1 Joh. 1 - Bhaibheri Rakachena muChindau

Izwi roKupona

¹ Icho chaiyapo kubvira pakutanga, icho chetakazwa, chetakaona ngemadziso edu, icho chetakaringira nokubata ngenyara dzedu, chiri Izwi rokupona,

² kupona uku kwakaoniswa, nesu takakuona, tinoita chapupu, nokuteketesa kwomuri uku kupona kwemhera nariini, ukwo kwaiya naBaba nakwo kwakaoniswa kwetiri.

³ Icho chetakaona nechetakazwa tinochiteketesa kwomuri, kuti imwimwiwo muiyane nesu; eya, nokuiyana kwedu kuri munaBaba noMukororo wake Jesu Kristu.

⁴ Nesu tinonyora izvi kuti kudakara kwedu kuzadzisike.

Mwari Kujeka

⁵ Iri ndiro shoko retakazwa kubva kwaari nokuteketesa kwomuri, kuti Mwari kujeka nomwaari amuna chidima nepadoko.

⁶ Kudai techironza kuti tinoiyana naye, naapo techihamba muchidima, tinonyepa, tisikaiti gwinyiso;

⁷ asi kudai techihamba mukujeka kudai ndiye uri mukujeka, tinakwo kuiyana umwe kunoumweni, nengazi yaJesu Mukororo wake inotisuka kubva kuzvishaishi zveshe.

⁸ Kudai techironza kuti atina kushaisha, tinodzichengedzera pachedu, negwinyiso amuna mukati mwedu.

⁹ Kudai techitenda zvishaishi zvedu, iye unogondeka nokururama unozotirekerera zvishaishi zvedu nokutisuka kusikarurama kweshe.

¹⁰ Kudai techironza kuti atizi kushaisha, tinomuita munyepi, neizwi rake amuna mukati mwedu.