SALMOS 54 - Icamanal Toteco

Se netatajtili para Toteco ma quimanahui ten icualancaitacahua

¹ ¡NoTeco Dios, xihuala techmaquixtiqui pampa nochi quimatij ta tihueyi! ¡Techmanahuiqui ica mohueyi chicahualis!

² Techtacaquili quema nimotatajtía ica ta. Quena, xijtacaquili cati nimitzpohuilía,

³ pampa tatehuijca masehualme motanantoque ica na. Quena, masehualme cati amo quema mitzelnamiquij nechtemohuaj para nechmictise.

⁴ Pero Toteco Dios nochipa nechpalehuía, huan amo quincahuilis ma nechmictica.

⁵ Toteco quincuepilis nocualancaitacahua nochi nopa tamanti amo cuali cati inijuanti quisencajtoque nechchihuilise. Quena, TOTECO, ta cati nelía titemachti, xijchihua senquisa quej techtencahuilijtoc, huan xiquintzontamilti nochi nocualancaitacahua.

⁶ Ica paquilisti nimitzmacas notacajcahualis. Nimitzhueyimatis pampa ta nelía ticuali,

⁷ pampa ta techmanahuijtoc ten nochi taohuijcayot, huan niquitztoc quenicatza tiquintantoc nochi nocualancaitacahua.