SALMOS 8 - Icamanal Toteco

Masehualme huan ihueyitilis Toteco Dios

¹ ¡TOTECO, ta Cati Tijpiya Nochi Tanahuatili! Mohueyitilis quitemitía nochi taltipacti. Huan motatanex quipano ilhuicacti. Nochi quimatij ta tahuel tihueyi.

² Tiquinnextilijtoc coneme huan pilconetzitzi cati noja chichij ma mitzpaquilismacaca. Mocualancaitacahua quiitase huan momacase cuenta para tahuel pano hueyi mochicahualis huan yeca ayecmo molinise.

³ Quema niquita ilhuicacti cati tijsencajqui, huan nopa metzti huan sitalime cati tijchijchijqui,

⁴ nimoyolilhuía: ¿Ajquiya tojuanti timasehualme para ta timocuatotonía huan timoilhuía ten tojuanti? Nelquentzi topati timasehualme para ta techmocuitahuis.

⁵ Techchijtoc timasehualme más tihuejhueyi moixpa que nochi sequinoc. Techmacatoc tohueyitilis moixpa huan tijchijtoc para nochi cati tijchijchijtoc ma techtepanitaca. San ta, TOTECO, tieltoc más tihueyi huan techtani ica mohueyitilis.

⁶ Techmacatoc timasehualme tanahuatili ica nochi tapiyalme cati tiquinchijtoc. Quena, techmacatoc timasehualme para ma tijpiyaca tequiticayot ica nochi tamanti.

⁷ Tiquinnahuatíaj nochi borregojme, huacaxme huan nochi tecuanime cati mosisiníaj.

⁸ Tijpiyaj tequiticayot ica nochi tamanti totome huan michime, huan ica nochi cati itztoque ipan hueyi at.

⁹ ¡TOTECO, ta Cati Tijpiya Nochi Tanahuatili! Nochi masehualme campa hueli ipan nochi taltipacti quimatij ta tahuel tihueyi.