SALMOS 3 - Icamanal Toteco

Se netatajtili para Toteco Dios ma quipalehui

¹ TOTECO, nelía momiyaquilíaj nocualancaitacahua. Quena, nelmiyaqui motananaj para techtehuise.

² Miyaqui quiijtohuaj para ta amo quema techpalehuis.

³ Pero TOTECO, ta techyahualohua para techmanahuis. Ta cati techhueyitalía huan san ta cati tihueli techyolchicahua.

⁴ Chicahuac nimitztzajtzili, TOTECO, para techpalehuis. Huan ta technanquili hasta campa tionitztoc nepa ipan motepe cati tatzejtzeloltic.

⁵ Yeca nimotejqui huan cuali nicochqui. Huan quema niisac, amo teno nopantitoya pampa ta, TOTECO, techmocuitahuía.

⁶ Ama ayecmo nechmajmatise masque majtacti mil nocualancaitacahua nechyahualose para nechtehuise.

⁷ Ximotanana, TOTECO. Techmaquixti, ta tinoTeco Dios. Chicahuac xiquinmaquili nochi nocualancaitacahua ipan inixayac. Xiquintanpojpostequi nopa mosisinijca masehualme, para tamis nochi ininchicahualis huan amo teno huelis nechchihuilise.

⁸ San ta, TOTECO, hueli titemaquixtía. Hueyi paquilisti quipiyaj nochi momasehualhua.