1 Joh. 4 - Bhaibheri Rakachena muChindau

Mweya weGwinyiso noMweya woKunyepa

¹ Vanodikanwa, musatenda mweya yeshe, asi edzai mweya muone kuti inobva kunaMwari; ngokuti vaprofeti vazhinji vokunyepa vakabuda kuenda munyika.

² Ngeichi munozia Mweya waMwari: mweya weshe unotenda kuti Jesu Kristu wakauya munyama unobva kunaMwari,

³ nomweya weshe usikatendi Jesu aubvi kunaMwari akadi. Nouyu ndiwo mweya wegaa raKristu, womwakazwa kuti unouya, nazvino waamunyika.

⁴ Vana vadoko, imwimwi munobva kunaMwari, mwakavanyisa; ngokuti uwo uri mukati mwenyu wakakura kupinda umwo uri munyika.

⁵ Vanobva munyika; ndizvo vanoereketa ngezvinobva munyika, nenyika inovazwa.

⁶ Isusu tinobva kunaMwari. Uwo unomuzia Mwari, unotizwa, nouwo usikabvi kunaMwari aatizwi. Pane izvi tinozia mweya wegwinyiso nomweya wokunyepa.

Mwari Rudo

⁷ Vanodikanwa, ngatidanane, ngokuti rudo runobva kunaMwari, nomunhu weshe unorudo wakabarwa ndiMwari, unomuzia Mwari.

⁸ Uwo usina rudo aamuzii Mwari, ngokuti Mwari uri rudo.

⁹ Rudo rwaMwari rwakaoniswa kwetiri ngenjira iyi; Mwari wakatuma Mukororo wake munyika wakabarwa ari ega, kuti tiponeswe kubudikidza ndiye.

¹⁰ Rudo ruri muneichi, haiwa kuti isusu takamuda Mwari, asi kuti iye wakatida, akatuma Mukororo wake kuti aite muripo wezvishaishi zvedu.

¹¹ Vanodikanwa, kudai Mwari akatida kudaro, tinosisira kuti isusu tidanane.

¹² Akuna munhu wakamboona Mwari; kudai techidanana, Mwari unogara mukati mwedu, norudo rwake runoita rwakaperera mukati mwedu.

¹³ Ngeichi tinozia kuti tinogara mukati mwake, naye unogara mukati mwedu, ngokuti wakatipa Mweya wake.

¹⁴ Nesu takaona, tinopupura kuti Baba vakatuma Mukororo wavo kuti aite Muponesi wenyika.

¹⁵ Mwari unogara mukati mwaavo vanotenda kuti Jesu mukororo waMwari, navo vanogara mukati mwaMwari.

¹⁶ Ndizvo tinozia nokutenda rudo rwaanarwo Mwari kwetiri. Mwari rudo, nouwo unogara murudo unogara mukati mwaMwari, naMwari unogara mukati mwake.

¹⁷ Ngeichi rudo runoitwa rwakaperera kwetiri, kuti tiite vakashinga ngezuva rokutongwa, ngokuti kudai ngezvaari azvo iye, nesu takadarowo munyika muno.

¹⁸ Amuna kutya murudo, asi rudo rwakaperera runodzinga kutya; ngokuti kutya kunamaharura, asi uwo unotya aazi kuperera murudo.

¹⁹ Tinoda ngokuti iye wakatanga kutida.

²⁰ Kudai aripo munhu unoti, “Ndinomuda Mwari,” naye echinyenya hama yake, munyepi; ngokuti uwo usikadi hama yake yaanoona, aangamudi Mwari waasikazi kumboona.

²¹ Nouyu ndiwo mupango wetinawo kubva kwaari, kuti uwo unomuda Mwari, ngaadewo hama yake.