1 Joh. 5 - Bhaibheri Rakachena muChindau

Kugonda Kunonyisa Nyika

¹ Munhu weshe unotenda kuti Jesu ndiKristu, wakabarwa ndiMwari, nomunhu weshe unoda wakabara, unodazve mwana wakabarwa.

² Ngeichi tinozia kuti tinoda vana vaMwari, apo techida Mwari nokungwarira mipango yake.

³ Ngokuti rudo rwaMwari ngourwu, kuti tingwarire mipango yake. Nemipango yake aidzimbiri,

⁴ ngokuti kunyazwi ngechiri chakabarwa ndiMwari chinonyisa nyika. Nouku ndikwo kunyisa kwakanyisa nyika, ndikwo kugonda kwedu.

⁵ Ndiani uwo unonyisa nyika kwega uwo unotenda kuti Jesu Mukororo waMwari?

Kupupura ndiJesu Kristu

⁶ Uyu ndiye wakauya ngemvura nengazi, ndiJesu Kristu; aazi kuuya ngemvura yega, asi ngemvura nengazi. Mweya ndiwo unopupura, ngokuti Mweya igwinyiso.

⁷ Ngokuti varipo vatatu vanopupura,

⁸ ndiMweya, mvura nengazi, naavo vatatu vanotenderana chiro chimwe.

⁹ Kudai techiashira uchapupu hwevanhu, uchapupu hwaMwari hwakapinda kukura; ngokuti uhwu ndihwo uchapupu hwaMwari hwaakapupura ndihwo ngendaa yoMukororo wake.

¹⁰ Iye unotenda Mukororo waMwari uneuchapupu mukati mwake. Iye usikatendi Mukororo waMwari unomuita munyepi, ngokuti aazi kutenda uchapupu hwaakapupura Mwari ngendaa yoMukororo wake.

¹¹ Nouhwu ndihwo uchapupu, kuti Mwari wakapa kwetiri kupona kusikaperi, noukwo kupona kuri muMukororo wake.

¹² Kunyazwi ndiani uno Mukororo uno kupona; nouwo usina Mukororo waMwari, aana kupona.

Mazwi oKugumisira

¹³ Ndanyora izvi zviro kwomuri imwimwi vanotenda muzina roMukororo waMwari, kuti muzie kuti munakwo kupona kusikaperi.

¹⁴ Ndikwo kushinga kwetinakwo mwaari, kuti kudai techikumbira chiro kunyazwi ngechiri ngokuda kwake, iye unotizwa.

¹⁵ Kudai techizia kuti unotizwa munecheshe chetinokumbira, tinozia kuti taanacho chetakakumbira kwaari.

¹⁶ Kudai munhu echiona hama yake yechiita chishaishi chisiri chokufa, iye unozokumbira, naMwari unozomupa kupona, kunopuwa vasikaiti chishaishi chokufa. Chiripo chishaishi chokufa; ngeichi andironzi kuti akumbire ngendaa yacho.

¹⁷ Kweshe kusikarurama kushaisha, kuripozve kushaisha kusiri kwokufa.

¹⁸ Tinozia kuti munhu weshe wakabarwa ndiMwari aashaishi, asi uwo wakabarwa ndiMwari unomungwarira, nouwo wakashata aamugwami.

¹⁹ Tinozia kuti tiri vana vaMwari, nenyika yeshe inogara pashi pesimba rouwo wakashata.

²⁰ Nesu tinozia kuti Mukororo waMwari wakauya, akatipa kuzwisisa kuti tizie uwo unegwinyiso; nesu tiri mukati mwouwo uri gwinyiso, mukati mwoMukororo wake Jesu Kristu. Uyu ndiye Mwari wegwinyiso nokupona kusikaperi.

²¹ Vana vadoko, dzingwarirei kubva kumiedzaniso yokudira.