SALMOS 82 - Icamanal Toteco

Toteco quinajhuac nopa jueces cati amo tetajtolsencahuaj xitahuac

¹ Toteco Dios itztoc ipan se hueyi tasentilisti nepa ilhuicac. Huan nopona tayolmelahua quenicatza quintatzacuiltis nopa jueces huan quinilhuía:

² “¿Hasta quema tamis antacajcayahuaj quema antetajtolsencahuaj? ¿Hasta quema tamis anquinchicoicnelise amo cuajcualme cati fiero quichihuaj?

³ Xiquintenpalehuica cati ayemo quipiyaj tetili huan cati icnotzitzi. Xiquintajtolsencahuaca cati taijyohuíaj huan cati amo teno quipiyaj.

⁴ Xiquinmaquixtica cati ayecmo quipiyaj chicahualisti huan quinpolohua ten ica panose. Quena, xiquinmanahuica inimaco nopa masehualme cati amo aqui quitepanitaj.

⁵ Amojuanti cati anquintaijyohuiltíaj amo teno anquimatij huan amo teno anquimachilíaj. Annemij ipan tzintayohuilot huan nochi itzinpehualtil taltipacti huihuipica.

⁶ Quena, na nimechtocaxtijtoc ‘andioses’ huan ‘annoconehua niDios Cati Más Hueyi’,

⁷ pero quema hualas miquilisti, nimantzi anmiquise pampa amojuanti san anmasehualme. Amopantis quej ipanti cati hueli masehuali cati quipiya tequiticayot, pampa nochi miquise.” Quej nopa quiijto Toteco.

⁸ ¡Toteco Dios, ximotanana huan xijtajtolsencahua ni taltipacti, pampa nochi moaxca! Nochi talme huan tanahuatiani eltoque momaco.