvewaida, usikadi kungwarira chitenderano changu nezviemeso zvangu zvendakakupanga, ngegwinyiso ndinozodusa umambo kubva kwouri, ndinozohupa kunemuranda wako.

¹² Zvakanyadaro, andizozviiti ngemazuva ako, ngendaa yaDhavhidha baba ako; asi ndinozohudusa kubva kunyara yomukororo wako.

¹³ Andizoiti, zvakanyadaro, kubvisa umambo hweshe; ndinozopa dzinza rimwe kumukororo wako, ngendaa yomuranda wangu Dhavhidha, nendaa yeJerusarema rendakatsanangura.”

Magaa aSoromoni

¹⁴ Zvino Mambo Mwari wakamusira Soromoni gaa, Hadhadhi muEdhomu; waiya worudzi rwoumambo munyika yeEdhomu.

¹⁵ Ngokuti apo Dhavhidha paaigara muEdhomu, naJoabhi, nduna yehondo, wakakwira kootsira vakaurawa, wakauraya vamuna veshe veEdhomu

¹⁶ (ngokuti Joabhi wakagaramwo mwedzi mitanhatu nevaIsuraeri veshe, metsa auraya vamuna veshe veEdhomu);

¹⁷ asi Hadhadhi wakatizira Egipite, nevaEdhomu vamweni, vaiya varanda vababa ake. Waiya achiri murumbwana mudoko panguvayo.

¹⁸ Vakamiruka kubva Midhiani vakauya Pharani; vakatora vamuna kubva Pharani, vakauya Egipite, kunaFaro, mambo weEgipite, uwo wakamupa mhatso, akamupa chikoaniswa chezvokudya, akamupa nyika.

¹⁹ Hadhadhi wakaona nyasha huru mukuona kwaFaro, wakamupa mwaramu ake kuita mukadzi, munun'una waThapenesi mambokadzi.

²⁰ Munun'una waThapenesi wakamuberekera Genubhathi mukororo wake, uwo Thapanesi waakarumurira mumhatso yaFaro; Genubhathi waigara mumhatso yaFaro pamwepo nevakororo vaFaro.

²¹ Naapo Hadhadhi azwa ari muEgipite kuti Dhavhidha waata namadzibaba ake, nokuti Joabhi, nduna yehondo, waiya afa, Hadhadhi wakati kunaFaro, “Nditendere kuti ndibve, ndiende kunyika yangu.”

²² Asi Faro wakati kwaari, “Chiinyi chowatama kwendiri, chaita kuti utsvake kuenda kunyika yako?” Naye wakapingura echiti, “Andizi kutama chiro kwouri; asi nditendere kuti ndiende.”

²³ Mwari wakamusazve gaa rimweni rokurwisana naSoromoni, ndiRezoni mukororo waEriadha, uwo wakatiza kubva kunamambo wake Hadhadheza mambo weZobha.

²⁴ Wakaunganidza vanhu kwaari, wakaita nduna padera pechikwata icho, ngomukuwo uwo Dhavhidha waakauraya vanhu veZobha; vakatizira Dhamasekusi, vakagareyo, vakamuita mambo akatonga muDhamasekusi.

²⁵ Wakaita bandu revaIsuraeri veshe mazuva eshe aSoromoni, echiita zvakashata kudai ngezvaakaita Hadhadhi; wakanyenya vaIsuraeri, akatonga padera peAramu.

Chigondiso chaMwari kunaJerobhoamu

²⁶ Jerobhoamu mukororo waNebhati, muEfuremu weZeredha, muranda waSoromoni, zina ramai ake raiya Zerua, shirikadzi, wakamukira mambo Soromoni.

²⁷ Iyi ndiyo ndaa yaakamukira mambo ndiyo. Soromoni wakaaka Miro, akaakisa mauri edhorobha rababa ake Dhavhidha.

²⁸ Zvino munhu uyu Jerobhoamu waiya ngwazi inesimba, naapo Soromoni aona kuti jaha iri raigwinyisira kushanda, wakariemesa padera pomushando wouhloko wemhatso yaJosefa.

²⁹ Pasinde pouwo mukuwo, apo Jerobhoamu paaibuda kubva muJerusarema, muprofeti Ahija muShiro wakamuona munjira. Ahija waiya adzipfekesa chokupfeka chitsva. Vairi ava vaiya vega mushango,

³⁰ apo Ahija paakabata chokupfeka chitsva chaaiya akapfeka, wakachibaura kuita zvigurwa gumi nazviiri.

³¹ Zvino wakati kunaJerobhoamu, “Tora iwewe pachako zvigurwa gumi; ngokuti ndizvo zvinoronza Mambo Mwari, Mwari waIsuraeri, ‘Wona, ndichadusa umambo kubva munyara yaSoromoni, ndinozokupa madzinza gumi.

³² Soromoni unozosara norudzi rumwe ngendaa yomuranda wangu Dhavhidha, nendaa yeJerusarema, dhorobha rendakatsanangura pakati pemadzinza eshe aIsuraeri.

³³ Ngokuti wakandisiya, akadira Ashithorethi chimwari chevaSidhoni, neKhemoshi, chimwari chevaMoabhi, naMirikhomu, chimwari chevana vaAmoni, aazi kuhamba ngenjira dzangu, echiita izvo zvakarurama mukuona kwangu, nokungwarira zviemeso zvangu nemipango yangu, kudai ngezvaakaita Dhavhidha baba ake.

³⁴ Asi zvakanyadaro andizobvisi umambo hweshe kubva munyara yake, asi ndinozomuita mutongi mazuva eshe okupona kwake, ngendaa yaDhavhidha muranda wangu uwo wendakatsanangura, naye wakangwarira mipango yangu nezviemeso zvangu;

³⁵ asi ndinozodusa umambo kubva kunyara yomukororo wake, ndinozohupa kwouri, madzinza gumi.

³⁶ Asi kunomukororo wake ndinozopa dzinza rimwe, kuti Dhavhidha muranda wangu aane kujeka nguva dzeshe pamberi pangu muJerusarema, dhorobha rendakatsanangura kuisa zina rangumwo.

³⁷ Ndinozokutora iwewe kuti utonge peshe kudai ngokuda kwomwoyo wako, unozoita mambo padera paIsuraeri.

³⁸ Kudai wechizopurutana zveshe zvendinokupanga, kuhamba ngenjira dzangu, wechiita izvo zvakarurama mukuona kwangu, wechingwarira zviemeso zvangu nemipango yangu, kudai ngezvaakaita Dhavhidha muranda wangu; ndinozoa newe, ndikuakire mhatso yakagwinya, kudai ngezvendakaakira Dhavhidha, ndinozopa Isuraeri kwouri.

³⁹ Ngendaa yeizvi ndinozoorora rudzi rwaDhavhidha, asi haiwa kwemhera nariini.’ ”

⁴⁰ Ndizvo Soromoni wakatsvaka kuuraya Jerobhoamu; asi Jerobhoamu wakamiruka, akatizira Egipite, kunaShishaki mambo weEgipite, akagara Egipite metsa kufa kwaSoromoni.

Kufa kwaSoromoni

⁴¹ Zvino mishando imweni yaSoromoni, neizvo zvaakaita zveshe, noungwaru hwake, azvizi kunyorwa here muBhuku reZviito zvaSoromoni?

⁴² Makore aakatonga Soromoni muJerusarema padera pevaIsuraeri veshe aiya makore makumi marongomuna.

⁴³ Soromoni wakaata nemadzibaba ake, naye wakatsirwa mudhorobha rababa ake Dhavhidha; naRehobhoamu mukororo wake wakatonga pandau yake.