SALMOS 4 - Icamanal Toteco

Monequi timotemachise ipan Toteco Dios

¹ Toteco Dios, ta techchijtoc nixitahuac moixpa, Se favor technanquili quema nimitznojnotza. Ta cati nochipa techpalehuía quema nitaijyohuía, ama sempa techtasojta huan xijcaqui quema nimotatajtía.

² “Anmasehualme, xijtacaquilica ya ni: ¿Hasta quema tamis para anpaquise ica na cati más quinamiqui nijselis tatepanitacayot? ¿Hasta quema noja anquinhueyichihuase taixcopincayome cati amo neli Dios? ¿Hasta quema noja anmocahuase ma amechcajcayahuaca?”

³ Anmasehualme, xijmatica ya ni. TOTECO techiyocatalijtoc para tiiaxcahua nochi tojuanti cati techcojtoc. Huan yaya nechtacaquilía quema nijnojnotza huan nechchihuilía cati nijtajtanía.

⁴ Masque anhuihuipicaj ica cualanti, amo xitajtacolchihuaca. Quema anmotectose ipan amotapech huan amo teno molinía, ximoyolilhuica cati eltoc ipan amoyolo.

⁵ Xijchihuaca cati quinequi TOTECO huan ya nopa elis quej anquimacasquíaj se tacajcahualisti cati quipactía. Quena, ximotemachica ipan ya.

⁶ Miyac quiijtohuaj: “Amo aqui huelis techpalehuis.” Pero ta tihueli, TOTECO. Techcualita huan techtiochihua.

⁷ Ta tijtalijtoc ipan noyolo más paquilisti, huan amo quej cati quipiyaj masehualme cati quipixcaj miyac trigo, o quipiyaj miyac xocomecat iayo.

⁸ Yeca na nimotecas ica paquilisti ipan noyolo huan ica cuali nicochis, pampa nijmati san ta, TOTECO, techmanahuía huan amo teno huelis se masehuali nechchihuilis.