1 Joh. 3 - Bhaibheri Rakachena muChindau

¹ Ringirai kukuranyi kworudo rwaakatipa Baba, kuti tidaidzwe kuti tiri vana vaMwari; ndizvo tiri vakadaro. Ngeiyi ndaa nyika aitizii ngokuti aizi kumuzia.

² Vanodikanwa, zvino tiri vana vaMwari; akusati kwaoniswa kuti tinozoita vakadini. Asi tinozia kuti apo iye paanooniswa tinozodai ndiye, ngokuti tinozomuona kudai ngezvaari azvo.

³ Munhu weshe uneiri gonda mukati mwake unodzichenesa, kudai ndiye wakachena.

⁴ Munhu weshe unoita zvishaishi unogura Mipango, ngokuti chishaishi kugura Mipango.

⁵ Nemwi munozia kuti iye wakaoniswa kuti aduse zvishaishi, mukati mwake amuna kushaisha.

⁶ Munhu weshe unogara mukati mwake aashaishi; uwo unoshaisha aazi kumuona nokuti kumuzia.

⁷ Vana vadoko, musatendera munhu kuti amupause. Weshe unoita zvakanaka wakarurama, kudai ndiye wakarurama.

⁸ Weshe unoshaisha mwana waDhiabhorosi; ngokuti Dhiabhorosi unondoshaisha kubvira pakutanga. Ngeiyi ndaa Mukororo waMwari wakaoniswa kuti aparadze mishando yaDhiabhorosi.

⁹ Munhu weshe wakabarwa ndiMwari aashaishi, ngokuti mbeu yaMwari inogara mukati mwake; aakoni kushaisha, ngokuti wakabarwa ndiMwari.

¹⁰ Vana vaMwari nevaDhiabhorosi vanooniswa ngenjira iyi; munhu weshe usikaiti zvakarurama aabvi kunaMwari akadi, nokuti uwozve usikadi hama yake.

Dananai Umwe kunoUmweni

¹¹ Ngokuti iri ndiro shoko remwakazwa kubvira pakutanga, rokuti tinosisira kuti tidanane,

¹² tisikadai ndiKheni, uwo waiya wowakashata, akauraya munun'una wake. Wakamuurairenyi? Ngokuti mishando yake yaiya yakashata neyomunun'una wake yaiya yakarurama.

¹³ Musashama, hama, kuti nyika yechimunyenya.

¹⁴ Tinozia kuti takabva murufu kuenda mukupona, ngokuti tino rudo kuhama. Iye usina rudo unogara murufu.

¹⁵ Munhu weshe unonyenya hama yake muurayi, nemwi munozia kuti akuna muurayi unokupona kusikaperi kunogara mukati mwake.

¹⁶ Ngeiyi ndaa tinozia rudo, ngokuti iye wakaisa pashi kupona kwake ngendaa yedu; nesu tinosisira kuti tiise pashi kupona kwedu ngendaa yehama.

¹⁷ Asi kudai uno upfumi hwomunyika echiona hama yake iri mukutama, echikonyera nyasha dzake kwaari, rudo rwaMwari rungaita magarirenyi mukati mwake?

¹⁸ Vana vadoko, tisada ngeizwi nokuti ngokuereketa, asi ngezviito negwinyiso.

¹⁹ Ngeichi tinozozia kuti tinobva mugwinyiso, techigwinyisa mwoyo yedu pamberi pake,

²⁰ naapo kudai mwoyo yedu yechitiitira ndaa; Mwari uri mukuru kupinda mwoyo yedu, naye unozia zviro zveshe.

²¹ Vanodikanwa, kudai mwoyo yedu isikatiitiri ndaa, tinokushinga pamberi paMwari;

²² nesu tinoashira kunyazwi chiinyi chetinokumbira kubva kwaari, ngokuti tinongwarira mipango yake nokuita izvo zvinomudakadza mukuona kwake.

²³ Uyu ndiwo mupango wake, kuti titende zina roMukororo wake Jesu Kristu nokudanana umwe kunoumweni, kudai ngezvaakatipanga.

²⁴ Weshe unongwarira mipango yake unogara mukati mwake, naye unogara mukati mwake; ngendaa iyi tinozia kuti iye unogara mukati mwedu, ngoMweya uwo waakatipa.