1 Joh. 2 - Bhaibheri Rakachena muChindau

Kristu Muemereri Wedu

¹ Vana vangu vadoko, ndinonyora kwomuri izvi zviro kuti musashaisha. Asi kudai umwe echishaisha tinomuemereri kunaBaba, Jesu Kristu wakarurama;

² nouyu ndiye muripiri wezvishaishi zvedu, haiwa wezvishaishi zvedu zvega, asiwo nezvishaishi zvenyika yeshe.

³ Ngeichi tingaa negwinyiso rokuti tinomuzia, kudai techingwarira mipango yake.

⁴ Kunyazwi ndiani unoti, “Ndinomuzia,” asi asikangwariri mipango yake munyepi, negwinyiso amuna mukati mwake;

⁵ asi kunyazwi ndiani unongwarira izwi rake, ngegwinyiso rudo rwaMwari rwakaperera mukati mwake. Ngeichi tinegwinyiso rokuti tiri mukati mwake;

⁶ kunyazwi ndiani unoronza kuti, “Inini ndinogara mukati mwake,” kunosisira kuti ahambewo kudai ngezvaakahamba.

Mupango Mutsva

⁷ Vanodikanwa, andimunyoreri mupango mutsva, asi mupango wekaretu, wemwaiya nawo kubvira pakutanga; mupango wekaretu ndiwo izwi remwakazwa.

⁸ Asi ndiri kumunyorera mupango mutsva, uri wegwinyiso mukati mwake nomukati mwenyu, ngokuti chidima chinopinda, nokujeka kwegwinyiso kunojeka zvino.

⁹ Kunyazwi ndiani unoti, “Inini ndiri mukujeka,” echinyenya hama yake, uchiri muchidima metsa nazvino.

¹⁰ Kunyazwi ndiani unoda hama yake unogara mukujeka, mukati mwake amuna chipumhuniso.

¹¹ Asi kunyazwi ndiani unonyenya hama yake uri muchidima, unohamba muchidima, naye aazii paanoenda, ngokuti chidima chakafukidza madziso ake.

¹² Ndinomunyorera, vana vadoko, ngokuti zvishaishi zvenyu zvakarekererwa ngendaa yezina rake.

¹³ Ndinomunyorera, madzibaba, ngokuti mwamuzia uwo waiyapo kubvira pakutanga. Ndinomunyorera, majaha, ngokuti mwakamunyisa uwo wakashata.

¹⁴ Ndamunyorera, vana vadoko, ngokuti mwamuzia Baba. Ndamunyorera, madzibaba, ngokuti mwamuzia uwo waiyapo kubvira pakutanga. Ndamunyorera, majaha, ngokuti mwakagwinya neizwi raMwari rinogara mukati mwenyu, nemwi mwakanyisa uwo wakashata.

¹⁵ Musade nyika nokuti zviro zviri munyika. Rudo rwaBaba amuna mukati mwavo avo vanoda nyika;

¹⁶ ngokuti zveshe zviri munyika, kuemura kwenyama, kuemura kwemadziso, kudzikudza kwokupona, azvibvi kunaBaba akadi, asi zvinobva munyika.

¹⁷ Nenyika nokuemura kwayo inopinda; asi iye unoita kuda kwaMwari unogara mhera nariini.

Gaa raKristu

¹⁸ Vana vadoko, inguva yokugumisira! Kudai ngezvemwakazwa kuti gaa raKristu rinouya, nazvino akauya magaa akawanda aKristu. Ngeizvi tinozia kuti inguva yokugumisira.

¹⁹ Vakabuda kubva kwetiri, asi vaiya vasiri vedu akadi; ngokuti kudai vaiya vedu, vangadai veigara nesu. Asi ngokubva kwetiri zvakaonisa kuti veshe vasaiya vedu akadi.

²⁰ Asi imwimwi mwakadzodzwa ngoUwo Wakachena, mweshe munozia.

²¹ Andizi kumunyorera ngokuti amuzii gwinyiso, asi ngokuti munorizia, ngokutizve akuna nyepo ringabva mugwinyiso.

²² Ndiani munyepi, asi iye unophikisa kuti Jesu andiyepi Kristu? Uyu ndiye gaa raKristu, unoramba Baba noMukororo.

²³ Kunyazwi ndiani unoramba Mukororo, zve, aana Baba; weshe unotenda Mukororo unavowo Baba.

²⁴ Asi icho chemwakazwa kubvira pakutanga ngachigare mukati mwenyu. Kudai icho chemwakazwa kubvira pakutanga chechigara mukati mwenyu, imwimwiwo munozogara mukati mwoMukororo nomukati mwaBaba.

²⁵ Neichi ndicho chigondiso chaakatigondisa, ndikwo kupona kusikaperi.

²⁶ Ndanyora izvi kwomuri ngendaa yaavo vanomupausa.

²⁷ Asi imwimwi kudzodzwa kwemwakaashira kwaari kunogara mukati mwenyu, amutami kuti munhu amudzidzise. Asi kudai ngokudzodza kwake kunomudzidzisa ngezviro zveshe, nazvo igwinyiso, asikunyepapi, kudai ngezvekwakamudzidzisa, munogara mukati mwake.

²⁸ Zvino, vana vadoko, garai mukati mwake, kuti apo echizooniswa, isusu tiite vakashinga, tisikatsveruki pamberi pake mukuuya kwake.

Vana vaMwari

²⁹ Kudai mwechizia kuti iye wakarurama, munozia kuti veshe vanoita zvakarurama vakabarwa ndiye.