SALMOS 98 - Icamanal Toteco

Ma tijpaquilismacaca Toteco pampa yaya xitahuac tetajtolsencahua

¹ Ma tihuicaca para TOTECO se huicat yancuic, pampa yaya quichijtoc nochi nopa huejhueyi tiochicahualnescayot. Yaya ya tatantoc ica ihueyi chicahualis huan ica imax cati tatzejtzeloltic.

² TOTECO quipanextijtoc ipan nochi taltipacti para san yaya temaquixtía. Quinextijtoc iniixpa sequinoc talme para xitahuac tetajtolsencahua.

³ Yaya quielnamictoc cati techtencahuilijtoc pampa techicneli tojuanti tiisraelitame. Huan ama ipan nochi taltipacti quiitztoque quenicatza Toteco Dios techmaquixtijtoc tiimasehualhua.

⁴ Yeca ipan nochi taltipacti xijpaquilismacaca TOTECO huan xihuicaca ica miyac paquilisti.

⁵ Xijhuicatica TOTECO. Xijhueyimatica huan xitatzotzonaca ica arpa.

⁶ Xijpitzaca nochi tamanti tapitzali huan xihuicaca ica cuajcualtzi iixpa TOTECO, yaya cati Tanahuatijquet.

⁷ ¡Ma ajcahuaca chicahuac nochi nopa hueyi at huan ma quipaquilismaca Toteco! Nochi taltipacti huan cati itztoque ipani ma tzajtzica huan ma quiijtoca: “Tijhueyitalise Toteco.”

⁸ Nopa hueyame ma paquica, huan masehualme ma momatatzinica, huan nochi tepeme ma huicaca ica paquilisti

⁹ iixpa TOTECO, pampa yaya huala para quintajtolsencahuaqui xitahuac nochi masehualme cati itztoque ipan ni taltipacti.